Ilo Digital Wōt: Rūm̧m̧an Ded ro
Ekōjkan an Bok in Mormon kar Kōpeļļo̧k Lan̄ n̄an Eō
Ilo ad ekkatak Bok in Mormon iiō in, ikōņaan kwaļo̧k bwe ewōr juon aō naan in kam̧ool kōn kajoor im kareel eo emaron̄ in pād ilo mour eo am̧.
Rijeje eo ej jokwe ilo Utah, USA.
Eaar wōr aō naan in kam̧ool kōn Bok in Mormon jān iien eo im̧aan tata iaar riiti ke iaar dik wōt. Bōtaab ilo m̧ool, “ekkatak” jeje ko rekwojarjar eo aō ilo allōn̄ ko m̧okta jān Oktoba 2018 kweilo̧k eo eļap kar en̄jake eļap wōt an āinwōt bajjōk bajjōk. Kōn menin ke Būreejtōn Nelson eaar idajon̄jon̄e kōrā ro an Kabun̄ in n̄an riiti Bok in Mormon m̧okta jān jem̧ļo̧k in iiō eo, eaar āinwōt baj juon kūr eo iaar aikuji.
Kūr eo an eaar itok ippān jet kallim̧ur ko rekajoor barāinwōt. Eaar ba, “ilo ami lukkuun ekkatak, ij kallim̧ur bwe lan̄ ko renaaj peļļo̧k n̄an kom̧.” (“An Sister ro Bōk Koņaer ilo Aiintok Israel,” Liaona, Nob. 2018, 69).
Ilo aō kar ron̄jake, iaar en̄jake itok limo eo n̄an bar kallim̧ur n̄an bok eo iaar rūttoļo̧k n̄an kanooj in iakwe, im iaar jab maron̄ kōttar n̄an an lan̄ ko peļļo̧k n̄an n̄a.
Im raar kōm̧m̧ane. Ilo ekanooj lōn̄ wāween ko. Ālkin kadedeļo̧k idajon̄jon̄ in an Bok in Mormon, iaar joļo̧k iien kejekļo̧kjeņ kōn en̄jake eo iaar bōke im ekab de kar pād ippa. Ij bwilōn̄ kōn ta eo iaar ekkatak, ekōjkan aō kar en̄jake, im wōn eo ij erom jān ekkatak alen ko an reim̧we.
Ta eo Iaar Ekkatak
Ke iaar riiti Bok in Mormon ilo juon jon̄an eo em̧ōkaj jān aō kijon̄ kar kōm̧m̧ane, bwebwenato eo kar je ekar lukkuun in kaitoktok limo. Iaar en̄jake juon kain ekkejel n̄an ro me naan in kam̧ool ko im en̄jake ko aer kar kobaiktok ilo bok in.
Jān ļeo jein Nipai Sam, iaar ekkatak bwe jim̧we ej utiej. Jān Alma iaar ekkatak n̄an jamin bōjrak jān tōmak eo aō. Jān ļeo nejin, ej bwe ejjab rum̧ij n̄an kepaak Kraist im en̄jake kajoor in karreo eo an Pinmuur eo An ejjeļo̧k jem̧ļo̧kin (lale Mosaia 27; Alma 36). Jemen Kiin̄ Lamonai eaar im̧we eō n̄an kōm̧m̧an eļapļo̧k kaarmejet ko n̄an Anij (lale Alma 22:15, 18). Peoran eaar katakin eō n̄an ineem̧m̧an im āinwōt Kraist n̄e ij en̄jake jab meļeļe (lale Alma 61). Jān Ļeo jein im jatin Jared iaar ekkatak bwe ilo an ijo kuņaad aorōk, ejjab bwe; jej aikuj jipan̄ eo im kajoor in kōmaron̄ eo an Kraist. (lale Ether 2–3). Jān Moronai iaar ekkatak bwe men̄e jemaron̄ en̄jake ajimakeke, ilo m̧ool jejjamin (lale Mormon 8:3, 5).
Iaar ekkatak n̄an kōmakijkij aō kajjitōk ippān Irooj, n̄an dim ilo jar im kōn tōmak. Iaar ekkatak aorōk eo an kōjparok ļo̧o̧k ko im kwaļo̧k kam̧ool im wāween eo ejim̧we n̄an ukweļo̧k. Iaar ekkatak bwe Anij ej jeļā, bwe Kraist ej jouj, im bwe Rej juon ilo kōttōpar.
