Digital Lamang
Unahon ang Unang Sugo
Ang Dios nagsugo nato sa paghigugma Kaniya tungod sa unsay Iyang nahibaloan nga mahimo niini alang kanato.
Ang matag usa sa tulo ka managsama og panglantaw nga mga Ebanghelyo—Mateo, Marcos, ug Lucas—nagsaysay sa usa ka pangutana nga gihatag ngadto ni Jesus mahitungod sa labing dakong sugo sa balaod. Sa Mateo, ang nangutana usa ka abogado nga dili maayo og motibo, nagtintal sa Ginoo (tan-awa sa Mateo 22:35–36). Sa Marcos, kini usa ka magtutudlo sa balaod ang nangutana, apan usa ka tawo kinsa sinsero nga gusto nga masayod (tan-awa sa Marcos 12:28–34). Sa Lucas, balik ta ngadto sa “usa ka abogado [kinsa] mibarog, ug mitintal kaniya” (Lucas 10:25).
Bisan pa sa akong propesyonal nga kaagi diha sa pamalaod, maglisod ko sa pagpanalipod sa abogado niini nga asoy. Apan ako mohatag kaniya og pasidungog sa pagpangutana, bisan pa sa iyang motibo, tungod kay ang tubag sa Manluluwas talagsaon ug tiunay kaayo. Pasalamatan usab nako siya sa iyang sunod nga pangutana—“Kinsa ba diay ang akong isigkatawo?” (Lucas 10:29)—nga misangpot ngadto sa makapatandog nga sambingay sa Manluluwas sa maayong Samaryanhon (tan-awa sa Lucas 10:30–37). Ang abogado mas daghan og nakat-onan kay sa iyang gitinguha, apan kita nakakat-on og butang nga bililhon kaayo.
Ang asoy ni Mateo sa tubag ni Jesus pamilyar ninyong tanan:
“Magtutudlo, unsa man ang labing dakong sugo sa balaod?
“Si Jesus mitubag, Higugmaa ang Ginoo nga imong Dios sa tibuok mong kasingkasing, sa tibuok mong kalag ug sa tibuok mong hunahuna.
“Kini mao ang una ug labing dakong sugo.
“Ang ikaduha nga labing importanteng sugo sama sa una: ‘Higugmaa ang imong isigkatawo sama sa imong kaugalingon.
“Nagsukad niining duha ka sugo ang tibuok nga balaod ni Moises ug ang mga pagtulon-an sa mga propeta (Mateo 22:36–40).
Sa paghigugma sa Dios sa tibuok kasingkasing, kalag, ug hunahuna, sila si Marcos ug Lucas nagdugang “ug sa tibuok mong kusog” (Marcos 12:30; Lucas 10:27).
Mohangyo ko ninyo sa paghunahuna sa ka halangdon sa duha ka labing dakong sugo diin “nagsukad niining duha ka sugo ug ang mga propeta” ug usab ngano nga unahon man ang unang sugo. Unsa ang kahulogan niana nga pagkahan-ay alang nato?
Ang ikaduha nga sugo usa ka mahinungdanong giya alang sa inter-aksiyon sa mga tawo. Hunahunaa unsa kaha ang kahimtang sa kalibotan kon ang ikaduha nga sugo gidawat ug gisunod sa tanan. Hunahunaa kon unsay dili mahitabo. Lakip sa ubang mga butang, walay bayolente nga krimen, walay pagpang-abuso, walay pagpangilad, walay pagpanglutos o pagpanghulga, walay pagpanglibak, ug wala gayoy gubat. Ang ikaduha nga sugo mao gayod ang Bulawanon nga Lagda: “Buhata ngadto sa uban ang buot ninyo nga ilang buhaton nganha kaninyo: kini ang kahulogan sa balaod ni Moises ug sa pagtulon-an sa mga propeta” (Mateo 7:12; tan-awa usab sa Lucas 6:31; 3 Nephi 14:12). Isip mga disipulo, kita kinahanglan nga magmabinantayon sa pagsunod niining ikaduha nga sugo pinaagi sa pagpakita og gugma ug empatiya ngadto niadtong gisulti sa Ginoo nga atong mga silingan—kana mao, ang tanan.
