Kam Folem Mi: Buk blong Momon
?Olsem wanem yumi save gat eksperiens ia blong filim hiling paoa blong Kraes?
(28 Septemba–11 Oktoba)
Long seves blong Jisas Kraes long Ol Man blong Nifae, Hem i bin soem bigfala lav, mo hiling paoa blong Hem long evriwan we oli bin go long Hem. ?Wanem nao yumi save lanem aot long eksperiens blong Ol Man blong Nifae wetem Sevya?
Ol Tes blong Ol Man blong Nifae
Ol yia bifo we Jisas i kam, oli bin ol yia we oli gat raorao. Ol Man blong Nifae oli gotru long:
-
Faet bitwin olgeta (luk long 3 Nifae 7:1–4).
-
Ol fasin nogud mo ol rabis fasin (luk long 3 Nifae 2:3, 7:7).
-
Fasin blong no tekem man long sem level folem hamas rij samting oli gat (luk long 3 Nifae 6:10–14).
-
Agens long saed blong relijin (luk long 3 Nifae 1:9).
-
Wo (luk long 3 Nifae 2:17).
-
Ol disasta long taem blong ol trifala dei blong tudak (luk long 3 Nifae 8).
Seves blong Kraes long Ol Man blong Nifae
Taem we Sevya i bin kamkamaot long Ol Man blong Nifae, Hem i bin invaetem evriwan we “oli gat hadtaem long eni fasin” (3 Nifae 17:7) blong oli go long fored mo bae Hem i hilim olgeta. Invitesen blong Hem i bin go moa bitim ol hadtaem we Ol Man blong Nifae oli jes stap gotru long ol. Invitesen ia i blong yusum long ol soa we man i save luk, mo olgeta we man i no save luk, we Ol Man blong Nifae oli bin stap karem long ful laef blong olgeta. Jisas Kraes i bin hilim “evriwan” (3 Nifae 17:9) mo Hem i bin givhan long olgeta “wan afta wan” (3 Nifae 17:21).