Mga Sukaranan sa Ebanghelyo

Mga Kapanguhaan alang sa Kabatan-onan ug Kabataan

mga ginikanan nga nagbasa sa mga kasulatan uban sa anak nga lalaki

Ang mga ginikanan adunay nag-unang responsibilidad sa pagtudlo sa ilang mga anak mahitungod ni Jesukristo ug sa Iyang ebanghelyo. Ang Simbahan ni Jesukristo sa mga Santos sa Ulahing mga Adlaw adunay mga organisasyon, mga programa, ug uban pa nga mga kapanguhaan aron matabangan ang mga ginikanan sa ilang mga paningkamot. Magkauban, ang mga ginikanan, mga lider sa Simbahan, ug ang mga higala makatabang sa tanang kabataan ug mga batan-on sa pagduol ngadto ni Kristo.

Mga bata sa Primary

Litrato sa mga bata sa Primary pinaagi ni Ben Johnson

Primary

Ang Primary mao ang organisayon sa Simbahan alang sa kabataan nga nag-edad og 18 ka bulan hangtod 11 anyos. Diha sa Primary, ang kabataan magkat-on mahitungod ni Jesukristo ug sa Iyang ebanghelyo pinaagi sa mga leksiyon, musika, ug mga kalihokan. Ang Primary makatabang sa kabataan nga mabati ang gugma sa Dios alang nila.

Mga Klase sa Korum sa Aaronic nga Pagkapari ug sa Young Women

Sugod sa Enero sa tuig nga ang kabataan mag-edad og 12, mobalhin sila gikan sa Primary ngadto sa mga klase sa mga korum sa Aaronic nga Pagkapari (alang sa mga lalaki) ug sa Young Women (alang sa mga babaye). Diha sa ilang mga korum ug mga klase, ang kabatan-onan magpadayon sa pagpalig-on sa ilang mga pagpamatuod ug pagserbisyo sa uban.

mga kamot nga nagdrowing og usa ka hulagway

Programa sa Kabataan ug Kabatan-onan

Sa Iyang pagkabatan-on, si Jesus “mitubo sa kaalam ug sa gidak-on ug sa kahimuot kaniya sa Dios ug sa tawo” (Lucas 2:52). Ang programa sa Kabataan ug Kabatan-onan nagtabang sa mga miyembro sa Simbahan sa pagsunod sa ehemplo ni Kristo. Sila magkat-on ug molambo diha sa tanang aspeto sa ilang kinabuhi—sa espirituwal, sosyal, pisikal, ug intelektuwal nga paagi.

Mga Magasin sa Simbahan

Ang magasin sa Simbahan alang sa kabataan mao ang Higala nga magasin. Ang Alang sa Kalig-on sa mga Kabatan-onan mao ang magasin alang sa kabatan-onan. Kini nga mga magasin naglakip og mga istorya, mga pagtulon-an, ug mga kalihokan nga gisulat alang lamang sa kabataan ug mga batan-on.

hapin sa giya nga basahon sa Spanish

Alang sa Kalig-on sa mga Kabatan-onan nga Giya nga Basahon

Ang For the Strength of Youth: A Guide for Making Choices [Alang sa Kalig-on sa mga Kabatan-onan: Usa ka Giya alang sa Paghimo og mga Pagpili] nagtudlo sa kabatan-onan mahitungod sa mga kamatuoran sa ebanghelyo. Nagtudlo kini kanila kon unsaon sa paghimo og mga desisyon nga makatabang nila sa pagsunod ni Jesukristo. Naglakip usab kini og mga tubag sa mga pangutana sa kabatan-onan kon unsaon pagsunod sa ebanghelyo.

Gospel Library

Ang Gospel Library adunay daghang digital nga mga kapanguhaan, lakip na sa mga video, mga musika, mga istorya diha sa mga kasulatan, ug mga kalihokan. Naglakip usab kini og mga kapanguhaan aron matabangan ang mga ginikanan ug mga lider sa pagtudlo sa mga baroganan sa ebanghelyo. Kini nga mga kapanguhaan makita diha sa Gospel Library sa ChurchofJesusChrist.org ug diha sa Gospel Library nga app.

batan-ong lalaki nga nagbasa og mga kasulatan

Mga Komperensiya sa AKK [FSY]

Sa sinugdanan sa tuig nga sila mag-edad og 14, ang kabatan-onan dapiton sa pagtambong sa For the Strength of Youth (FSY) nga mga komperensiya. Kini nga mga panghitabo naglakip og mga kalihokan ug mga klase nga makatabang sa pagpalig-on sa hugot nga pagtuo diha ni Jesukristo ug makatabang sa kabatan-onan nga molambo sa espirituwal, sosyal, pisikal, ug intelektuwal nga paagi.

Gikan sa mga Kasulatan

Ang kabataan mobati og kalinaw kon kita motudlo nila mahitungod sa Dios (tan-awa sa Isaias 54:13; 3 Nephi 22:13).

Ang mga ginikanan adunay responsibilidad sa pagtudlo sa ilang mga anak aron makasabot sa ebanghelyo (tan-awa sa Doktrina ug mga Pakigsaad 68:25).

Ang mga ginikanan gisugo sa pag-amuma sa ilang mga anak “diha sa kahayag ug kamatuoran” (Doktrina ug mga Pakigsaad 93:40).

Digital nga mga Kapanguhaan alang sa Kabataan

Mga istorya diha sa mga kasulatan (scripturestories.ChurchofJesusChrist.org): Mangita sa koloranan nga mga pahina, mga video, ug mga istorya diha sa mga kasulatan nga gisulat alang sa batan-on nga mga magbabasa.

Mga video (ChurchofJesusChrist.org/children/videos): Motan-aw sa video alang ug mahitungod sa kabataan.

Koleksiyon alang sa kabataan diha sa Gospel Library: Diha sa app ug diha sa ChurchofJesusChrist.org, ang Gospel Library nga koleksiyon ubos sa “Kabataan” naglangkob og mga musika, mga video, mga istorya, ug uban pa nga mga kalihokan.

Pagkaplag pa og Dugang

Kon kamo adunay mga pangutana mahitungod sa mga kapanguhaan sa Simbahan alang sa kabataan ug kabatan-onan, mahimo kamong makigsulti sa inyong tigpangalagad nga mga brother o mga sister, sa inyong mga lider sa ward o branch, o sa mga misyonaryo. Makakita usab kamo og daghang kapanguhaan diha sa ChurchofJesusChrist.org.