“Diin ang Ginoo Nagkinahanglan Nako,” Liahona, Peb. 2023.
Mga Hulagway sa Hugot nga Pagtuo
Diin ang Ginoo Nagkinahanglan Nako
Ako naglaom nga matawag ngadto sa Africa sa akong misyon, apan ang Ginoo nagkinahanglan nako sa laing bahin sa Iyang ubasan.
Litrato pinaagi ni Cody Bell
Ang akong mga ginikanan parehong mipasakop sa Ang Simbahan ni Jesukristo sa mga Santos sa Ulahing mga Adlaw didto sa Kenya, ug parehong nagsilbi og full-time nga misyon. Sukad sa akong pagkabata, sila mitudlo kanako nga kinahanglan usab akong moserbisyo og misyon. Naghinam-hinam ko niini.
Siyam ka bulan sa wala pa nako madawat ang akong tawag, mibalhin ko gikan sa Kenya ngadto sa New Jersey, USA, diin nagtrabaho ang akong mama. Sa dihang gipasa nako ang akong aplikasyon sa misyon, naghunahuna ko nga nindot nga mobalik sa Africa sa akong misyon. Sa pagkatinuod, naglaom ko nga matawag didto.
Apan sa dihang nadawat nako ang akong tawag sa misyon, nahibaloan nako nga padulong ko sa Washington Spokane Mission sa Estados Unidos. Ako wala gani makahibalo kon asa kana, apan ang unang gisulti sa Espiritu ngadto sa akong hunahuna mao ang, “Kana mao diin ang Ginoo nagkinahanglan kanimo.”
Sa dihang naabot ko sa Spokane pipila ka bulan human niana, ang presidente sa misyon mitimbaya kanako ug nangutana: “Ako nagtan-aw sa imong aplikasyon. Makaistorya ka ba gayod og Swahili?”
“Oo,” ako mitubag. “Ako nagtubo nga nag-istorya og Swahili ug Iningles.”
“Nan, karon,” siya miingon, “ang imong misyon nausab gikan sa Iningles nga sinultihan ngadto sa Swahili nga sinultihan.”
Siya nag-ampo na alang sa usa ka misyonaryo nga makaistorya og Swahili. Ang pipila ka elder sa misyon misulay na gani og kat-on og Swahili sa ilang kaugalingon. Ako sa wala madugay nakahibalo kon ngano.
Ang Spokane midawat og dako nga grupo sa mga kagiw gikan sa mga nasod sa silangang Africa nga mao ang Tanzania, Kenya, Burundi, Rwanda, ug Uganda. Daghan niadto nga mga kagiw orihinal nga naggikan sa Democratic Republic of the Congo. Ang ilang Swahili lahi og gamay sa akong giistorya, apan magkasinabtanay kami sa usag usa. Ako nahitabo nga naggugol sa akong tibuok misyon diha sa mao ra nga ward sa Spokane nga nagtudlo niadtong mga kagiw.
Ang Gugma Mao ang Labing Labaw nga Butang
Ang mga miyembro sa Simbahan kasagaran moingon, “Ang mga tawo dili magpakabana kon unsa kadako ang imong nahibaloan hangtod nga sila makahibalo kon unsa kadako ang imong pagpakabana.” Atol sa akong misyon, akong nakat-onan kon unsa ka tinuod kana nga panultihon ngadto sa kalamposan sa usa ka misyonaryo.
Sa ilang mga nasod nga gigikanan, daghan nga mga pamilya sa mga kagiw nga among gitudloan ang nakakita sa ngil-ad nga mga butang diha sa kagubot ug gubat nga lisod hunahunaon. Sila tinud-anay nga nakasaksi og kasilag ug unsa ang daotang mga butang nga ang mga tawo makabuhat ngadto sa uban. Daghan ang nawagtangan og paglaom sa katawhan ug kinahanglan nga molayas sa ilang mga panimalay.
Sa dihang kaming mga misyonaryo nagsugod sa pagtudlo nila, dili gayod ang gidaghanon sa among nahibaloan sa ebanghelyo ang nakatabang nila nga moduol ngadto kang Kristo. Kini mas anaa sa unsa kadako nga kami ug ang mga miyembro sa ward nagpakita nila og Kristohanong gugma. Sa dihang kami mipakita nila og gugma ug miamuma kanila, sila mibati na usab og paglaom. Ilang nakita nga aduna pay maayo nga mga tawo sa kalibotan ug nga ang maayo nga mga tawo nga ilang naila-ila diha sa ward nalambigit ngadto sa ebanghelyo ni Jesukristo. Sila gusto nga mobati niana nga gugma, mahimong kabahin niini, aron nga sila moadto sa simbahan ug mobalik sa simbahan.
“Ang inyong simbahan puno sa gugma,” usa ka tawo nga among gitudloan ang misulti nako.
Bisan og wala pa gani kami makapangayo sa ilang tabang sa pagpakigdait, ang mga miyembro sa Lincoln Heights Ward, nga nag-atiman sa grupo sa mga Swahili, mangutana kon unsa ang ilang mahimo. Ang mga pamilya sa mga kagiw kasagaran moingon kanamo, “Kining tawhana mitabang namo niini nga butang ug kanang tawhana mitabang namo niana nga butang.” Ang ward gani nagpasiugda og Sunday School sa Swahili.
Nindot kaayo nga makita ang mga miyembro sa ward nga nahigugma sa mga African diha sa Simbahan. Ang gugma mao ang labing dakong butang nga migiya sa among kalamposan taliwala sa mga Swahili. Pipila ka miyembro mopasakay padulong sa simbahan, ang uban mopadayon sa ilang panimalay og mga pamilya, ug ang uban mohimo og mga butang alang sa mga pamilya nga dili magpahibalo. Ug ang bishop sa ward, si Philip Huber, kinsa naningkamot og maayo nga makat-on og Swahili, anaa kanunay nga nagpakita usab sa iyang gugma ug suporta. Dili na ko mangayo pa og mas labaw pa nga ward nga pakigtambayayongan.
Kini Ang Iyang Buhat
Kitang tanan mga anak sa Dios. Siya nakaila kanato ug mogamit kanato diha sa mga dapit diin kita mas makaserbisyo Kaniya gamit ang atong talagsaon nga mga abilidad. Kini ang Iyang buhat. Dili kini atong buhat. Siya mobutang kanato diin Siya labing nakahibalo. Kon ang mga misyonaryo makadawat sa ilang tawag, dili tingali sila makaadto diin sila gustong moadto, apan ang Ginoo sigurado nga mopadala nila sa diin gusto Niya nga adtoan nila. Ang dapit nga Iyang gipadad-an nila mao ang yuta diin Siya nag-andam og mga tawo nga modawat nila.
Sa dihang miabot ko sa Spokane, gibati nako nga dili na kinahanglan nga moadto pa ko sa Africa. Sa Spokane, ako mibati nga mora og gidala ko sa gamay nga Africa sa America.
Usahay maghunahuna ko kabahin sa akong misyon ug moingon, “Kana dako ra kaayo para ako mahimong kabahin. Ako tinud-anay ba gayod nga mahimong kabahin niana?”
Ako nahimong mapainubsanon ug mapasalamaton sa paghunahuna nga ako kabahin.