Hilom, Hunong: Pagpakalma sa Atong mga Unos

Ni Stephen Turcotte

Magtutudlo sa Physics, Brigham Young University–Idaho

Ang mga milagro sa Ginoo nagpakita nga usahay Siya mopakalma sa unos, ug usahay Siya mopakalma sa manlalayag.

Imahe

Si Jesus ug mga disipulo diha sa sakayan atol sa unos

The Storm on the Sea of Galilee [Ang Unos sa Dagat sa Galilea], ni Rembrandt Van Rijn, © Isabella Stewart Gardner Museum / Bridgeman Images

Matag usa kanato naapektahan sa mga unos o mga pagsulay sa lain-laing mga ang-ang sa atong kinabuhi. Ang matang ug gidugayon niini nga mga unos lain-lain ug talagsaon sa atong mga kahimtang. Kasagaran kini nga mga hagit mosurprisa nato. Bisan kon kita naningkamot og maayo nga makaandam alang sa mga unos sa kinabuhi, kita kasagaran makaamgo nga kita walay gahom sa pagpakalma niini.

Ang pagpangalagad ug mga milagro ni Jesukristo naghatag kanato og paglaom nga kita makaangkon og tabang samtang kita mag-atubang niini nga mga unos. Ang Manluluwas mihimo og duha niini nga mga milagro sa Dagat sa Galilea. Diha sa parehong mga sitwasyon, ang Manluluwas ug ang Iyang mga Apostoles mitabok sa dagat sa pagkagabii taliwala sa kusog kaayo nga mga unos. Usa ka mainampingon nga pagtuon sa espirituhanon ug pisikal nga mga aspeto niining duha ka milagro makatudlo kanato og pipila ka importante nga leksiyon kabahin sa gahom sa Manluluwas sa pagtabang nato nga maatubang ang atong kaugalingong mga unos.

Usahay Siya Mopakalma sa Unos …

Ang Milagro (Marcos 4:35–41)

Si Marcos nagsulti nato nga ang una niining duha ka milagro nahitabo human nga si Jesus migugol og taas nga panahon sa adlaw nga nagtudlo sa pundok sa katawhan duol sa Dagat sa Galilea. Ang pundok sa katawhan naglingkod sa bungtod nga nag-ambo sa dagat ug ang Manluluwas naglingkod sa sakayan. Pagkagabii, ang Manluluwas ug ang Iyang mga Apostoles misakay og sakayan aron motabok ngadto sa silangang bahin sa dagat.

Apan, sa wala madugay, ang sakayan gikuso-kuso sa usa ka kusog nga unos. Samtang ang Manluluwas malinawon nga natulog, ang Iyang mga disipulo naningkamot og maayo aron maluwas ang ilang mga kinabuhi. Ang mga hangin ug taas nga mga balod mihulga sa pagpalubog sa sakayan. Sa kataposan, diha sa kawalay paglaom, ang mga Apostoles mipukaw sa Manluluwas sa ilang magul-anong mga pulong, “Magtutudlo, wala ka ba lang magpakabana nga mangalumos kita?” Ug dayon ang dakong milagro:

“Ug siya nagmata, ug iyang gibadlong ang hangin, ug miingon siya sa lanaw, Hilom, hunong. Ug mihunong ang hangin, ug mibanos ang kalinaw.

“Ug siya miingon kanila, Nganong nalisang man kamo? wala ba kamoy pagsalig?” (Marcos 4:38–40).

Ang Physics

Ang talagsaon nga heyograpiya sa Dagat sa Galilea nakapahimo niini nga daling maigo sa mga unos. Sa 13 ka milya ang gitas-on ug 8 ka milya ang gilapdon, ang dagat anaa sa taas nga 690 ka piye nga ubos sa lebel sa dagat, nga adunay mga bungtod nga nagliyok niini. Ang uban nga mga bungtod nagbuntaog sa gitas-on nga 2,000 ka piye ibabaw sa dagat. Inig ka gabii, ang init, umog nga hangin ibabaw sa tubig kasagaran mosaka, samtang ang mas bugnaw nga hangin gikan sa mga bungtod paspas nga manaog, nagmugna og taas nga pagkusog sa hangin sa ibabaw sa tubig. Agig dugang, ang dagat sa Galilea mabaw, nga adunay gilawmon nga 250 ka piye, nga adunay kalagmitan nga makamugna og mas dagko nga mga balod kon taas ang pagtulin sa hangin.

