Mensahe Sa Kapangulohan Sa Area
Duol ngadto kang Kristo: Ako Moadto, Ako Moserbisyo
“Ang atong pagpunting sa unsay atong buhaton isip mga miyembro sa Simbahan mao ang makahatag og gahom, makaabag nga gahom nga moabot pinaagi sa atong Manluluwas, si Jesukristo.”
Dapit sa hinapos sa iyang yutan-ong pagpangalagad si Jesus mitudlo sa sambingay sa mga talanton. Ngadto sa sulugoon kinsa matinud-anon sa pagpadaghan sa iyang mga talanton ang Ginoo namahayag “Maayo! Buotan ka ug matinumanon nga sulugoon. Kay kasaligan ka man sa diyutay, piyalan ko ikaw sa daghan.”1
Niining samang diwa kami mibati sa pag-uyon sa Ginoo sa talagsaong kalamposan sa mga miyembro sa simbahan sa tibuok Pilipinas nga mitubag sa tawag sa pagserbisyo sa full-time nga mga misyon. Karon, kay nakahimo og maayo niini nga tawag sa paglihok, ang Ginoo mihatag og mas gipatas-an nga panglantaw alang sa umaabot. Ang atong motto nahimong “Ako Moadto Ako Moserbisyo.” Kon ang matag batan-on modeklarar sa ilang pasalig, ilang mapanglantawan diha sa ilang hunahuna ang ilang kaugalingon nga nagserbisyo isip usa ka misyonaryo. Ang mga batan-ong lalaki motan-aw sa ilang kaugalingon nga usa ka adlaw magsul-ob og puti nga polo ug magkurbata, ang mga batan-ong babaye motan-aw sa ilang kaugalingon nga nagdawat sa usa ka tawag gikan sa propeta aron magsangyaw sa maayong balita sa ebanghelyo.
Ang importante nga tahas sa Manluluwas sa atong kinabuhi karon mas hingpit nga nasilsil sa atong mga hunahuna ug sa atong mga kasingkasing. Samtang kita magpadayon, ang diwa sa naghunghong nga Espiritu Santo modasig kanato sa pagbaton og tin-aw nga pagpunting sa Manluluwas…diha sa Iyang tahas sa tanan nato nga buhaton subay sa dalan sa pakigsaad ug samtang kita mopadayon ug motubag sa tawag sa pagserbisyo. Agig pagpangandam sa pag-adto ug pagserbisyo, kita una sa tanan kinahanglan gayod nga mosiguro nga si Jesukristo ang rason nga kita mobuhat sa tanan natong buhaton. Ang pagduol ngadto kang Kristo mao ang atong nag-unang makapadasig nga katuyoan. Kita moduol ngadto kang Kristo kon kita moapil diha sa mga ordinansa ug mga pakigsaad sa templo. Kita kinahanglan dili gayod motan-aw sa templo ug sa pagdawat sa mga ordinansa ug mga pakigsaad sa templo isip basta lang nakatuman sa kinahanglan buhaton aron makaserbisyo og full-time nga misyon. Ang atong tinguha sa pagduol ngadto kang Kristo makapahimo kanato sa pag-ila sa kritikal nga tahas sa templo sa pagdala kanato ngadto Kaniya.
Ang atong pagpunting sa unsay atong buhaton isip mga miyembro sa Simbahan mao ang makahatag og gahom, makaabag nga gahom nga moabot pinaagi sa atong Manluluwas, si Jesukristo. Kita nasayod nga Siya gipili sa atong Langitnong Amahan sa pagdala sa ebanghelyo sa kalibotan, sa pag-organisar sa Simbahan ni Jesukristo, ug sa pagpatuman sa walay kinutoban nga pag-ula ug mahimayaon nga pagkabanhaw. Ang kinabuhi ug pagpangalagad sa atong Manluluwas nakapahimo sa tanan natong buhaton nga makahuloganon.
