Stopem Abius
Long ol helti rilesensip, ol pipol oli talem sore from ol toktok mo aksen blong olgeta we oli no kaen, mo oli dipen long paoa blong Sevya we i pem praes blong helpem olgeta blong kam antap mo sakem sin. Be long ol situesen we oli no helti, ol pipol oli gohed blong tritim ol narawan long wan fasin we i no kaen, mo ol rilesensip ia oli save go kasem abius.
“[Abius mo ol nara] kaen rong olsem, oli no gat ples insaed long kingdom blong God,” Presiden Russel M. Nelson i bin tijim (Ol Rij Samting long Saed blong Spirit,” Oktoba 2019 Jeneral Konfrens). Samfala atikol blong magasin blong Jos long manis ia bae oli helpem yumi blong luksave mo stretem problem blong abius:
-
Long atikol blong mi long pej 18, mi tokbaot ol fasin we oli ol fasin blong abius mo soem sam risos blong helpem yu o ol pipol we yu save, blong oli luksave mo oli kasem hiling aot long ol rilesensip we oli olsem ol abius.
-
Long pej 58, wan yangfala gel i serem ol eksperiens blong hem we oli abiusum hem long saed blong seks taem hem i wan pikinini, mo olsem wanem hem i bin save faenem strong paoa long tingting mo paoa long maen blong toktok mo askem help long ol adalt we hem i trastem mo help blong Sevya.
-
Long Fren blong manis ia, long pej F12, yu save faenem wan raeting aktiviti blong help blong toktok raon long fasin blong “talem no” wetem ol pikinini blong yufala. Tingting blong stap yusum aktiviti ia olsem stamba blong wan haos naet lesen blong stopem abius.
-
Abius long filing i save spolem man i semmak nomo long eni nara kaen wei blong abius. Ridim “Luksave Abius long Filing” we i stap long dijitol edisen blong namba blong magasin ia blong save lanem ol faef woning saen mo olsem wanem blong kasem help.
Sapos oli bin mekem nogud long yu, yu save tanem yu i go long God blong Hem i soem rod mo hiling, mo tu, blong yu lukaotem help long ol pipol we yu trastem olgeta. Lod i andastanem wanem yumi stap filim, mo bambae Hem i lidim yumi i go long sef ples mo glad taem yumi stap tanem yumi i go long Hem.
Bae yumi evriwan i filim lav blong God mo go toktok wetem Hem evri dei.
Jason Whiting, PhD
Brigham Yang Yunivesiti Skul blong Famli Laef