Bisan kon aduna nay mga pag-umento sa pagkopya ug pagtag-an sa mga unos, ang mga tawo walay kasarang sa pagkontrol niini. Sa miaging siglo pa lang nato nahibaloan unsaon nga kita makaapekto sa panahon ug klima. Ang cloud seeding gigamit aron kini makaporma og ulan, ug adunay ebidensiya nga ang mga kahimtang sa lungsod ug polusyon makapausab sa lokal ug tibuok kalibotan nga klima. Hinoon, ang abilidad sa pagpahunong sa unos, ilabi na diha sa mubo kaayo nga panahon, lapas na sa abilidad sa tawo. Ang hangin miresulta gikan sa heyograpikal nga panaglahi sa temperatura ug gikusgon. Ang unos mohunong lamang kon ang temperatura ug gikusgon balanse.

Ang mga Leksiyon

Usa ka leksiyon nga akong nakat-onan gikan niini nga milagro mao nga ang Manluluwas adunay gahom batok sa mga elemento. Ang Manluluwas mao ang naglalang sa yuta, katubigan, kalikopan, ug tanan nga anaa sa kalibotan (tan-awa sa Juan 1:3). Diha sa Paglalang, Siya adunay gahom sa pagsugo sa mga elemento ug kini mituman (tan-awa sa Abraham 4:18). Ang milagro sa pagpakalma sa unos nagpakita nga Siya aduna niining sama nga gahom atol sa Iyang mortal nga pagpangalagad.

Ako nagtuo nga ang Manluluwas nagtudlo kabahin sa makaluwas ug makapanalipod nga gahom nga anaa Niya. Ang mga hangin sa daotan makahimo og tanang klase sa bayolente nga mga balod sa atong kinabuhi (tan-awa sa Helaman 5:12). Samtang kita mohangad ngadto sa Manluluwas, kita mahimong mapanalipdan gikan sa daotan ug sa mga epekto niini. Kita pwedeng maluwas gikan sa espirituhanong kalaglagan. (Tan-awa sa Mateo 7:24–27.)

Ang Manluluwas tinud-anay nga adunay gahom sa pagpakalma sa mga unos sa atong kinabuhi. Usahay ang mga unos dali nga mapakalma, ug sa ubang higayon kinahanglan nga atong lahutayon ang mga unos sa usa ka panahon. Apan hinumdomi nga ang samang mga hangin makahimo og mas dagkong mga balod sa mabaw nga tubig kon itandi sa lawom nga tubig. Samtang atong gipalig-on ang atong pagtuo ngadto sa Manluluwas, atong mabantayan nga dili na kaayo kita apektado sa espirituhanong mga hangin ug mga balod nga kanhi mihulga nga mopukan kanato.

Usahay Siya Mopakalma sa Manlalayag

Imahe

Si Jesus nga mikab-ot ni Pedro diha sa tubig

Finisher of Faith [Tighingpit sa Hugot nga Pagtuo], ni J. Alan Barrett

Ang Milagro (Mateo 14:22–33)

Sa dihang ang dakong pundok sa katawhan misunod sa Manluluwas ngadto sa awaaw nga dapit, Siya nagtudlo kanila ug dayon milagrosong mipakaon nila. Pagkagabii, Siya mipadala sa Iyang mga disipulo ngadto sa usa ka sakayan aron mouna Niya pagtabok sa dagat. Iyang gibungkag ang pundok sa katawhan, ug dayon misaka sa duol nga bungtod aron mag-ampo.

Adunay kusog nga haguros sa hangin didto sa dagat, ug hinay ang pag-irog sa mga disipulo. Wala madugay nianang gabii, ang Manluluwas mipili sa pagpakigkita nila sa milagrosong paagi: pinaagi sa paglakaw sa tubig.