Ngadto sa gagmayng bata si Jesus namahayag “Paduola kanako ang mga bata ug ayaw sila pugngi kay ang gingharian sa langit ila sa mga tawo nga sama kanila.”2 Siya mainiton nga midapit niadtong kinsa nabug-atan sa mga palas-anon ug mga kabalaka sa kinabuhi nag-ingon “Duol kamo kanako, kamong tanan nga gikapuyan ug gibug-atan sa inyong gipas-an ug papahulayon ko kamo”3; ug sa tanan kinsa giuhaw sa buhi nga tubig, nga mao, ang ebanghelyo ni Jesukristo, siya namahayag “Paduola kanako ang giuhaw ug paimnon ko siya.”4
Sumala sa panawagan nga imbitasyon sa Manluluwas, gidapit namo karon ang tanan nga miyembro sa simbahan sa pagtutok sa mas tukma, mas hingpit, mas mainiton nga paagi kon unsaon nato nga mas mapaduol kang Kristo pinaagi sa mga ordinansa ug mga pakigsaad nga gihimo sa templo. Sa mga ordinansa ug mga pakigsaad ang Diwa sa Espiritu Santo modala kanato paduol ngadto ni Kristo. Kita mahimong mabalaan, ug kita mahatagan og gahom sa pagserbisyo sa uban sama nga ang atong Manluluwas miserbisyo kanato.
Ang panan-awon nga among ipaila karon mao ang pagtan-aw sa atong kaugalingon nga moduol ngadto kang Kristo ug mapalawman ang atong personal nga relasyon uban kaniya, ug pinaagi kaniya, uban sa atong Langitnong Amahan. Samtang kita magpaduol ngadto sa atong Manluluwas, sa iyang kinabuhi, pagpangalagad, ang maulaon nga sakripisyo mahimong makapadasig nga pwersa sa tanan natong buhaton.
Ang atong naghiusang singgit mao ang “Ako Moadto Ako Moserbisyo.” Kami mitakda karon sa imbitasyon uban sa usa ka pasalig. Karon kami mamahayag, “Duol Ngadto kang Kristo: Ako Moadto, Ako Moserbisyo.” Taliwala sa “Duol Ngadto kang Kristo” ug “Ako Moadto,” ang atong mga hunahuna kinahanglan mapuno sa tinguha ug pasalig sa pagpaduol ngadto kang Kristo pinaagi sa pagsalmot diha sa mga ordinansa sa templo. Diha sa mga ordinansa kita makadawat og usa ka pagsaksi sa Espiritu Santo sa mga hiyas sa Manluluwas. Ang Iyang kinaiya, gugma ug kapuangod mas hingpit nga gipadayag ngadto sa atong mga kasingkasing, hunahuna, ug mga kalag. Kana nga pagpadayag, diha sa taliwala niadtong mga ordinansa, makapaabante kanato sa unahan uban sa tinguha sa pagserbisyo sa uban.
Sa Oktubre 2022 nga Kinatibuk-ang Komperensiya, si Presidente Nelson mitambag kanatong tanan nga MAGPUNTING SA TEMPLO. Miingon siya: “Iya kini nga balay. Kini puno sa Iyang gahom. Dili nato kalimtan kon unsa ang gibuhat sa Ginoo alang kanato karon. Iyang gibuhat ang Iyang mga templo nga mas dali nga maadtoan. Iyang gipaspasan ang gikusgon sa atong pagtukod og mga templo. Iyang gipalambo ang atong abilidad sa pagtabang sa pagpundok sa Israel. Iya usab nga gihimong mas sayon alang sa matag usa kanato nga mahimong malamboon sa espirituhanon nga paagi. Ako mosaad nga ang paggahin og mas dako nga oras diha sa templo mopanalangin sa inyong kinabuhi sa mga paagi nga walay laing makahimo.”5
Sa atong bag-o nga logo, atong makita ang “Duol Ngadto kang Kristo: Ako Moadto, Ako Moserbisyo.” Atoa usab makita ang mga miyembro sa Simbahan nga nagpunting sa pagpalambo og mas suod nga relasyon ngadto ni Jesukristo pinaagi sa pagsulod sa templo ug pagsalmot sa sagradong mga ordinansa ug mga pakigsaad. Dayon, mogawas sila sa templo nga malig-on inubanan sa nabag-o, napalambo, mas sanag nga pasalig sa pagserbisyo. Kini nga logo gihulma ug gisangkap isip usa ka pin alang sa mga lalaki, ug usa ka maanindot nga pendant sa mga sister. Kini ipanghatag isip timaan sa atong tinguha sa pagsinati sa reyalidad niini nga panan-awon sa atong mga kinabuhi.
