Digital Lamang
Ang mga Panalangin ug Kamahinungdanon sa Family History—Bag-ohay lang nga mga Mensahe gikan sa mga Propeta ug Apostoles
Tan-awa kon unsa ang bag-ohay lang nga gitudlo sa buhing mga propeta diha sa social media mahitungod sa family history.
Si Elder Russell M. Nelson nagtudlo kanunay mahitungod sa kamahinungdanon sa pagtabang sa pagpundok sa Israel sa duha ka habig sa tabil. Ang pag-apil sa buhat sa family history kinahanglanon kaayo diha nianang mahinungdanon nga buhat. Si Presidente Nelson nagtudlo:
“Ang matag tawo nga moanhi sa yuta mao ang produkto sa mga kaliwatan sa mga ginikanan. Kita adunay natural nga pangandoy sa pagkadugtong uban sa atong mga katigulangan. Kini nga tinguha anaa sa atong mga kasingkasing, sa walay pagtagad sa edad.
“Hunahunaa ang espirituhanon nga mga koneksyon nga namugna sa diha nga usa ka batan-ong babaye nagtabang sa iyang apohan nga babaye nga isulod ang kasayoran sa pamilya diha sa computer o sa diha nga usa ka batan-ong lalaki nakakita sa pangalan sa iyang apohang lalaki sa tuhod diha sa rekord sa census. Kon ang atong mga kasingkasing mobati ngadto sa atong mga katigulangan, usa ka butang ang mausab sa atong kahiladman. Atong bation ang kabahin sa usa ka butang nga labaw pa sa atong mga kaugalingon. Ang atong natural nga mga pangandoy alang sa mga koneksyon sa pamilya matuman kon kita nasumpay ngadto sa atong mga katigulangan pinaagi sa sagrado nga mga ordinansa sa templo. …
“Si Propeta Joseph Smith miingon, ‘Ang pinakamahinungdanon nga responsibilidad niini nga kalibotan nga gisugo sa Dios kanato mao ang pagsiksik sa atong mga patay.’ Bag-ong teknolohiya ang nakahimo niini nga mas sayon sukad aron sa pagtuman niana nga responsibilidad. …
“Karon unsaon na man lang kamo nga walay magamit nga computer o mopili nga dili mogamit niini nga teknolohiya? Ayaw kabalaka! Paghimo og usa ka paagi kausa matag higayon. Sugdi diha sa panimalay. Sugdi sa usa ka basiyo nga karton, sama sa gisugyot ni Presidente Boyd K. Packer. Ibutang niana nga karton ang importante nga kasayoran kalabot ninyo ug sa inyong pamilya. Idugang ang kasayoran nga nakuha gikan sa inyong ubang sakop sa pamilya. Dayon pangayo kamo og tabang gikan sa inyong ward o branch consultant alang sa [templo ug] family history. …
“Usa kini ka makapalipay nga buhat. …
“Bisan kon ang buhat sa templo ug sa family history adunay gahom sa pagpanalangin niadtong anaa sa kalibotan sa espiritu, kini adunay sama nga gahom sa pagpanalangin sa mga buhi. Kini adunay makapalunsay nga impluwensya niadtong nagbuhat niini. Sila sa pagkatinuod nagtabang aron mahimaya ang ilang mga pamilya.”1
Ang mosunod nga mga pamahayag gikan sa mga lider sa Simbahan kalabot sa social media makatabang kanato nga makat-on og dugang mahitungod sa mga panalangin ug kamahinungdanon sa family history.
Mga Ehemplo Niadtong Kinsa Milihok sumala sa Ilang Hugot nga Pagtuo diha sa Manluluwas
“‘Istoryahi ko’ maoy usa ka kasagaran nga hangyo gikan sa mga bata. Samtang ang buhat-buhat nga mga istorya ug engkantada nga mga sugilanon makalingaw nga ipakigbahin, ikonsiderar hinuon ang pag-istorya sa inyong mga anak sa mga sugilanon nga magpakita og hugot nga pagtuo diha ni Kristo ug mga istorya nga mokonekta nila ngadto sa ilang mga katigulangan. Daghang tuig ang milabay, si Kristen ug ako nakahukom nga maghimo og among kaugalingong basahon sa istorya sa pamilya, nga puno sa mga sugilanon gikan sa among mga kapamilya ug katigulangan. Ganahan kami nga mobasa gikan niini uban sa among pamilya.
