lektrik tul Nomo
Luksave Abius long Saed blong Filing
“Hasban blong mi i no man blong abius. Hem i singaot strong long mi mo singaot mi long ol kaenkaen nem, be hemia i no abius, ah?”
Yumi save se “Lod hem i jajem man wetem fasin blong abius.”1 Mo sam wei blong abius olsem abius long saed blong bodi hem i isi blong luksave, be abius long saed blong filing, i save had blong luksave. Damej blong hem i we man i konfius, gat fraet, sem, lusum hop, mo no bilif long hemwan blong mekem gud.
Abius long saed blong filing hem i we wan man i traehad blong tekemaot fridom blong joes blong narawan mo tekem kontrol ova long olgeta wetem toktok o ol fasin blong kontrolem ol filing mo joes blong ol. Abius long saed blong filing i save hapen long eni kaen rilesensip: bitwin hasban mo waef, bitwin papa, mama mo ol pikinini, long ol frensip, long ol deiting rilesensip, o ol wok fren.
?Wanem Sam Eksampol blong Abius long Saed blong Filing?
Sapos yu save ol saen blong abius long saed blong filing bae i helpem yu blong protektem yuwan mo olgeta we yu lavem. Sam long ol fasin long saed blong abius hem i:
-
Singaotem yu long ol kaenkaen nem o rabisim yu long ol wei we i putum yu daon.
-
Mekem yu sem long pablik.
-
Tok agens mo tingting nating long ol gudfala wok blong yu mo wanem yu stap mekem.
-
Blemem yu from ol aksen blong olgeta mo no stap akaontebol o no ansa from ol rong aksen ia.
-
Mekem yu fil se yu yu rong, mekem se bae yu mekem samting blong olgeta from olgeta i mekem samting blong yu.
-
Mekem yu stap longwe long ol nara man mo stap kontrolem olsem wanem yu spendem taem blong yu.
-
Mekem yu fil se yu stap long denja sapos yu no folem wei o mekem ol samting we hem i wantem.
-
Holemtaet filing blong lav long yu kasem taem yu mekem wanem olgeta i wantem.
-
Kontrolem yu long saed blong spirit blong yusum ol bilif long saed blong relijin blong kontrolem yu.
? Olsem Wanem nao Mi Save Luksave Abius long Saed blong Filing?
Hem i impoten tu blong save gud ol fasin blong abius mo ol woning saen long yuwan. Lis ia hem i sam long ol paten mo ol desisen we oli save holemtaet yu blong stap long wan rilesensip blong abius long saed blong filing:
-
Mekem eskius from fasin blong man we i abiusum yu:
-
Soem se fasin blong man we i abius hem i oraet: “Hem i no stap mekem olsem ia ia—hem i stap go tru long plante wari nomo ia naoia.”
-
Tritim fasin blong abius olsem wan smol samting : “Hem i no wan bigfala problem.”
-
Blemem yuwan from fasin blong abius blong olgeta: “Sapos mi bin rere long kaekae blong aftenun long taem, hem bae i no bin save kros nogud mo singaot strong long mi.”
-
No wantem save long harem nogud ia long saed blong bodi. Faswan, taem yu yu wan viktim blong abius long saed blong filing, yu no wantem stap kolosap from yu no filim gud long yuwan, o yu lukdaon long yuwan taem yu stap raon long olgeta. Blong holemtaet rilesensip, bae yu no wantem save long ol filing blong harem nogud ia. Bae taem i kam we bae harem nogud ia bae i lus from we yu yu stap yus long fasin ia finis.
-
Yusum ol bilif blong relijin blong soem se situesen i oraet. Samting ia i bigwan long sosaeti blong yumi, mo iven long ol memba blong Jos. Hem we oli abiusum hem bae i talem samting olsem: “Lod i bin givim komanmen long yumi blong fogiv. Mi mi stap sin ia sapos mi nogat fasin blong fogiv.” Fasin blong fogiv hem i wan komanmen. Be, olsem we Elda Jeffrey R. Holland i bin tijim abaot Sevya, “Hem i no bin talem se: ‘Hem i tabu blong yu filim bigfala sobodi, o bigfala harem nogud from ol had mo nogud eksperiens we nara man i mekem yu go tru long hem.’ O, hem i no bin talem se: ‘Blong fogiv fulwan, yu mas gobak long rilesensip ia we i no sef o gobak long wan abius mo denja situesen.’”2
-
Blong stap no lukluk long nid blong yuwan. Yu stap lukluk long nid blong olgeta narawan blong yu yu sef, mekem se yu yu nomo lukaot long yuwan. Eksampol: bae yu stap safa long harem nogud long saed blong filing blong yu blong mekem yu no spolem filing blong wan narawan, o bae yu givim mane long wan fren, iven taem yu yu no gat inaf.
-
Filing se yu yu no inaf. Abius long saed blong filing i save stopem ol filing ia se yu yu gud inaf blong gud samting. Nomata hemia, yu yu wan pikinini boe o gel blong God mo yu yu tabu mo gat wan ples i stap finis long heven. Praes blong yu, we i bigwan, i no save jenis (luk long Doktrin mo Ol kavenan 18:10).
?Wanem Nao Mi Save Mekem Sapos Oli Stap Abiusum Mi long Saed blong Filing?
Samtaem wan rilesensip we i gat abius long saed blong filing i kam blong prapa spolem man tumas we i mekem se i wan nid blong mas aot long rilesensip ia. Be, blong aot, hem i no wan rod ia nomo long evri situesen. Jenis hem i posibol, mo wan rilesensip i save kam helti wetem wok mo plante taem wetem help blong wan profesenol. Sapos yu ting se abius long saed blong filing i stap long rilesensip blong yu, lis ia i save helpem yu:
-
Lukaotem sapot mo help long wan man we yu trastem we yu save serem ol eksperiens blong yu wetem hem, olsem wan fren, wan jos lida, o wan profesenol insaed long wan komuniti oganaesesen. Man o woman ia i save givim sapot long saed blong filing mo wan gud lukluk long huia yu mo hem i save spendem sam kwaliti taem wetem yu longwe long abius. (Luk long abius.ChurchofJesusChrist.org. Klik long “In Crisis” blong wan lis blong help laen.)
-
Putum mo kipim wan baondri wetem olgeta we oli gat fasin blong abius taem yu luksave ol fasin blong abius mo putum ol limit long taem we yu mitim olgeta. Yu save talem se, “Mi filim se yu no respektem mi nao. Mi wantem toktok wetem yu be bae mi no mekem kasem taem yu yu tritim mi wetem respek mo kaen fasin.”
-
Lukaot help long wan profesenol kaonsela we i gat plante save abaot abius long saed blong filing mo ol risal blong hem. Samtaem ol man blong abius oli no save se olgeta oli stap abius. Olgeta i save lanem blong jenis sapos olgeta i wiling blong lukaotem help. Sapos rilesensip i stop, faenem profesenol help, tugeta wetem help blong Lod, bae yu save hil.
-
Faenem moa infomesen mo risos long abius.ChurchofJesusChrist.org.
Nomata situesen blong yu, save se i gat ol pipol we oli lavem yu mo wantem blong helpem yu. Mo taem yu tanem yu long Papa we i stap long Heven, Sevya, mo Tabu Spirit, hop mo hiling i posibol.