Sa pagsuporta “sa balaod ug sa mga propeta”—kanang hugpong sa kamatuoran ug mga sugo nga gihimo sa Dios ug gitudlo sa mga propeta—ang una ug ikaduha nga mga sugo gikinahanglan, nga magkatambayayong. Apan ngano nga ang una nga sugo ang labing importanting prayoridad? Dili mominos sa tulo ka rason ang moabot sa hunahuna.
Ang una mao ang pagkapundasyon nga matang niining unang sugo. Talagsaon ug importante sama sa ikaduha nga sugo, kini dili makahatag sa gikinahanglan nga pundasyon alang sa atong kinabuhi, ni kini gituyo. Ang pagsunod sa ikaduha nga sugo makapahimo nato nga maayong mga tawo, apan sa unsa nga katuyoan? Unsay tumong sa atong pagpakabuhi? Alang sa katuyoan, direksyon, ug kahulogan, kinahanglan nga kita motan-aw sa una ug dakong sugo.
Ang pag-una sa unang sugo dili makapakunhod o malimitahan ang atong abilidad sa pagtuman sa ikaduha nga sugo. Kondili, kini makapalambo ug makapalig-on niini. Kini nagpasabot nga kita mopalambo sa atong gugma pinaagi sa pag-angkla niini diha sa balaanong katuyoan ug gahom. Kini nagpasabot nga kita makabaton sa Espiritu Santo nga modasig nato sa mga paagi sa pagtabang nga dili gayod unta nato makita nga kita lang. Ang atong gugma sa Dios makapalambo sa atong abilidad sa paghigugma sa uban sa mas hingpit nga paagi tungod kay kita ingnon nga kauban sa Dios sa pag-atiman sa Iyang mga anak.
Ikaduha, ang pagbaliwala sa una nga sugo, o sa pagbali sa han-ay sa una ug ikaduha nga mga sugo, makahatag og peligro sa pagkawala sa balanse sa kinabuhi ug sa makadaot nga pagsimang gikan sa dalan sa kalipay ug kamatuoran. Ang gugma sa Dios ug pagtugyan ngadto Kaniya nagtanyag nga magmatngon batok sa atong kalagmitan sa pagdaot sa mga hiyas pinaagi sa pagduso niini sa hilabihan. Ang kapuangod alang sa kasakit sa atong silingan halangdon ug maayo, pananglitan, bisan kon ang pag-antos maoy resulta sa iyang kaugalingon nga kalapasan. Apan ang dili mapugngan nga kapuangod modala nato, sama sa anak nga lalaki ni Alma nga si Corianton, sa pagkuwestiyon sa kaangayan sa Dios ug sa sayop nga pagsabot sa Iyang kaluoy (tan-awa sa Alma 42:1).
Adunay mga tawo, pananglitan, kinsa nagtuo nga ang paghigugma sa uban nagpasabot nga kita kinahanglan nga motuis o mobaliwala sa mga balaod sa Dios sa paagi o mga paagi nga nag-awhag o nag-uyon sa sala. Si Elder Jeffrey R. Holland namulong niining sayop nga mga pagsabot sa dihang siya mitudlo:
“Mao nga kon ang gugma mao ang atong motto, nga mao gayod, nan pinaagi sa Iyang pulong nga maoy simbolo sa gugma kinahanglan nga atong isalikway ang kalapasan ug awhagon ang uban sa pagsunod niini. … Klaro nga nakasabot si Jesus kon unsa ang nakalimtan sa kadaghanan sa atong moderno nga kultura: nga dunay importante nga kalainan tali sa sugo sa pagpasaylo sa sala (diin anaa Kaniya ang walay kataposan nga kapasidad sa pagbuhat) ug pagpasidaan batok sa pag-uyon niini (diin wala gayod Niya buhata bisan makausa).”1
Sama sa gipasabot ni Alma ngadto ni Corianton, kita nagkinahanglan sa kaangayan ug kaluoy, ug pinaagi lamang sa gugma sa Dios diha sa gasa sa Iyang Anak ug sa Iyang Anak nga gasa sa paghinulsol nga kita makaangkon sa duha (tan-awa sa Alma 42:13–15, 22–24).
Ikatulo, ang una nga sugo kinahanglan gayod nga unahon tungod kay ang pagsulay sa paghigugma nga wala makabase sa kamatuoran sa Dios makahatag og kadaot sa tawo o sa mga tawo nga atong gipaningkamotan nga tabangan. Si Presidente Russell M. Nelson mitudlo:
“Tungod kay ang Amahan ug ang Anak nahigugma kanato uban sa walay kinutoban, hingpit nga gugma ug tungod kay nasayod Sila nga kita dili makakita sa tanan nga Ilang nakita, Sila mihatag kanato og mga balaod nga mogiya ug mopanalipod kanato.