Iaar ekkatak bwe “[kwōjkwōj] ioon naan ko an Kraist” (2 Nipai 32:3) ej letok tōl eo ij aikuji n̄an mour eo aō.
Iaar ekkatak, bar juon alen, bwe Josep Smith ekar jab—im ejjab maron̄ kar—je bok in.
Ekōjkan Aō kar En̄jake
Ekar ke jide bwe in riiti al eo am Nipai (2 Nipai 4) ilo raan eo iaar en̄jake etōr jān jon̄an jān likjab ko im m̧ōjņo̧ ko aō? Em̧ool jaab. Eaar ke juon jidilo̧k eo ekam̧ōņōņō bwe iaar lo kean̄ eo an Kiin̄ Lamonai, “O ekōjkan an kabwilōn̄lōn̄ jerbal ko an Irooj, im ekōjkan aetokan An en̄taan ippān armej rein An” (Mosaia 8:20) ke iaar en̄jake ajimakeke ilo mālijjon̄ ko aō? Jaab! Ippān Anij, ejjeļo̧k jide ko, meanwōd ko rejouj rōweppān kar karōki, im iaar ribōk leen eo an men ko rellōn̄ ke iaar riit. Ilo m̧ool iaar en̄jake iakwe eo an Jemedwōj Ilan̄ n̄an eō im juon en̄jake in aenōm̧m̧an epen keidi ke iaar kobaik eō make ilo Bok in Mormon.
Ekar kajoor in kōmour eo an Rilo̧mo̧o̧r eo me iaar en̄jake eļaptata ilo aolepān aō riiti Bok in Mormon. Eoon ālkin eoon rej kam̧ool kōn jouj eo An, meanwōd, tenkwadik, im iakwe eo ejjeļo̧k jem̧ļo̧kin. Ke iaar riit kōn Jisōs Kraist, iaar en̄jake eļap kam̧m̧oolol kōn en̄taan eo An. Juon iaan kabwilōn̄lōn̄ ko reļļap tata iaar en̄jake ke iaar riit eaar en̄jake jeorļo̧k bōd eo edipio n̄an elōn̄ kāālet ko rejjab em̧m̧an kar kōm̧m̧ani iiō ko ļo̧k. Iaar en̄jake āinwōt n̄e Rilo̧mo̧o̧r eo eaar ekōnono n̄an n̄a kajju n̄e ij riit. Ilo būruwō iaar en̄jake naan ko, Ej kiiō iien n̄an wōnm̧aanļo̧k wōt. Kraist eaar lukkuun in kar letok kemour eo iaar aikuji.
Men̄e iaar jab lo jerkakepej Kraist eo āinwōt kar Rinipai ro (lale 3 Nipai 11), iaar en̄jake An pād ilo mour eo aō n̄e ij riit kōn E ilo Bok in Mormon. Em̧ool E emeļeļe kajjojo iaad im mālijjon̄ ko ejej uwaer, im epād Ippān kajoor eo n̄an lo̧mo̧o̧ren, kaenōm̧m̧an, im kōmour kōj.
Wōn Eo Ij Erom
Ilo aō ekkatak raan otemjej ilo Bok in Mormon, eļapļo̧k aō kōmmaan wa, jouj, kam̧m̧oolol, im kije. Ekkā aō tōn kadikļo̧k aō ļōmņak kōn n̄a make im kadikļo̧k aō inepata kōn men ko an laļ in.
Kōnke Bok in Mormon im Jetōb eo ej bōktok n̄an mour eo aō, ij juon m̧am̧a eo em̧m̧anļo̧k, lio pālele, nejin jiron̄, im m̧ōttan. Ij juon rikaļooran Jisōs Kraist eo eļapļo̧k an wujlepļo̧k.
Ekōjkan an juon bok maron̄ pād ie aolep uwaak ko? Ekōjkan an juon bok maron̄ kōtōprak ekanooj in ļap?
Juon wōt bok kar kōm̧m̧ane jān Anij ewōr ie kain kajoor eo. Im ijeļā ej lukkuun jān Anij.
Ejja āinwōt an Būreejtōn Nelson kar kallim̧ur, lan̄ ko raar lukkuun peļļo̧k n̄an n̄a, ilo elōn̄ļo̧k wāween ko jān aō kar maron̄ kar ļōmņake. Kōn menin inaaj wōnm̧aanļo̧k wōt n̄an riiti im ekkatak Bok in Mormon. Inaaj wōnm̧aanļo̧k wōt n̄an etale alen ko an im pukōt Kraist ijo kōnke bok in ej lukkuun in aolepān kōn E.