Dili na kita yano lang mopahayag nga “Ako Moadto, Ako Moserbisyo” ug maghunahuna lang sa misyonaryo nga pagserbisyo. Uban niining gipatas-an nga panglantaw ug sa atong gipalambo nga pagsabot, kita karon mamahayag “Duol Ngadto kang Kristo, Ako Moadto” sa mga ordinansa sa templo ug pinaagi sa makaabag nga gahom niadto nga mga ordinansa ug mga pakigsaad “Ako Moserbisyo” sa Dios sa tibuok nakong kasingkasing. Kining gipatas-an nga panglantaw makahatag gayod og gahom niining bantogang nasod sa pagpadaghan sa atong full-time nga mga misyonaryo, apan makahatag usab kini og gahom kanato sa tanang paagi sa pagsunod sa ebanghelyo ni Jesukristo. Ang mga pamilya mahimong mas matinud-anon samtang sila maghiusa sa pag-apil sa mga ordinansa sa templo nga adunay komon nga tumong sa pag-angkon sa labing importante nga mga ordinansa sa templo, gani ang pagsilyo sa mga pamilya alang sa tanang kahangtoran. Madasig kita nga makabaton og calling ug mahimong mas mapasaligon ug matinguhaon sa pagserbisyo sa uban samtang kita mopalambo sa atong mga calling.
Ang mga t-shirt nga naghulagway sa bag-ong logo iapod-apod sa tanang aktibo nga kabatan-onan ug mga young single adult sa Pilipinas tali sa edad nga 12-30. Ang mga kolor sa mga kamiseta parehas sa mga kolor sa FSY nga gipili sa Simbahan alang sa 2023.
Uban sa mga T-shirt, ang mga pin ug mga pendant nga adunay logo niining gipatas-an nga panglantaw ipang-apod-apod sa tanang aktibo nga kabatan-onan ug mga hamtong sa tibuok Pilipinas. Kini nga mga timaan mao ang mga timailhan sa atong tinguha sa paghiusa ug pagpaduol ngadto sa Manluluwas.
Ang mga Santos nga Pilipino nahimong kahayag sa tibuok kalibotan sa pagtubag sa tawag sa pagserbisyo og full-time nga mga misyon. Bisan tuod nga nag-uswag na kita karon gamit ang bag-ong logo ug sa usa ka gipatas-an nga panglantaw, wala namo biyai ang dakong milagro sa kabatan-onan nga Pilipino nga mitubag sa tawag sa pagserbisyo og full time nga mga misyon. Si Presidente Nelson mideklarar niadtong Abril 2022, “Karong adlawa ako kusganong mopanghimatuod og balik nga ang Ginoo miawhag sa matag takos, makahimo nga batan-ong lalaki sa pagpangandam ug pagserbisyo sa misyon…Ang misyonaryo nga pagserbisyo usa ka responsibilidad sa pagkapari [alang sa batan-ong mga lalaki nga Santos sa Ulahing mga adlaw]…Alang kaninyo batan-on ug makahimo nga mga sister, ang usa ka misyon gamhanan usab, apan opsiyonal, nga oportunidad…Ang inyong matampo niini nga buhat nindot kaayo! Pag-ampo aron masayod kon ang Ginoo buot ba nga moserbisyo kamo og misyon, ug ang Espiritu Santo motubag sa inyong kasingkasing ug hunahuna.”6
Sa umaabot nga mga tuig, kon kita mopahiuyon sa atong pamahayag nga “Duol Kang Kristo: Ako Moadto, Ako Moserbisyo” usa ka adlaw kita makakita og napulo ka liboan ka mga Filipino nga magserbisyo og misyon ug atong mahinumdoman ang 4600 nga Misyonaryo nga Milagro ug malipayong mopahayag…usa kadto ka maayong pagsugod.
Si Presidente Nelson namahayag, “Ang templo mao ang labing importante nga bahin sa pagpalig-on sa atong hugot nga pagtuo ug espirituwal nga kalig-on tungod kay ang Manluluwas ug ang Iyang doktrina mao ang sentro nga bahin sa templo. Ang tanan nga gitudlo diha sa templo, pinaagi sa instruksiyon ug pinaagi sa Espiritu, makadugang sa atong pagsabot ni Jesukristo. Ang Iyang mahinungdanon nga mga ordinansa nagbugkos nato ngadto Kaniya pinaagi sa sagrado nga mga pakigsaad sa pagkapari. Dayon, kon kita motuman sa atong mga pakigsaad, Siya motuga nato sa Iyang makaayo, makapalig-on nga gahom.”7
Ang pagduol ngadto kang Kristo ug pag-adto sa templo konektado nga dili gyod mabulag, ug mao kini ang gusto natong isilsil sa mga batan-on samtang nangandam sila sa pag-adto ug pagserbisyo.