“Adunay lig-on nga koneksyon tali sa gugma sa Dios ug sa Iyang mga balaod.”2
Nan, mao kadto ang tulo ka rason nganong unahon ang unang sugo, apan tingali kita kinahanglan nga molista pa og usa nga sa tinuod nga igo na mismo: unahon ang unang sugo tungod kay ang Dios mibutang niini nga maoy mag-una.
Ang una ug dakong sugo naghatag og tinuod nga ideya alang sa kinabuhi. Si Presidente Ezra Taft Benson sa makausa nakaobserbar:
“Kon atong unahon ang Dios, ang tanan nga butang mapahimutang sa tukma nilang dapit o mawala kini sa atong kinabuhi. Ang atong gugma sa Ginoo modumala sa mga pag-angkon alang sa atong pagbati, sa gipangayo sa atong panahon, sa mga kaayohan nga atong gitinguha, ug sa pagpahimutang sa atong mga prayoridad.”3
Ang Gugma sa Dios alang Kanato: Naghatag Kanato og “Kahigayonan sa Pag-uswag Sama sa Iyang Kaugalingon”
Ang Dios, kinsa misugo nato sa paghigugma Kaniya, mao ang unang nahigugma nato (tan-awa sa 1 Juan 4:19). Hunahuna sa makadiyot unsa ang kahulogan sa gugma sa Dios alang ninyo ug nako niining higayona sa atong pagpakabuhi ug unsay kahulogan niini. Bisan sa wala pa ang atong espirituhanon nga lawas, kita anaa na isip wala malalang nga salabotan o mga salabotan. Ang Dios mikanaog taliwala sa mga salabotan ug mihimo og plano diin kita mahimong mouswag. Diha sa mga pulong ni Propeta Joseph Smith:
“Ang Dios mismo sa kaugalingon, nakakita nga siya anaa sa taliwala sa mga espiritu [o mga salabotan] ug kahimayaan, tungod kay siya mas labaw pa ka maalamon, nakakita nga angayan sa pagmugna og mga balaod diin ang uban makabaton og kahigayonan sa pag-uswag sama sa iyang kaugalingon.”4
Sa inyong nahibaloan, ang Iyang plano naglakip sa atong pagkahimong Iyang espiritu nga mga anak, nga usa ka mahimayaong lakang, sa atong “kinabuhi sa wala pa dinhi sa yuta” (Abraham 3:26). Dayon Iyang gihimo ang paagi nga kita makabaton og pisikal nga lawas dugang sa espirituwal nga lawas—ang “kinabuhi dinhi sa yuta” (Abraham 3:26)—importante sa pag-angkon sa kahingpitan sa pagkatawo ug himaya nga natagamtaman Mismo sa Dios. Kini nagkinahanglan sa paglalang sa yuta isip mao ang dapit sa “kahimtang sa pagsulay” (Alma 12:24), usa ka espirituwal ug pisikal nga kamatayon, ug usa ka Manluluwas nga motubos ug mobanhaw nato. Niining tanan, ang Dios mihatag nato og kabubut-on sa pagpili ug miandam og mas dako ug mas gamay nga mga sangpotanan ug mga panalangin sumala sa atong pilion.
Sa ingon, sugod sa atong unang kahimtang isip mga salabotan, ang atong Langitnong Amahan misentro sa Iyang Kaugalingon ug sa Iyang buhat ngari kanato—sa atong pagka-imortal ug kinabuhi nga dayon. Siya nakakita niini isip Iyang buhat ug himaya sa pagbuhat sa ingon (tan-awa sa Moises 1:39). Dili ako motuo nga Siya mobuhat sa bisan unsa niini, mao nganong Siya mihimo niini alang kanato? Unsa ang Iyang motibo? Aduna bay lain gawas sa gugma? Klarong ebidensya niini mao ang gasa sa Iyang Anak:
“Kay gihigugma pag-ayo sa Dios ang kalibotan ug tungod niini gihatag niya ang iyang bugtong Anak, aron ang tanan nga motuo kaniya dili malaglag kondili makabaton hinuon sa kinabuhing dayon” (Juan 3:16).
