Dali, Sunod Kanako

Mateo 4; Lucas 4

Unsaon Nato Pagbatok sa Tintasyon?

Si Jesus nga gitintal ni Satanas

The Three Temptations [Ang Tulo ka Tintasyon], ni Gary E. Smith © 1982

Matag may tulubagon nga tawo dinhi sa yuta pagatintalon. Bisan ang Manluluwas gitintal. Apan makahimo ba Siya sa pagpakasala? Si Presidente Howard W. Hunter (1907–95) mitudlo: “Kon wala pa untay posibilidad sa iyang pagkatintal sa mga pag-agni ni Satanas, wala untay tinuod nga pagsulay, walay tinuod nga kadaogan diha sa resulta. … Hingpit Siya ug walay sala, dili tungod kay gikinahanglan Niya kini, apan tungod kay Siya tinuoray gayod ug determinado niini” (“The Temptations of Christ,” Ensign, Nob. 1976, 19).

Tan-awa kon unsay mahimo nimong makat-onan gikan sa mosunod nga mga pagtulon-an sa mga lider sa Simbahan kon giunsa sa Manluluwas sa pagpakigbatok sa tintasyon.

Pagkuha og Kalig-on gikan sa mga Kasulatan

“Sa dihang giharong sa dakong maninintal mismo, si Jesus ‘wala [motugyan] ngadto sa tintasyon’ (Mosiah 15:5). Iyang gitubag pinaagi sa kasulatan: ‘Ang tawo mabuhi dili sa tinapay lamang, kon dili sa matag pulong nga magagula sa baba sa Dios’ (Mateo 4:4). Ang mga sugo ug sumbanan sa ebanghelyo mao usab ang atong proteksyon, ug sama sa Manluluwas, mahimo kitang makaangkon og kalig-on gikan sa mga kasulatan aron makabuntog sa tintasyon.”

Elder D. Todd Christofferson sa Korum sa Napulog Duha ka Apostoles, “Magpakalalaki Kita,” Liahona, Nob. 2006, 48.

Unaha sa Pagpalig-on ang Imong Kaugalingon

“Positibo ug dihadiha dayon gitapos niya ang panagsultihanay, ug mimando: ‘Pahawa ka, Satanas,’ ang ipasabot, sama niini, ‘Palayo sa akong panan-aw—pahawa sa akong atubangan—dili ako maminaw—dili ako mangilabot kanimo.’ Dayon, atong mabasa, ‘unya ang yawa mipahawa kaniya.’ [Mateo 4:10–11.]

“Mao kini ang tukma natong sundanan, kon atong pugngan ang sala kaysa mag-atubang og daghan pa kaayong malisod nga buluhaton sa paghinulsol niini. Samtang akong gitun-an ang istorya sa Manunubos ug sa mga pagtintal kaniya, sigurado ako nga iyang gigahin ang iyang mga kusog aron sa pagpalig-on sa iyang kaugalingon batok sa tintasyon kaysa pagpakig-away aron sa pagbuntog niini.”

Mga Pagtulon-an sa mga Presidente sa Simbahan: Spencer W. Kimball (2006), 136.

Panaghisgotan

Ikonsiderar ang mga matang sa mga tintasyon (gana, garbo, ug gahom) nga gihulagway diha sa Mateo 4. Unsa ang pipila ka paagi sa pagpalig-on sa imong kaugalingon sa espirituhanong paagi alang nianang mga matang sa tintasyon?