“Gidapit namo kamo sa paghimo og inyong kaugalingong pundo sa mga rekord sa mga ehemplo gikan sa inyong family history kabahin niadtong kinsa milihok sumala sa ilang hugot nga pagtuo diha sa Manluluwas, diha sa Iyang mga lider, ug diha sa mga baroganan sa Iyang ebanghelyo. Tingali mokuha kamo og mga istorya gikan sa mga pakigpulong o sa mga family history, o gani sa mga istorya lang nga inyong nadungog samtang nagdako mo. Buhati kini og dokumento, ug ipakigbahin kini. Ang pagbuhat niini makatabang kaninyo ug sa inyong pamilya nga mobati og gugma ngadto sa inyong mga katigulangan.”
Dallin H. Oaks, Facebook, Ene. 14, 2021, facebook.com/dallin.h.oaks.
Ang Tahas nga Inyong Lihokon Niining Mahinungdanon nga Buhat
“Kitang tanan adunay tahas nga lihokon niining mahinungdanon nga buhat. Ang pag-apil sa family history ug buhat sa templo magpakita sa Dios nga kamo nagpakabana Kaniya, sa Iyang pamilya, ug sa Iyang mga katuyoan. Samtang kamo magmugna og kasuod ngadto sa inyong Amahan sa Langit, Siya magmugna og kasuod diha kaninyo.”
Jeffrey R. Holland, Facebook, Peb. 7, 2021, facebook.com/jeffreyr.holland.
Pagkonekta ngadto sa Atong Kaugalingong mga Pamilya
“Salamat sa akong asawa, si Mary, ang musika sa kanunay nahimo nang usa ka mahinungdanon nga bahin sa among panimalay ug pamilya. Pipila ka tuig na ang milabay atol sa Roots Tech nga komperensiya, si Mary ug pipila sa among mga apo mipakigbahin og usa ka kanta nga naglangkob sa among gugma sa musika ingon man sa among gugma sa pamilya.
“[Kadto] nga kanta nagpakigbahin og usa ka mensahe sa ‘pagpabalik sa mga pagbati sa … mga anak ngadto sa [ilang] mga amahan’ (Doktrina ug mga Pakigsaad 110:15), nga nahimong hilabihan ka importante sa among mga apo. Ang Roots Tech nga komperensiya nakapaaghat og kadasig taliwala sa among mga apo aron mahimong mas moapil sa pagdiskobre ug pagkonekta sa ilang kaugalingong mga katigulangan.
“Kitang tanan adunay katungdanan ngadto sa mga henerasyon nga nag-una kanato ug ngadto sa mga henerasyon nga magsunod kanato. Ako nag-ampo nga ang matag usa kanato mopadayon sa pagpangita og paagi aron makakonekta sa atong kaugalingong mga pamilya.”
Quentin L. Cook, Facebook, Peb. 19, 2021, facebook.com/quentin.lcook.
Gagmay ug Yano nga mga Butang
“Ang Manluluwas sa kasagaran mohulagway sa Iyang buhat isip ‘mahinungdanon ug kahibulongan’ (Doktrina ug mga Pakigsaad 12:1) o isip ‘usa ka kahibulongan nga buhat ug usa ka katingalahan’ (2 Nephi 27:26). Ug bisan pa makapainteres nako kon giunsa Niya pagtuman kana nga buhat pinaagi sa gagmay ug yano nga mga butang—lakip ninyo ug nako.
“Bisan unsa pa ang atong ubang mga responsibilidad, kitang tanan adunay kahigayonan sa pagdapit sa mga anak sa Langitnong Amahan sa pagbugkos sa ilang mga kaugalingon ngadto sa Manluluwas pinaagi sa paghimo ug pagtuman sa mga pakigsaad.
