Rūm̧m̧an Ded ro
Ej Ijo Ij Jibadekļo̧k, Ejjab Ijo Em̧ōj Aō Pād Ie
Rijeje eo ej jokwe ilo Utah, USA.
Ikar bōk juon iaļ eo me ekar jepelļo̧k jān iaļ eo ejim̧we im aidik elōn̄ kōttan, ak ilo iien eo, ikar ekkatak bwe kajoor eo an Rilo̧mo̧o̧r im Pinmuur eo an em̧ool.
Mour eo aō ekar jab jejjet n̄an kōņaan eo aō me ikar ļōmņake.
Ke ej 18 aō iiō, ikar kōtmene bwe inaaj kōm̧m̧ane mijen eo aō, mare im ejjab to nej ejaake juon aō baam̧le n̄e 25 aō iiō. Kiiō, 32 aō iiō. Ikar jab kōm̧m̧ane mijen eo aō, ikar jāniknik ilo Kabun̄ in ilo aolepān mour eo aō ke ikar rūm̧m̧an ded. Ikar mare—jepel—im bar mare juon alen.
Kōnke ikar bōk juon iaļ eo me ekar jepelļo̧k jān iaļ eo ejim̧we im aidik elōn̄ kōttan, aolep iien ikar jab en̄jake ke ekkar aō pād ilo kabun̄ in. Ijoke, ikar kile bwe ewōr juon jikin n̄an n̄a. En̄jake ko aō rekar katakin eō bwe kajoor eo an Rilo̧mo̧o̧r im Pinmuur eo An em̧ool im bwe men eo eļaptata an aorōk ejjab ijo kwar pād ie, ak ia eo kwoj jibadekļo̧k kiiō.
Ij ļōmņak ikar jino kar kajjitōkin ta eo ikar tōmake kōnke ikar jab lukkun lōke bwe naan in kam̧ool eo aō ekar bwe an kajoor n̄an etal n̄an juon mijen. Ij keememejļo̧k ilo tōre kanni ikar kadiwōjļo̧k jān high school ikar ļōmņak āinwōt in, Ta eo n̄e naan in kam̧ool eo aō ejjab lukkun aō? Ta eo n̄e eto aō pedped ioon naan in kam̧ool ko an armej ro jet?
Menin ekar kabōņōņōik eō. Ikar kōņaan etal n̄an juon mijen, ak ij ļōmņak eļan̄n̄e en̄jake ko aō ilo mour in jetōb rekar bwe n̄an kōm̧m̧an bwe in āinwōt aō kar ļōmņake juon mijinede eo eļap tōprak ko an—juon eo me ebwe kajoor eo an ilo jetōb im ekar bwe an jeļā kōn gospel eo n̄an katakin armej ro jet.
Reilikļo̧k, ij aikuj kar kajjitōk ippān Anij n̄an jipan̄ eō meļeļe kapilōk eo kar letok ilo Katak im Bujen ko 124:97: “e en ettā Im̧aō, … im enaaj bōk jān Jetōb eo Aō, em̧ool eo Rikaenōm̧m̧an, eo enaaj kwaļo̧k n̄an e m̧ool eo kōn aolep men otemjeļo̧k, im naaj leļo̧k n̄an e, ilo ejja awa eo wōt, ta enaaj ba.”
Ak ijjeļo̧kin aō kajjitōk ippān Anij, ikar kōmaat aō maron̄ n̄an keidi kajoor ko aō ilo jetōb ippān ro jet, im ikar mijak bwe mōjņo ko aō renaaj kar dāpij armej jān aer tōmake gospel eo.
Kōn aō make āinwōt juon rūm̧m̧an ded, ikar wōnm̧aaņļo̧k wōt im pukot ta eo ikar tōmake. Ikar jab lo bōd kōn ta ko me ikar ļōmņak rej kāālōt ko aō make ko me rekar jab kwaļo̧k wōn n̄a āinwōt juon armej. Ikar jino katoļo̧k eō jān ro ikar iakwe er kōnke ikar jeļā bwe renaaj inepata kōn kāālōt ko ikar kōm̧m̧ani. Ijjeļo̧kin, ikar iiaio ippān ro me rekar jab lukkun kea kōn ta ko ikar kōm̧m̧ani. Juon raan ikar kajjieon̄ ilim dān in kadōk n̄an lale ewōr ta.Idaak dān in kadōk ekar erom juon iminene ilo mour eo aō im āliktata oktak limo bajjōk n̄an juon men eo me ikar kōm̧m̧an n̄an joļo̧k inepata ko aō aolep iien. Oktak ko renana ilo mour eo aō ilo iien eo rekar jab lukkun pedped wōt ioon juon wōt kāālōt; ak ekar lōn̄ļo̧k im ļapļo̧k. Ekar bōk ruo iiō im ijkab jeļā bwe kāālōt jiddik ko ikar kāālōti rekar tōl eō n̄an juon jikin eo ikar jab kōņaan pād ie.