Dako ba kaayo ang paghangyo nga agig balos kita mosentro sa atong mga kinabuhi diha sa Dios ug mohigugma Kaniya sama sa Iyang paghigugma kanato, uban sa atong tibuok kasingkasing, kalag, hunahuna, ug kusog? Nganong mobatok man kita sa Iyang gugma alang nato ug pugngan ang atong kaugalingong gugma gikan Kaniya nga nakahibalo nga ang atong gugma sa Dios mao man ang yawe sa atong kaugalingong kalipay?
Ang Atong Gugma alang sa Dios: Ang Ehemplo sa Manluluwas
Kon kita mohigugma sa Dios sa tibuok pagbati sa atong kasingkasing, kalag, hunahuna, ug kalig-on, ang atong pokus sa kinabuhi mao ang pagtuman sa Iyang mga tinguha. Walay tawo, dayag lang, ang nakahimo niana nga mas hingpit kay sa atong sulundon, si Jesukristo, kinsa sa makausa nakaobserbar, “Ug siya nga nagpadala kanako nag-uban kanako. Wala ako niya pasagdi nga mag-inusara kay nagbuhat man ako kanunay sa makapahimuot kaniya” (Juan 8:29). Ang Iyang labing taas nga prayoridad mao ang paghimaya sa Amahan.
Kanang labing taas nga prayoridad, kanang labing taas nga kamaunongon, nakahimo ni Jesus sa pagkakita sa Iyang Pag-ula hangtod kini nahuman, sa pag-inom sa labing mapait nga mga kopa hangtod sa kataposan gayod nga tulo. Niining labing dako (ug sa tinuod dili ordinaryo) nga sakripisyo, ang grabing pag-antos sa Manluluwas nga “nakapahimo sa akong kaugalingon,” Siya miingon, “gani ang Dios, ang labing halangdon sa tanan, sa pagkurog tungod sa kasakit, ug sa pag-agas sa dugo sa matag lungag sa panit, ug sa pag-antos sa lawas ug sa espiritu—ug buot nga Ako unta dili moinom sa mapait nga kopa, ug mobiya” (Doktrina ug mga Pakigsaad 19:18). Bisan pa niana, ang Iyang gugma ug tinguha sa paghimaya sa Amahan mas milabaw kay sa dili matugkad nga pag-antos. Diha sa kaugalingong mga pulong sa Ginoo, “Bisan pa niana, himaya ngadto sa Amahan, ug Ako nakaambit ug nakahuman sa akong mga pagpangandam alang sa mga katawhan” (Doktrina ug mga Pakigsaad 19:19).
Samtang si Kristo diha sa krus, ang atong kapalaran, ang atong pagka-imortal, ug ang atong kinabuhing dayon nagdepende usab niini, ug ang butang nga nakapalihok sa timbangan nga pabor nato sa pagtino kon ang atong pagpakabuhi ba gayod adunay kahulogan mao nga si Jesukristo nahigugma sa Amahan uban sa iyang tibuok kasingkasing, kalag, hunahuna, ug kusog.
Dayon diha ni Kristo atong makaplagan ang atong sundanan: pagkamaunongon ngadto sa Dios labaw sa tanan ug labaw ni bisan kinsa; ang pagkasayod sa atong pagkamaytulubagon ngadto Kaniya, sa tanang higayon ug diha sa tanang butang; ug tinuorayng tinguha nga makahibalo ug mobuhat sa Iyang kabubut-on. Ania ang atong giya sa paghimo og mga desisyon. Kon atong unahon ang paghigugma sa Dios, makita nato ang kalibotan ug ang atong kinabuhi pinaagi sa Iyang mga mata kay sa pinaagi sa mga mata ni bisan kinsang tawo (bisan ang tig-impluwensiya sa social media).
Mao nga, unsa kaha ang mahitabo kon unahon ang unang sugo? Dili nako malista ang tanan nga nalakip sa paghigugma sa Dios labaw sa tanan, apan ako gusto nga mohulagway og pipila ka ehemplo.
