Moa long Wan Wei Blong Stadi long Skripja

I Kam long Marissa Widdison

Ol Magasin blong Jos

Iven sapos yu no laekem blong stap rid, i gat plante wei blong stadi long ol skripja.

Mi lavem koling blong mi naoia olsem man blong plei piano long Praemeri. Sam wik i pas ol pikinini oli stap praktisim wan singsing. Mi filim Spirit taem olgeta oli singsing:

Lukaot, ting hevi, mo prea
Oli ol samting we mi mas mekem. 
Spirit bae i lidim, mo, dip insaed,
bae mi save se ol skripja oli tru.1

Be wan kwestin i stap long hed blong mi. ?Olsem wanem sapos yu no save—olsem we fas ves blong singsing ia i talem—“laekem blong ridim ol tabu skripja”? Mi ting se topik blong stap rid i bin stap long maen blong mi long taem ia from se moa long wan fren i bin serem se olgeta oli traehad from oli no save rid. !Mo plante pipol we mi save oli no glad blong stap rid nomo! ?I gat wan wei blong olgeta i save gat wan dip eksperiens wetem skripja mo traem blong gat “wan testemoni se oli tru”?

Pipol oli lan moa gud moa taem infomesen i kamaot long plante defren wei, tugeta long saed blong pikja mo long saed blong toktok, mo ol lesen oli ripitim plante taem. Wetem tingting ia, mi bin traem blong tingting long plante defren wei blong stap stadi long ol skripja we mi save tingbaot. Mi mas talem se i no evri samting long lis ia bae yu tekem olsem skripja stadi ia we yu tingting fulap long hem mo stadi moa dip long ol skripja, we ol profet oli bin stap tijim we i impoten blong ol testemoni blong yumi—sam long olgeta oli ol kwik mo gudfala aedia—be mi ting se bae oli givim sam aedia blong yuwan. Letem yumi stadi moa gud moa long gospel blong mekem se yumi save, olsem we singsing ia i talem, “!kam blong andastanem” tugeta!

Ol Wei blong Stap Stadi long Ol Skripja

Faenem ol toktok we oli ripitim long petriakel blesing blong yu mo lukaotem ol sem toktok ia insaed long ol skripja.
Taem yu stadi, droem ol pikja abaot ol tingting blong yu long wan stadi jenol o long ol saedsaed blong ol pej blong Kam, Folem Mi lesenbuk.
Bildim wan smol kopi blong wan skripja stori.
Ringim wan famli we i stap longwe long yu mo rid tugeta tru long fon.
Raetem wan lis blong ol kwestin yu gat blong God, mo afta, lukaotem ol ansa taem yu stap rid.
Wajem wan vidio long BookofMormonVideos.org o BibleVideos.org.
Openem ol skripja long eni japta mo stat ridim.
Singsing long wan hym mo afta luk ol skripja we oli listim long en blong singsing ia.
Visitim ol topik.ChurchofJesusChrist.org mo stadi samting we yu intres long hem.
Lukaotem ol art wok onlaen we i soem pikja blong skripja stori we yu stap stadi long hem.
Ridim ol japta mo seksen heding blong wan buk.
Plei wan kwaet mo slo miusik we hem i miusik nomo taem yu stap rid laod.
Lukaotem ol wei we wanwan japta blong skripja i konek long tempol.
Sapos yu yu stap stadi ol skripja long lektrik tul, traem printim ol kopi mo ridim, o mekem semmak sapos yu stap yusum lektrik tul.
Pentem o droem wan pat blong stori long skripja.
Tekem se oli askem yu blong givim toktok abaot wan topik long jos, mo stadi from.
Afta we yu ridim wan japta blong skripja we yu laekem tumas, raetem bakegen long ol toktok blong yuwan.
Folem ol futnot long wan ves we yu laekem tumas, afta folem ol futnot blong ves ia we i lidim yu i go ia, afta folfolem olgeta futnot ia mo gohed olsem.
Rid tugeta wetem ol fren, wanwan long yufala i ridim wan ves mo tokabaot wanem yufala i ridim.
Yusum Topical Guide blong stadi wan toktok o topik.
Lukaot evri skripja long ol not long en blong wan jeneral konfrens toktok.
Putum wan skripja samples we yu save luk evri dei mo traem tingbaot long wik ia.
Raetem ol kad i go long pipol we i ol skripja blong givim kamfot insaed long hem.
Yusum Gospel Laebri blong lisin long ol skripja taem oli stap ridimaot laod.
Droem taem laen blong ol impoten samting we oli bin hapen taem yu ridim Buk blong Momon.
Faenem wan “skripja fren” mo stap teksem yutufala wan ves evri moning.
Stat long las japta blong Buk blong Momon mo rid i kam long stat.
Ridim ol skripja we i gat wan testemoni, afta raetemdaon testemoni blong yu.
Sapos yu plei wan tul blong miusik, traem raetem wan singsing we i tokbaot gud filing blong wan ves.
Askem ol famli memba mo ol fren abaot ol skripja ves we oli laekem tumas.
Taem yu rid, droem ol samting we oli talem olsem bonara blong Nifae.
Ridim mo tingbaot ol ves we oli yusum blong tijim ol lesen blong misinari we i stap long japta tri blong Prijim Gospel Blong Mi.
Ridim wan buk long Baebol we yu neva ridim bifo.
Faenemaot abaot laef blong wan skripja hiro mo raetem wan ripot blong laef blong hem.
Mekem folem wan skripja stori olsem pat blong haos naet o nara Jos aktiviti.
Faenem wan kwot blong wan Jos lida we i semmak wetem japta we yu finisim.
Ridim skripja stadi help, olsem Fas tok blong Buk blong Momon o Bible Dictionary.
Spendem taem aotsaed mo tingbaot olsem wanem nao wanem we yu luk i konek long gospel, afta faenem wan ves abaot wanem yu bin lanem.

?Yu gat sam tingting blong yuwan? !Serem olgeta wetem famli blong yu!