Sa dihang nakita Siya ni Pedro, siya gusto nga mobiya sa luwas nga kahimtang diha sa sakayan ngadto sa pagsunod sa Manluluwas ug maglakaw diha sa tubig. Si Pedro sa sinugdanan nagmalamposon, apan sa dihang mipuli ang kahadlok, siya nagsugod sa pagkaunlod hangtod nga ang Manluluwas mitabang kaniya. (Tan-awa sa Mateo 14:22–33.)

Ang Physics

Usa sa mga pisikal nga implikasyon niini nga milagro mao nga ang pagsabot sa Manluluwas bahin sa gravity, fluid dynamics, ug ubang mga baroganan sa physics anaa sa lebel nga labaw kaayo kay sa atong kaugalingon. Ang atong siyentipikong pagsabot sa gravity, pananglitan, napalambo diha dayon. Sa mga 1600, si Sir Isaac Newton matematikanhong mihulagway sa gravity isip usa ka pwersa nga molihok taliwala sa duha ka butang diha sa uniberso. Ang English scientist nga si Henry Cavendish, sa kataposan sa ika-18 ka siglo, mipakita nga adunay masukod nga pwersa sa gravity. Ang panglantaw sa gravity isip pwersa nausab sa dihang si Albert Einstein mipublikar sa iyang kinatibuk-ang teyorya sa pagkalambigit niadtong 1915. Ang iyang pagpasabot sa gravity, nga karon daghan na ang midawat, mao nga ang mga masa nagmugna og pagkausab sa panapton sa panahon ug kawanangan.

Samtang ang atong pagsabot sa gravity milambo, atong gigamit kana nga panabot sa mga paagi nga miusab sa atong personal nga panghunahuna sa mga limitasyon nga gihimo sa gravity diha kanato. Pananglitan, hunahunaa unsa kaha ang kahimtang nga mahimong usa sa kaliboan nga naa sa Siyudad sa New York kilid sa Suba sa Hudson niadtong 1909 samtang si Wilbur Wright misulbong sa langit ug milupad ibabaw sa suba ug libot sa Statue of Liberty. Ang katawhan nianang adlawa nahingangha samtang si Wilbur Wright mora og mihagit sa gravity. Sila nakasaksi og milagro—ang milagro sa paglupad.

Ang mga Leksiyon

Ang milagro sa Manluluwas nga naglakaw sa Dagat sa Galilea nagpakita nga kita aduna pay daghan kaayo nga angay makat-onan kabahin sa gravity ug ubang pisikal nga mga balaod. Naay daghan kaayong mga butang nga wala pa nato mahibaloi sa hingpit.

Ang Manluluwas tingali nagtudlo sa Iyang mga disipulo kaniadto ug karon kabahin sa Iyang gahom sa paglig-on, pagbayaw, ug pagpasarang. Kitang tanan nag-atubang sa hangin ug mga balod sa mga hagit niining kinabuhi. Sama ni Pedro, ingon usab kini kanato. Usahay ang mga unos dili mohunong, ug ang bugtong lamang paagi nga malampasan kini ug makapadayon sa atong mahangtorong destinasyon mao ang paglakang palayo sa unos uban ang determinadong pokus sa Manluluwas.

Kita kinahanglan nga adunay hugot nga pagtuo sa makapasarang nga gahom sa Manluluwas aron sa pagtabang nato nga mabuntog ang atong kaugalingon nga mga kahadlok ug mga limitasyon. Kini importante nga tema nga nagsumpay niini nga mga milagro.

Adunay daghan kaayong leksiyon gikan niini nga mga milagro nga makatabang ug makadasig nato samtang kita molambo diha sa atong kaugalingong panaw. Ang mga milagro sa Manluluwas nagbarog isip dako nga saksi sa Iyang pagkabalaan, Iyang kamaalamon, ug Iyang dako nga maulaong sakripisyo alang sa matag usa kanato. Pinaagi sa Iyang gahom kita makaangkon og kalinaw kon ang mga balod mohulga sa paglapas kanato, ug kita maadunay pagsalig nga Siya mobayaw kanato ngadto sa mas taas nga dapit sa gingharian sa atong Amahan.

Siya sa tinuod adunay gahom sa pagpakalma sa mga unos ingon man sa mga manlalayag.