Ang Pag-una sa Unang Sugo: “Tumana Ninyo ang Akong mga Sugo”
Sa tinuod usa sa labing una nga mga aspeto sa pagtuman sa unang sugo mao ang higpit nga pagsunod sa Dios. Sama sa gisulti sa Manluluwas, “Kon nahigugma kamo kanako, tumana ninyo ang akong mga sugo” (Juan 14:15; tan-awa usab sa Doktrina ug mga Pakigsaad 42:29). Si Jesus higpit nga mituman sa matag usa ug sa tanang sugo sa Iyang Amahan ug mipakita nato unsa ang kahulogan sa pagkamasulundon ngadto sa Dios diha sa tinuod nga kinabuhi.
Usa sa akong maayong higala sa makausa mikomentaryo mahitungod sa atong pagkahilig sa pagpangatarongan kon kini kabahin sa mga sugo sa Dios. Siya nakamatikod, pananglitan, gikan sa iyang mga obserbasyon ug sa iyang kaugalingon nga kasinatian, nga usa ka pangutana nga nagsugod og “Ang Ginoo magpakabana ba gayod kon ako … ?” kanunayng tubagon og “Dili.” Sayon ra nga paagi ang pagpamalibad sa hapit tanang butang, kon kita makakombinser sa atong kaugalingon nga ang Ginoo dili gayod magpakabana mahitungod sa usa ka butang nga gamay ra kaayo sama sa atong gituohan. Apan ang akong higala nakahibalo nga kini sayop nga pangutana. Dili kini kon ang Ginoo magpakabana ba apan kon kita ba mohimo sa unsay atong gisaad. Ang pangutana mao “Unsa nga timailhan ang akong ikahatag ngadto sa Dios kalabot sa akong gugma alang Kaniya?” o “Unsa ang ipasabot sa pagtuman sa Iyang mga sugo ug mga pakigsaad uban ang kasakto ug dungog?”
Dayag lang nga usa ka labing importante nga mga aspeto sa pagtuman sa unang sugo mao ang pagtuman sa ikaduhang sugo sa paghigugma sa atong mga kaigsoonan. Sama sa gipahayag ni Juan, “Kon may moingon, “Gihigugma ko ang Dios,” apan nagdumot diay sa iyang isigkatawo, bakakon siya. Kay unsaon man niya paghigugma sa Dios nga wala niya makita kon wala siya maghigugma sa iyang isigkatawo nga makita niya?” (1 Juan 4:20). Ug kita aduna sa pamilyar nga mga pulong sa Ginoo: “Kon maghigugmaay kamo, mahibalo ang tanan nga kamo akong mga tinun-an.” (Juan 13:35).
Ang Pag-una sa Unang Sugo: “Atimana ang Akong mga Karnero.”
Duol kaayo nga kaalyado sa disiplinado nga pagtugyan ngadto sa mga sugo sa Dios mao ang pagserbisyo ngadto Kaniya ug sa Iyang kawsa. Ngadto ni Pedro, ug ngari kanato, ang Ginoo midirekta sa Iyang katulo gisubli nga pangutana: “Gihigugma mo ba ako?” (Juan 21:15–17). Ug, sama ni Pedro, ang atong tubag kinahanglan nga, “Oo, bisan labaw pa sa akong trabaho o bisan unsa o ni bisan kinsa.” Ug madungog nato ang tingog sa Magbalantay sa Karnero: “Atimana ang akong mga nating karnero” (Juan 21:15); “atimana ang akong mga karnero” (Juan 21:16–17).5
Ako masaligon nga ang atong Langitnong Amahan ug ang Iyang Pinalangga nga Anak mahimuot sa inyong indibidwal nga pagkamabination, bisan ingon og limitado o dili importante kini diha sa dakong panginahanglan sa kalibotan. Ang matag buhat ug ang matag halad importante. Ako usab masaligon nga Sila nahimuot sa unsay atong gihimo sa kinatibuk-an isip Ang Simbahan ni Jesukristo sa mga Santos sa Ulahing mga Adlaw ug sa pagpakig-uban sa laing mga tawo. Isip usa ka ehemplo, ang tabang aron mahupay ang pag-antos nga mitumaw tungod sa gubat karon nga nagpunting sa Ukraine tinuod gayod nga Kristohanon. Kanunay kitang naningkamot sa pagtutok sa dinaliang panginahanglan ug dili pahibaloon ang tuong kamot unsa ang gihimo sa walang kamot, apan ako manghinaot nga isip usa ka Simbahan kita makahatag og komprehensibo nga mga asoy sa pagpadayon aron kamo makahibalo pa og dugang mahitungod sa unsay inyong gibuhat isip kabahin sa lawas ni Kristo sa pag-atiman sa Iyang mga karnero.
