Mga Baroganan sa Pagpangalagad

Pagpangalagad uban ang Pagkamapainubsanon

Ang pag-ugmad og mas dako nga pagkamapainubsanon makapalambo sa atong abilidad sa pagpangalagad sama sa gibuhat sa Manluluwas.

Kita mas mahisama sa atong Manluluwas samtang kita magkat-on sa pagpangalagad sama sa Iyang gibuhat. Gamit ang mga ehemplo ni Kristo ug sa Iyang mga disipulo diha sa Bag-ong Tugon, atong makat-onan kon unsaon pagpalambo og Kristohanon nga mga kinaiya nga makatabang nato diha sa atong mga paningkamot sa pagpangalagad sama sa Manluluwas.

Si Juan nga nagbunyag ni Jesus

John Baptizing Jesus [Si Juan nga Nagbunyag ni Jesus], ni Harry Anderson

Si Juan Bautista Usa ka Ehemplo sa Pagkamapainubsanon

Si Juan Bautista nakasinati og dakong kalamposan sa iyang pagpangalagad. Daghan siya og nadala aron mas makasabot sa kamatuoran. Apan si Juan nakasabot nga ang iyang nag-unang tahas mao ang pag-andam sa mga tawo nga mausab pinaagi sa Manluluwas. Si Juan nasayod nga si Jesus “kinahanglan nga magatubo, samtang ako kinahanglan magakunhod” (Juan 3:30). Siya miila kon kinsa ang angayan sa pagdayeg ug himaya. Siya nasayod kon asa gikan ang gahom sa paghimo og maayo. Ang uban morag napuno sa garbo tungod sa tanang kaayo nga ilang nahimo, apan si Juan nagpakita og ehemplo sa Kristohanon nga kinaiya sa pagkamapainubsanon.

Sa dihang si Jesus miduol ni Juan ug mihangyo nga magpabunyag, si Juan mapainubsanong mitubag nga nasurprisa sa hangyo: “Ako ang angay nimong bunyagan apan nganong ako na man hinuon ang mobunyag kanimo?” (Mateo 3:14). Dayon si Juan mipakita na usab og pagkamapainubsanon pinaagi sa pagsunod sa mando sa Manluluwas ug sa pagbuhat sa Iyang gihangyo.

Tungod niini nga pagkamapainubsanon, si Juan nakahimo sa pag-andam sa agianan alang sa kadaghanan sa pagduol ngadto ni Jesukristo.

mas magulang nga lalaki nga nag-ampo

Pagpraktis og Pagkamapainubsanon diha sa Pagpangalagad

Ang pagpaningkamot sa pagkat-on og pagkamapainubsanon makatabang sa atong mga paningkamot sa pagpangalagad sa usag usa.

1. Nagkinahanglan kini og pagkamapainubsanon aron modawat og buluhaton sa pagpangalagad gikan niadtong gitawag aron modumala kanato (tan-awa sa 1 Pedro 5:1–6; Mga Taga-Filipos 2:8). Ang pagkamapainubsanon makatabang nato aron makapadayon uban sa hugot nga pagtuo nga ang Ginoo mopanalangin sa atong mga paningkamot (tan-awa sa Ether 12:27; Doktrina ug mga Pakigsaad 1:28).

2. Nagkinahanglan kini og pagkamapainubsanon aron magtinguha og giya ug mosunod sa mga pag-aghat. Ang pagkahimong mapainubsanon makahimo nato nga mas matudloan ug abli ngadto sa mga pag-aghat sa Espiritu. (Tan-awa sa Doktrina ug mga Pakigsaad 112:10.) Ang usa ka mapainubsanon nga kasingkasing mas andam nga modawat og inspirasyon ug puno sa kaluoy. Ang pagdawat og inspirasyon makatabang nato sa pagserbisyo sa paagi nga labing makaayo alang niadtong atong pangalagaran.

3. Nagkinahanglan kini og pagkamapainubsanon aron makigsuod ug moserbisyo sa usa ka tawo nga lahi nato (tan-awa sa Mga Taga-Roma 12:3–5; Mga Taga-Filipos 2:1–3). Bisan unsa pa ang mga panaglahi, ang pagpaningkamot sa pagsabot kon sa unsang paagi nga kita magkasusama makatabang nato nga mas masuod sa uban. Ang pagpraktis sa kahanas sa pagpaminaw makatabang nato nga makasabot nila, makakat-on gikan nila, ug makaila kon unsaon nga kita makatabang nila. Ang pagpangutana sa atong kaugalingon og “Unsay labing makatabang nako kon ako pa ang anaa sa ilang sitwasyon?” mahimong makahatag nato og mga ideya.

4. Nagkinahanglan kini og pagkamapainubsanon aron makaila nga kitang tanan dungan nga nagpadayon pa sa pagkat-on ug paglambo. Kita mahimong magmapailobon sa uban ug nanghinaot nga sila magmapailobon kanato. (Tan-awa sa Mga Taga-Colosas 3:12–13.) Ang pagtinguha og feedback bahin sa mga paagi aron kita molambo nagkinahanglan og pagkamapainubsanon.

5. Diha sa habig sa modawat sa pagpangalagad, ang pagdawat og tabang dili sayon kanunay. Kasagaran gusto kita nga mobati nga makaya ra nato ang atong mga problema nga kita ra. Hinoon, ang pagdawat sa pagpangalad sa uban usa ka paagi sa pagpalig-on sa panaghigalaay, kay ang pagserbisyo sa uban makaugmad og gugma tali kanato. Ang pagtugot sa uban nga moserbisyo kanato nagkinahanglan og malumo, mapainubsanong kasingkasing nga kinahanglang paningkamotan natong tanan nga maangkon. (Tan-awa sa 1 Pedro 3:8–9.)

babaye nga nagbasa sa mga kasulatan

Pagpalambo sa Pagkamapainubsanon

Kon kita makaila sa Manluluwas, kita mas masayod kon unsay Iyang buhaton sa pagpangalagad sa atong dapit. Unsaon nga kita makapalambo og Kristohanon nga kinaiya sa pagkamapainubsanon.?

1. Kita mahimong magpuasa ug mag-ampo alang sa pagkamapainubsanon (tan-awa sa Helaman 3:35; Salmo 35:13).

2. Kita mahimong mohinumdom ug magmapasalamaton sa unsay Iyang nabuhat alang nato (tan-awa sa Mosiah 4:11).

3. Kita mahimong moila sa atong pagsalig diha Kaniya (tan-awa sa Mosiah 2:23–25; Ether 12:27).

4. Kita mahimong maghinulsol (tan-awa sa Alma 5:26–29).

5. Ang atong pagkamapainubsanon mahimong molambo kon kita modapit sa Espiritu sa atong kinabuhi (tan-awa sa Doktrina ug mga Pakigsaad 11:12).

Pagdiskobre pa og Dugang