Kiiō, ijjab ba bwe n̄an ekkatak m̧ool ko an gospel eo, kwoj aikuj en̄jake ta eo ikar en̄jake. Kōm̧m̧an ko aō ekar bōktok metak eo me ejjab n̄an n̄a wōt ak bar armej ro me ij iakwe er—me rekar jab aikuj bōk jikier. Eļap aō kam̧m̧oolol bwe ikar maron̄ kōttāik eō im kile bwe (1) Ikar inepata, im (2) ikar lukkuun m̧ōņōņō ke ikar mour kōn kien ko an Anij. En̄in kar juon men eo me ikar jeļā ippa make, juon me eo ikar rie im kwaļo̧k n̄an ro jet.
Ikar etal ippān bisop eo n̄an kōm̧m̧ani men ko rejim̧we, im jej ioon doon aolep iien n̄an kōpooj eō n̄an etal im mijen. Pepa ko aō rekar epaak aer dedeļo̧k ke ikar en̄jake im̧we n̄an lukkun kalikkar bwe bisop en meļeļe jet iaan kāālōt ko ikar kōm̧m̧ani. Bwebwenato eo am̧ro ekar jab pidodo, ak ekar ļapļo̧k jān kar kōņaan eo aō n̄an etal n̄an juon mijen, ikar kōņaan erreo im̧aan mejān Anij. Ikar kōņaan kwaļo̧k ta eo ikar kōm̧m̧ane ebōd im ikar likūt aolep men im̧aan Mejān bwe in maron̄ erreo.
Ejjab to tokālik, ikar pād ilo juon kweilo̧k in ukweļo̧k eo eaitok kitien Ekar kamijak ilo jet wāween n̄an kwaļo̧k m̧ool kōn ta eo iaar kōm̧m̧ane im̧aan mejān armej ro me rekar aō ritōl im ri jipan̄ iumin iiō ko, ak ke ikar reito reitak ilo ruum eo, ikar en̄jake aeņōm̧m̧an. Ikar maron̄ lo bwe rekar jutak ilikū n̄an meļeļe im jipan̄ eō. Ke ij rool, ikar en̄jake Jetōb ekar kam̧ool n̄an eō bwe jekdoon ta kāālōt ko, ikar kōm̧m̧ane ijo koņaaō im enaaj em̧m̧an aolep men. Anij im ritōl ro an ro me rekar iakwe eō rekar jerbal ippa n̄an jipan̄ eō tōpar ijo ij aikuj pād ie. Ikar rool im en̄jake iakwe eo Rilo̧mo̧o̧r im jeļā bwe ikar jab eļļā ioon Pinmuur eo An.
Juon jikin n̄an Jab Wānōk
Kōjekdoon aeņōm̧m̧an eo ikar en̄jake, ekar pen n̄an jelm̧ae kajjitōk ko jān armej kōn etke ikar jab etal n̄an mijen eo aō. Ke ikar wōnm̧aanļo̧k wōt ilo jerbal in ukweļo̧k eo aō kōn jipan̄ eo an bisop eo aō, ekar dikļo̧k im kar alikkar ke jerbale juon mijen ekar jab m̧ōttan ilju im jekļaj eo aō. Ikar aikuj pukot kilen n̄an wōnm̧aanļo̧k kōn mour eo aō. Ke ej 21 aō iiō, kōnke ikar jab ekkar n̄an kurup ko an mijinede ro rej kōpopo, mijinede ro rejkab rool tok, ak ro rej kōpopo n̄an mare ilubwiljin rūm̧m̧an ded ro, ekar pen aō en̄jake ke ikkar n̄an aolep jikin.
