Batbayar im Bok in Pija eo
Eaar juon raan ekōttoto ilo Mongolia. Batbayar eo ratimjuon an iiō eaar etetal ļo̧k n̄an m̧weeo im̧ōn jān jikin uwe eo an baaj ālkin jikuuļ. Eaar lukkuun jiburlepe kopā eo an ilo kōto eo. Ejeraam̧m̧an, ejjab ettoļo̧k jen m̧weeo im̧ōņ jibun im jim̧m̧an, ijo eaar jokwe ie.
“Iakwe!” Batbayar eaar ba ke ej deļōn̄tok.
“Koruwainenetok,” Bubu eaar ba. “Iaar kōm̧m̧an jidik khuushuur n̄an kapijje.”
“Kom̧m̧ool!” Batbayar eaar tin jibwe juon iaer, jālele in bae ebwiļ.
“Kōttar! Jim̧m̧a eaar ba, jab kijōr in m̧ōn̄ā m̧ae iien eitok mijinede ro.” “Mōttan jidik reitok.”
Em̧m̧an ippān Batbayar n̄e mijinede ro jān kabun̄ eo an Bubu im Jim̧m̧a rej lotok. Aolep iien eļap an ekkatak jān er. Bōtaab ekar waļo̧k juon jorrāān.
“Renaaj ke bar kajjitōk ippa bwe in riiti Bok in Mormon?” Batbayar eaar kajjitōk. “Epen riit ippa.”
Bubu eaar ba, “En̄in unin aer bōktok juon bar bok rainin.”
“Bok in ta?” Batbayar eaar kajjitōk.
Jim̧m̧a eaar ba, “Kwonaaj loe.”
Tokālik mijinede ro raar itok. Raar jim̧or m̧ōn̄āiki bae in jālele eo enno Bubu eaar iōōke. Innām Batbayar eaar kajjitōk, “Jim̧m̧a ej ba komiro eaar bōktok juon bok n̄an n̄a.”
Sister Heitz eaar ba, “Ij tōmak enaaj em̧m̧an bok in ippam̧.” “Ebooļ pija ie.”
Batbayar eaar kalimjōk kōbar eo. Bwebwenato ko an Bok in Mormon eaar ba. Juon pija ilo kōbar eo ej kwaļo̧k an armej ro jek juon wa.
Batbayar eaar ba, “Ij keememej bwebwenato in.” “Em̧m̧aan in eaar jaje kilen jek wa eo. Kōn menin ekar jar. Im Anij ekar jipan̄ e.”
“Ejim̧we,” Sister Enkhtuya ekar ba. “Kwonaak ke kajjieon̄ riiti bok in? Innām kwon jar n̄an jeļā ta eo ej katakkin ej m̧ool.”
“Inaaj,” Batbayar eaar kallim̧ur.
Jen joteen eo eaar riit jān bok eo ippān pija ko. Eaar riiti bwebwenato eo kōn wa eo. Innām eaar jar. Eaar kiki ļo̧k ļōmņak kōn em̧m̧aan eo eaar jek wa eo im elmen an kar Anij jipan̄ E.
Jān iien eo, kajjojo bon̄ Batbayar ej riiti juon bwebwenato. Innām jar. Im kajjojo bon̄, ej kiki ļo̧k ļōmņak kōn ta eo eaar riiti.
Ke sister mijinede ro raar bar itok, raar katakin Batbayar eļapļo̧k kōn Jisōs Kraist. Batbayar eaar katak kōn rikanaan ro. Eaar ekkatak kōn kien ko an Anij. Eaar etal wōt im jar ippān Bubu im Jim̧m̧a. Im eaar riit im jar wōt.
Juon raan Batbayar eaar wōr juon men eaorōk n̄an jiron̄ļo̧k ro jibun im jim̧m̧an. Eaar ba, “N̄e ij riiti bwebwenato ko ilo bok in ippān pija ko, būruwō em̧m̧an an en̄jake.” “N̄e ij jar, ij en̄jake rem̧ool. Ij ļōmņak iaikuj in peptaij.”
Rainin, Batbayar ej juon membōr in Kabun̄ in. Eaar em̧m̧anļo̧k im em̧m̧anļo̧k ilo riit. Im ej riiti wōt Bok in Mormon kajjojo bon̄!