“Si Presidente Nelson miingon nga ‘bisan kanus-a nga kamo mobuhat og bisan unsa nga makatabang ni bisan kinsa’ sa paghimo ug pagtuman og mga pakigsaad, sa bisan hain nga habig sa tabil, kamo nagpundok sa Israel (‘Paglaom sa Israel,’ worldwide youth devotional, Hunyo 3, 2018). Kini mao ang labing mahinungdanong kawsa sa yuta, apan mahimo usab kini. Kini natural lang nga modagayday gikan sa pagpakighiusa sa atong kaugalingon ngadto sa Manluluwas.
“Tingali wala kamo maghunahuna niini, apan ang matag usa kanato tinuoray nga makahimo og dako nga impluwensiya diha sa pagtabang sa uban aron molambo ang ilang hugot nga pagtuo diha ni Jesukristo. Dapiton ko kamo sa pagkonsiderar kon unsa ang inyong mahimo karon.”
Quentin L. Cook, Facebook, Hul. 19, 2021, facebook.com/quentin.lcook.
Mga Panalangin sa Pagkaplag og mga Istorya sa mga Indibidwal
“Niadtong 1999, naswertehan ko nga nakaapil sa paglunsad sa FamilySearch nga website sa Simbahan. Si Gordon B. Hinckley, kanhi Presidente sa Simbahan, mipakigbahin og pipila ka mga pulong sa pagtambag nga sa kanunay nakong nakaplagan nga talagsaon. Siya miingon, ‘Ang doktrina sa mahangtoron nga kinaiyahan sa pamilya maoy usa sa labing mahinungdanon ug sagrado sa atong mga pagtulon-an. Ang tinguha sa pagsabot sa atong kasaysayan sa pamilya makausab sa kinabuhi. Kini makatabang sa pagdala og panaghiusa ug kalig-on sa mga pamilya. Adunay usa ka butang mahitungod sa pagsabot sa nangagi nga makatabang sa paghatag sa atong kabatan-onan og butang nga angay nga pakabuhian, usa ka kabilin nga angay nga tahoron.’
“Kana nga mga pulong nagpabiling tinuod hangtod karon, ug sa 22 ka tuig sukad sa akong pagkadungog niini, nahingangha ko sa sosyal ug espirituwal nga mga kaayohan nga among nasinati gikan sa pagsiksik sa among mga katigulangan, dili lamang sa pagkaplag og mga kamatuoran sa kasaysayan sa kaliwatan, apan sa pagdiskobre og mga sugilanon sa mga indibidwal. Kini nga mga istorya dako kaayo og mahimo sa pag-establisar ngari kanamong tanan og usa ka pagbati nga adunay luna, katuyoan, ug koneksyon niadtong kinsa nag-andam sa dalan sa wala pa kami.”
D. Todd Christofferson, Facebook video, Peb. 23, 2021, facebook.com/dtodd.christofferson.
Diin ug Kinsa ang Inyong Gigikanan
“Samtang inyong tinguhaon ang pagdiskobre sa inyong mga kaliwatan kon si kinsa kamo, ug kon diin ug kon kinsa ang inyong gigikanan, inyong mahibaloan kon kinsa Siya—ang inyong Manunubos nga si Jesukristo; ug ako mosaad kaninyo nga kamo makakaplag og kaputli ug kalinaw, panglantaw ug katuyoan, ug kamo makakaplag og gahom ug luna diha sa pamilya sa Dios.”
Ulisses Soares, Facebook, Marso 5, 2022, facebook.com/soares.u.
Usa ka Kombinasyon sa Nangagi ug sa Karon
“Unsa nga mga istorya sa pamilya ang gikuhaan ninyo og kalig-on? Unsa nga mga tradisyon ang inyong madasigon nga gipadayon? Kon wala kay usa nga mahunahunaan, ayaw kawala og paglaom. Dasigon namo kamo sa pagkaplag niini; ug hinumdomi, ang family history dili tanan kabahin sa dugay na nga kaagi. Kombinasyon kini sa nangagi ug sa karon nga naghimo kanimo nga talagsaon nga ikaw.”
Ulisses Soares, Facebook, Marso 2, 2022, facebook.com/soares.u.