Jerā ekar pen. Jet leddik rekar oktak aer kōm̧m̧an tok ālkin aō kar ba n̄an er ke ikar jab jerbal in mijinede im bwe ikar jāniknik ilo kabun̄ in iumin juon tōre eaitok. Kōn juon unin ak ko jet, aolep ro ikar bwebwenato ippāer rekar jab erom̧ jera.
Ikar m̧ōņōņō bwe āliktata ikar mare ilo tampeļ, ak jet iien ekkā aō en̄jake ke ikar jab ekkar n̄an menin. Ekar wōr aō naan in kam̧ool, ak ikar jab maron̄ jeļā wāween aō kwaļo̧k, im ruum ko ilo mōn jar eo rekar āinwōt juon teej ijo me ro m̧ōtta rej lo likjab ko aō. Ikar ļōmņak bwe kōnke elōn̄ iaer rekar bōk mour ko me ikar kōņaan, rekar jab lukkuun lokjak āinwōt kar n̄a.
Juon raan bisop eo ekar kūr eō im letok aō kūr n̄an katakin doulul eo an em̧m̧aan ro. Ikar bwilōn̄, kōnke ikar etal n̄an kūlaaj ko an em̧m̧aan ro ruo alen ilo iiō eo ej jem̧ļo̧k ļo̧k. Kōjekdoon en̄jake ko aō rekar kakūmkūm eō, ikar bōk kūr eo. Ilo Jabōt eo aō jinointata n̄an rikaki, ikar lo bwe bolen ijjino in rikaki eo emake jenoļo̧k tata me rej kab ron̄ kake.
“Iakwe Em̧m̧an ro jeiū im jatū, Eta in Richard Monson. Ikar jab etal im mijen im eto ao kar jāniknik ilo aolepān mour eo aō ke ikar rūm̧m̧an ded. Ikar jab pād ilo kūlaaj ko an em̧m̧aan ro kōnke ijjab en̄jake bwe ekkar aō pād ie. Ijjab maron̄ uwaake aolep kajjitōk ko ami, ak ij kōjatdikdik kom̧ naaj bōk koņaami bwe jen maron̄ katak ippān doon. Eļan̄n̄e Em̧m̧an Ippami kōn mour eo aō, innem jenaaj wōnm̧aanļo̧k.”
Ikar kile bwe raan eo ikar maron̄ kwaļo̧k m̧ool n̄an ro jet im n̄an n̄a make bwe men̄e ijjab ļōmņak n̄a “wānōk” (juon eo ekar jerbal in mijinede, kar niknik ilo aolepān mour eo an, im ekar jab kōm̧m̧an bōd ko reļļap), ikar jab pād ilo ejja jekjek rōt in āin wōt kar er, im bwe men eo ne eaorōk. Bwilōn̄ eo aō, ikar lo bwe elōn̄ļo̧k jān juon iaan em̧m̧aan ro ro me ikar ļōmņak rewānōk rekar bar kōm̧m̧an bōd. Ikar ļōmņak ekar kōkajoor ļōmņak in n̄an kōj oalep bwe wānōk ejjab juon men eo emenin aikuj n̄an bōktok aorōk ko ad make n̄an kūļaaj ko ak ilo aolepān Kabun̄ in.
Tōre ko Reppen im juon Jokāālōt
Nana eo, aō niknik ilo Kabun̄ in ekar jab aitok kitien. Mour in pālele eo aō ekar pen, im ikar oktak n̄an mwil ko moktaļo̧kn̄an meļo̧kļo̧k inepata ko aō. Men ko reitok limoū kaki rekar jino katoļo̧k eō jān aō pād ilo mōn jar eo
Jilu iiō tokālik, ikar pād ijo ilaļ tata. Ikar aikuj kōm̧m̧ane juon kāālōt. Imaron̄ ke mour kōn gospel eo n̄an n̄a make kōjekdoon ta eo ej waļo̧k ilo mour eo aō? Ak ij ke pād wōt ilo marok? Ikar jeļā bwe wūjlepļo̧k ilo iaļ eo ekajim̧we im aeidik meļeļein meļo̧kļo̧k kōm̧m̧an ko renana ilo mour eo aō. Barāinwōt, ikdeleel ko aō n̄an bar rool tok n̄an Kabun̄ in ekar kalikkar bwe kōrā eo pāleeō im n̄a kom̧ro kar pād ilo iaļ ko reoktak jān doon. Ilo mour in pālele eo am̧ro ilo iien eo, em̧ōj kadede am̧ro jino būļāān e am̧ro jepel.
