Miwan long Lanj Taem
Hem we i raet i stap long Yuta, YSA.
Kali i jes wantem wan fren nomo.
“Tabu Spirit i toktok wetem wan kwaet smol voes” (Children’s Songbook, 105).
Kali i wokbaot i go long rum blong kakae lanj, mo i luk raon. Evri nara pikinini oli stap ron stret i go long ol fren mo oli stap kam tugeta long ol tebol. Rum ia i gat fulap noes wetem ol voes we oli glad tumas mo hapi laflaf. Hem i nambatu dei long skul, be i luk se evriwan i gat wan fren blong sidaon wetem, be Kali i no gat.
Kali i holem strong handel blong bokis kaekae blong hem, mo i wokbaot i go long wan long ol tebol. “?Mi save sidaon kolosap long yu?” Kali i askem.
Wan gel wetem longfala braon hea i lukluk i go antap. Hem i laf smol mo i seksekem hed blong hem. “No. I gat wan finis,” hem i talem.
“Okei.” Kali i muv long wan nara emti jea mo i putum gud bokis kaekae blong hem.
“!Yu no save sidaon long ples ia! Mi bae mi sidaon long ples ia,” wan boe wetem wan grin sot wetem laen i talem. Hem i pusum bokis kaekae blong Kali i go foldaon long floa. Ol fren blong boe ia oli laf.
Kali i bendaon mo pikimap bokis kaekae blong hem bakegen. Hem i wokbaot i krosem rum blong kaekae ia mo i sidaon long wan emti tebol. Hem i luk wan we i slip long sem eria blong hem, mo i traem blong sakem han, be boe ia i luk long nara ples. Kali i mekem fes blong hem i nogud. ?From wanem i no gat wan i wantem kam fren wetem hem?
Kali i luk i go daon long kaekae blong hem. Hem i no filim hanggri nao. Hem i waepem ae blong hem, i sarem bokis kaekae blong hem, mo i wokbaot i go aotsaed.
Evriwan i stap pleiplei wetem fren blong olgeta finis. Kali i sidaon hemwan long wan stul, mo i lukluk ol nara pikinini oli gat gud taem, be i no hem. Afta, Kali i bin luk wan boe we i semmak yia olsem hem, i stap sidaon hemwan long gras. Hem i wetem wan yelo sot we i gat wan mak long hem, mo hea blong hem i go antap long bak blong hed blong hem.
Kali i lukluk i go. Hem i bin luk wan grup blong ol gel blong klas blong hem we oli stap plei fo skwea. Hem i wantem tumas se bae oli invaetem hem blong plei wetem olgeta.
Kali i lukluk long boe ia bakegen. Hed blong hem i bendaon, mo hem i stap pikimap gras raon long leg blong hem. Kali i tingbaot wan samting we Mama blong hem i stap talem samtaem: Lukaotem ol pikinini we oli stap olgetawan.
Kali i mekem fes blong hem i nogud. Hem tu, hem i stap hemwan. !I no gat wan i stap traem blong kam fren blong hem!
Be afta, Kali i tingting abaot taem we hem i kasem baptaes long las yia. Hem i bin promes blong stap lisin long Tabu Spirit. Mebi Tabu Spirit i stap helpem hem blong tingbaot wanem we Mama blong hem i bin talem long hem. Mebi Tabu Spirit i bin stap traem blong talem hem blong go pleiplei wetem boe ia wetem yelo sot.
Kali i pulum win, mo i stanap. Wan gud filing i fulumap hat blong hem. Hem i wokbaot i go, i sidaon long saed blong boe ia long gras.
Hem i talem: “Halo,”
Hem i talem slo: “Halo.”
“?Wanem fevret kala blong yu?”
“Ah … grin.”
“Hem i gud. Mi laekem pink,” Kali i talem. “?Yu yu gat wan fevret animol?”
Boe i sidaon i stret smol, mo i lukluk Kali. “Yes. Mi rili laekem ol daenoso.”
“O, be mi tu. Fevret blong mi i wan traeseratop.”
Boe ia i smael.
Afta, bel i ring. Kali i stanap, mo i talem tata long boe ia. Hem i smael taem hem i stap wokbaot i go long klasrum blong hem, hemwan. Maet hem i no gat wan bes fren, be hem i filim hapi blong save se hem i bin mekem spel taem blong wan narawan i gud smol. ●