Ang pagtuman sa unang sugo nagpasabot usab sa pagpadayon sa kawsa sa Ginoo dinhi sa yuta, pagtabang sa pagpahinabo sa kinabuhi nga dayon sa mga anak sa atong Amahan. Wala koy laing mahunahunaan nga mas maayo nga ehemplo kay sa misyonaryo nga pagserbisyo nga gihatag o ihatag pa sa kadaghanan kaninyo. Kami diha sa Napulog Duha nangandoy sa matag oportunidad nga among maangkon nga makauban ang mga misyonaryo tungod sa makabayaw, makabag-o sa espiritu nga among bation uban niadtong kinsa sa dinaliang paagi nalakip sa pag-atiman sa mga karnero ug sa mga nating karnero sa Dios.
Sa atong panahon, ang pagpundok sa katawhan sa pakigsaad sa Dios dinhi sa yuta ug didto sa kalibotan sa espiritu, sama sa gipasabot ni Presidente Russell M. Nelson, mao ang usa ka importante nga bahin sa unsay gipasabot alang nato sa pagtuman sa una ug dako nga sugo.
Ang Pag-una sa Unang Sugo: Motawag Kaniya, Magbusog sa Iyang mga Pulong
Ang laing paagi nga atong unahon ang unang sugo medyo klaro. Kini mao ang pagtawag sa Dios pinaagi diha sa pag-ampo ug sa pagbusog sa Iyang pulong alang sa pagsabot ug direksyon. Gusto kita nga mahibalo ug mohimo sa unsay Iyang gusto. Gusto kita nga mahibalo sa unsay Iyang nahibaloan. Gusto kita nga makat-on sa tanan nga Iyang itudlo nato isip Iyang mga disipulo. Gusto kita og personal nga pagpadayag.
Si Amulek nag-awhag nato sa pagpangamuyo ngadto sa Dios pinaagi sa ngalan ni Kristo alang sa kaluoy, sa pagpangamuyo alang sa atong panimalay, ug sa pagpangamuyo alang sa atong kaumahan ug kahayopan. Miawhag siya nato sa pagpangamuyo ngadto sa Dios batok sa gahom sa atong mga kaaway ug sa impluwensiya sa yawa. “Oo, ug kon kamo dili mangamuyo ngadto sa Ginoo, himoa nga ang inyong mga kasingkasing puno, magpadayon sa pag-ampo ngadto kaniya sa kanunay alang sa inyong kaayohan, ug usab alang sa kaayohan niadto kinsa naglibot kaninyo.” (Alma 34:27).6
Si Nephi misulti nato sa “pagbusog sa mga pulong ni Kristo; kay tan-awa, ang mga pulong ni Kristo magtug-an kaninyo sa tanan nga mga butang nga inyong buhaton” (2 Nephi 32:3). Kini usa ka talagsaong pagtuga diha sa atong panahon nga makabaton og daghan kaayo sa sinulat nga pulong sa Dios nga maanaa sa tumoy sa atong mga tudlo—kanunay nga magamit nato sa tagsa-tagsa—ingon man usab ang pagtulon-an sa mga propeta ug mga apostoles karon nga gimantala sa lain-laing mga han-ay ug mga pinulongan. Dili sama sa bisan unsang laing panahon sa kasaysayan sa kalibotan. Pangutan-a ang imong kaugalingon, Unsa ang tumong sa Dios niini?
Ganahan ko sa pag-ampo. Ganahan ko sa mga kasulatan. Gusto nako ang tanan nga kahayag ug kahibalo nga andam nga ihatag sa Langitnong Amahan kanako. Nasayod ko nga Siya walay gipili nga mga tawo ug nga Siya mohatag kanimo ug kanako sa tanan nga kita moandam sa pagdawat alang sa atong mga kaugalingon. Higugmaa ang Dios pag-ayo aron inyong mapadayon ang kanunay nga pagpakigsulti Kaniya diha sa mga paagi nga Iyang gi-orden. Ug hinumdomi ang ehemplo ni Presidente Nelson—pagbaton og rekord sa unsay inyong madawat pinaagi sa Balaan nga Espiritu ug sunda sa saktong paagi.