Ikar mijak. Ekar ejjeļo̧k alikkar ke kijejeto ko aō remaron̄ letok n̄an eō men ko rem̧m̧an ikar kōņaan ilo mour eo aō. Ak kāālōt eo aō ekar itok n̄an ta eo ikar ekkatak kake iiō ko m̧oktaļo̧k—bwe ikar m̧ōņōņō eļapļo̧k ilo aō kar mour kōn gospel eo Ikar kāālōt n̄an wūjlepļo̧k aō im likūt eō make ilo pein Anij, jekdoon ta eo enaaj waļo̧k. Jān kiiō m̧aanļo̧k, kar n̄a wōt im E.
Bar juon alen, ikar jino rool tok n̄an jar im bar jino kōkm̧anm̧anļo̧k mour eo aō. Juon iaan raan ko rekam̧ōņōņō tōre eo ikar bōk pepa in mālim eo aō n̄an bar deļon̄e tampeļ. Ikar lo aeņōm̧m̧an ilo tampeļ ke mour in pālele eo aō ekar jab em̧m̧an im āliktata ekar jem̧ļo̧k.
Kappukot Juon Men eo ej Kwaļo̧k Aorōkū
Āinwōt an kamijak kāālōt eo ikar kāālōt e, kōn en̄jake eo ikar ekkatak n̄an kile pein Anij ilo iaļ eo aō. Men̄e ikar tippo̧k, iiakwoj eo aō ekar jab jem̧ļo̧k. Ikar jab jiāe ippān jabdewōt. Ke ikar pedped ioon Rilo̧mo̧o̧r kōn aorōk eo aō, ekar jab pōjrak aō leļo̧k aolep aō kijejeto n̄an kajeon̄ n̄an ukōt ļōmņak ko an ro jet kōn n̄a.
Ikar en̄jake ke ekar EM̧M̧AN wōt ippa ke ikar jijet make iaaō ak ilubwiljin member ro ro me reoktak labōļ in mour in jetōb ko aer jān n̄a. Ikar kajjieon̄ bwe in jab no̧o̧je eō ak bwe in bwebwenato ippān armej ro ilo ward eo aō . Ikar m̧ōņōņō ilo ad pād ilo iien jar ko n̄an unleplep in jar eo.
Bōk aeņōm̧m̧an in ekar bar jipan̄ ilo aō kar jino jerā. Ikar jan̄in bar dām kein karuo ilo iiaio ko, ak kiiō ijeļā bwe ikar jab kakkure jon̄ak ko aō bwe kōnke ikar tippo̧k m̧oktaļo̧k. Ikar mour kōn gospel eo n̄an jon̄an maron̄ eo aō, im ikar maron̄ jerāik ro me rej mour kōn gospel eo n̄an jon̄an maron̄ eo aer barāinwōt.
Āliktata ikar ioon juon leddik eo erreo nejin Anij eo me ikar mareiki ilo tampeļ. Mour eo an ekar lukkun oktak jān n̄a, ak n̄e ej itok n̄an iakwe Rilo̧mo̧o̧r im meļeļe kōn Pinmuur eo An, kōm kar pād ilo juon wōt peij.
Iumin iiō ko, ikar ekkatak bwe in jab kōtļo̧k bwe mour eo aō m̧okta ak ļōmņak ko an armej ro jet ren kwaļo̧k kōn aorōk eo aō ij mour kake kiiō. Em̧ōj aō joļo̧k ļōmņak in ke tōprak ej pedped wōt ioon juon wōt iminene ilo mour in. Ejjab aolep armej rej kile ia eo ipād ie kiiō kōnke wāween aō kar tōpar ijin, im ej EMMAN wōt. Ejjab aō kōttōpar n̄an ukōt ļōmņak ko aer. Ej aō kōttōpar n̄an ukweļo̧k wōt im kepaakeļo̧k eō n̄an Rilo̧mo̧o̧r. Ej kōn E bwe, āinwōt Alma eo Edik ālkin an ukweļo̧k, imaron “harrowed up by the memory of my sins no more” (Alma 36:19). Imaron̄ pād ilo aeņōm̧m̧an ilo aō jeļā bwe ijo ij jibadekļo̧k ej tōlļo̧k eō n̄an Rilo̧mo̧o̧r—me eaorōk ļo̧k.