Kōpeļo̧k Kajoor eo an Bok in Mormon
Rijeje eo ej jokwe ilo Arizona, USA.
Ilo mijen eo aō ilo Philippines, eo m̧ōtta im n̄a kar kwaļo̧k juon katak eo ekajoor kōn aorōk eo n̄an ekkatak kōn Bok in Mormon kajjojo raan. Ilo jem̧ļo̧kin katak eo, eo m̧ōtta eaar kwaļo̧k juon naan in kam̧ool eo ekajoor kōn ekkatak jeje ko rekwojarjar me ijjan̄in kar ron̄. Eaar kam̧ool bwe riiti Bok in Mormon eo ej letok juon kajoor ekāāl n̄an mour eo an im ekar pen n̄an kōmeļeļeiki.
kar en̄jake eo an eo kōn Bok in Mormon me eaar ukōt mour eo an, im iaar kōņaan bwe en aō make.
Iaar kālet ilo joteen eo bwe inaaj bar riiti Bok in Mormon. Jān jinoin.
Iaar joļo̧k eļap iien ilo bukwien neeō im kōmeļeļeiki n̄an Anij ke ikōņaan en̄jake oktak im kajoor me ej itok jān Jetōb Kwojarjar.
Uwaak eo iaar bōke ej: Riit. Riit wōt.
Kōn menin ej ta eo iaar kōm̧m̧ane. Iaar jino riit kōn juon aoekāāl. Iaar kōmaat aō n̄an kajjojo eoon, jebta, im peij. Ke ij riit, iaar lo juon eoon me ekar uaaki kajjitōk ko aō, bōkļo̧k inepata ko aō, im kar jipan̄ kotak eddodo ko an ro ij katakin.
Ālkin juon allōn̄, iaar kile jet men itulowaō ke reoktak. Maron̄ eo aō n̄an iakwe ro jet eaar ļapļo̧k, eaar ļapļo̧k aō kōjatdikdik kōn ilju jeklaj, iaar maron̄ in buuļ jerbal ilo kajjojo raan, eaar ļapļo̧k aō mije jerbal eo; im iaar jino in en̄jake m̧ōņōņō.
Juon raan ke ij ekkatak iaar lo juon kout jān Būreejtōn Ezra Taft Benson (1899–1994), kar būreejtōn eo an Kabun̄ in: “Ewōr juon kajoor ilo [Bok in Mormon] eo enaaj jino itok n̄an mour ko ad ilo iien eo kwoj jino lukkuun ekkatak kōn bok in. … N̄e kwoj jino kwole im m̧aro kōn naan ko, kwonaaj lo eļapļo̧k m̧ōņōņō ilo mour eo am̧.”1
Ke ij ekkatak wōt, iaar jino lukkuun meļeļe ta meļeļein an ba. Ikar lo eļapļo̧k m̧ōņōņō ilo mour.
Reilikļo̧k, Iaar kile bwe juon iaan wunleplep eo kar likūt eō ippān eo m̧ōttā bwe in pād joteen eo n̄an ron̄ naan in kam̧ool eo an. Iaar en̄jake aolep m̧ōttan ko rem̧m̧an ilo mour—iakwe, kōjatdikdik, leke, jerbal, kije, im m̧ōņōņō—rekar ļapļo̧k.
Ekar juon meram̧ ekāāl ilo mour eo aō, im ikar jeļā bwe em̧ool.