Pag-una sa Unang Sugo: Tulubagon ngadto sa Dios
Tugoti ko nga mohisgot og usa pa ka dugang nga paagi nga kita makabalaan sa unang sugo isip una sa atong kinabuhi. Kini mao ang pagpuyo uban ang pagbati sa pagkamaytulubagon ngadto sa Dios—pagkamaytulubagon alang sa direksyon sa atong mga kinabuhi ug alang sa matag adlaw sa atong mga kinabuhi. Kana nagpasabot sa pagbatok ug pagbuntog sa tintasyon, paghinulsol ug pagpasaylo, pagpakigkombati sa kahakog, pagdala diha kanato sa ngalan ni Kristo, ug pagpalambo og kinaiya ni Kristo. Kini nagpasabot sa pagbantay bisan sa atong mga hunahuna ug sa atong mga pulong ingon man usab sa atong mga buhat (tan-awa sa Mosiah 4:30 ug Alma 12:14). Kini nagpasabot sa pagtugyan “ngadto sa mga pagdani sa Balaang Espiritu” ug mahimong “sama sa usa ka bata, manunuton, maaghop, mapainubsanon, mapailubon, puno sa gugma, mauyunon sa pagdawat sa tanan nga mga butang diin ang Ginoo makakita nga angay ipahamtang ngari kanato, bisan ingon sa usa ka bata nga motugyan sa iyang kaugalingon ngadto sa iyang amahan.” (Mosiah 3:19).
Kini dili usa ka makapabug-at, makapaluya nga matang sa pagkamaytulubagon. Hinoon, kini mao ang pagtamod sa usa ka maalamon, interesado, ug maamumahon nga Amahan kinsa nasayod sa dalan sa katumanan ug kamaya. Kini mao ang pag-ila nga Siya mihatag og oportunidad alang nato nga dili mahimong mamugna nga kita ra—ug usa nga dli nato maangkon kon wala ang Iyang tabang. Kini mao ang “[pag]puyo sa pagkamapasalamaton matag adlaw, alang sa daghan nga mga kaluoy ug mga panalangin diin ang [Dios] mitugyan nganha [kanato].” (Alma 34:38). Ug kini anaa sa konteksto niining pagkamaytulubagon nga kita mobati sa maanindot nga kahimuot sa Dios ngari nato. Kita makasabot nga Siya malipay bisan sa labing gamay nga mga paningkamot nga atong himoon sa paghigugma Kaniya uban sa atong tibuok nga kasingkasing, kalag, hunahuna, ug kusog. Unsa pa ang mas dako nga kasiguroan ug kalinaw ang inyong maangkon kay sa pagsaksi sa Balaan nga Espiritu ngadto sa inyong espiritu nga ang inyong Langitnong Amahan ug ang inyong Manunubos nahimuot kaninyo ug sa dagan sa inyong kinabuhi?
Ang punto mao nga ang Dios nagsugo nato sa paghigugma Kaniya tungod sa unsay Iyang nahibaloan nga mahimo niini alang kanato. Siya misugo nato sa paghigugma sa usag usa alang sa samang rason. Ang gugma sa Dios mousab nato. Ang gugma sa Dios mousab sa atong gugma alang sa usag usa. Kini nga gugma gikinahanglan alang sa atong pagkaila Kaniya, ang bugtong tinuod nga Dios, ug ni Jesukristo nga Iyang gipadala (tan-awa sa Juan 17:3). Kini ang yawe nga kita mahimong sama Kaniya.
Nasayod ko nga ang gugma sa Langitnong Amahan alang nato tinuod ug walay kataposan. Kini labing lig-on nga mapakita pinaagi sa grasya sa Iyang Anak, nga si Jesukristo. Ako mopanalangin ninyo nga ang gugma sa Dios mopuno ninyo samtang kamo mahigugma ug maningkamot sa pagserbisyo Kaniya. Ako mopanalangin ninyo nga kamo mobati sa Iyang gugma ug nga kini mahimong labing gamhanan nga impluwensya sa inyong kinabuhi. Ako nasayod ug makasiguro kaninyo nga ang inyong Langitnong Amahan buhi, sama sa Iyang Anak, ang atong nabanhaw nga Ginoo, ug ingon man ang Iyang mensahero sa grasya, ang Balaan nga Espiritu. Ako nasayod ug nag-ampo nga kamo hingpit nga makahibalo niini.