Stamba Tingting blong Baptaes blong Mi
Bifo long baptaes blong mi, mi bin sidaon miwan mo mi bin prea se ol fren blong mi bae oli kamkamaot, olsem wan merikel.
Ol pikja oli kam long Julia Yellow
Taem mi wan pikinini we mi bin stap laef long ol saed taon blong Taepe, Taewan, mi neva save abaot ol misinari. Mekem se fas taem we mi bin kam blong toktok wetem olgeta, mi bin wantem save abaot mesej blong olgeta. I no tekem longtaem bifo mi wantem tumas blong stap folem ol tijing blong olgeta mo praktisim gospel insaed long laef blong yumi. Mi bin filim se hemia i bin wan wei, blong mi, blong faenemaot sapos i rili gat wan God i stap o no.
Long wan manis taem, oli bin tijim gospel long mi, wetem ol komanmen we oli stap tijim bifo long baptaes. Pis i bin kam long mi tru long prea; mi bin kasem revelesen we i blong miwan taem mi bin stap stadi long ol skripja, mo mi neva mestem wan miting blong Jos. Mi disaed se mi mas baptaes.
Bigfala jalenj we mi bin fesem long tetaem ia, oli ol problem we mi mi gat wetem sam long ol fren blong mi from se oli agensem mi blong joenem Jos. Mi bin prea bigwan abaot ol problem ia, be rilesensip blong mifala, i luk se i stap go mowas.
Mi bin invaetem ol fren blong mi blong kam long baptaes blong mi, be oli no wantem save nating long invitesen blong mi. Mi rili no bin save wanem nao blong mekem. Bifo long baptaes blong mi, mi bin sidaon long sofa, insaed long rum blong wet blong japel; mi bin stap prea se ol fren blong mi bae oli kamkamaot, olsem wan merikel, blong mi save talem long olgeta abaot ol gudfala jenis we mi bin mekem insaed long laef blong mi, mo pruvum long olgeta se mi mi bin stap mekem raet desisen blong save kasem baptaes.
Ol fren blong mi oli neva kam, be taem mi bin stap talemaot ful hat blong mi long God, mi bin filim wan samting. Long taem ia, mi bin filim wan bigfala lav we i kam long Papa long Heven. Mi bin save se Hem i bin stap ia, mo Hem i bin lisin tru long prea blong mi.
Fastaem, mi bin wantem baptaes from evri gudfala samting we i bin stap hapen long laef blong mi, be long stret taem ia, mi bin kam blong andastanem stamba tingting blong baptaes blong mi.
Filing we mi bin kasem i bin olsem voes blong Lod we i stap toktok i kam long wan sopsop voes, mo i toktok i kam stret long mi, i talem se: “Yu no nidim blong pruvum eni samting long eniwan. Yu jes nid blong pruvum long mi se yu yu glad blong kam long mi mo stap tru long gospel blong mi long ful laef blong yu.”