Pedped in Katak ko an Jerbal in Karejar
Aiintok Israel kōn Jerbal in Karejar
Jerbal in karejar ej juon iien em̧m̧an n̄an ļoor kapilōk an rikanaan eo n̄an aiintok Israel.
Būreejtōn Russell M. Nelson ekar kūr kōj n̄an jipan̄ aiintok Israel—“men eo eaorōk tata ej bōk jikin ilo laļ in rainin.”1
N̄an ro me rej kōņaan m̧ōttan ļo̧k jerbal in aiintok in an Israel, jerbal in karejar emaron̄ juon iien em̧m̧an. Kōnke jerbal in lo̧mo̧o̧r eo an Irooj rej aolep juon wōt jerbal, jerbal in karejar ej juon wāween eim̧we n̄an ukōt mour ko an armej ro. Jekdoon n̄e jej jerbal in karejar n̄an ro eto aer jab bar jar ak kūr er n̄an jipan̄ kōj ilo aer jipan̄ ro jet me rejjab kabun̄ in, jerbal in karejar ej letok iien ko rem̧m̧an n̄an aiintok Israel.
Ineek Eddo ko an Ro Jet
“Sip ko ad remaron̄ metak, jabwābwe, ak remaron̄ jako; āinwōt aer rilale sip, jej aikuj jet ro jinoin tata jej loe aikuj ko aer. Jej rōnjake im io̧kwe ilo ejjeļo̧k ekajet im leļo̧k kōjatdikdik im jipan̄ er kile unoojdikdik ko an Jetōb Kwojarjar eo.” —Bonnie H. Cordon2
“Ikar kalimjōk kōrā eo ej jijjet itūrū ke ij kelo̧k n̄an kapijukneņ ilo baļuun eo an 7:00 awa jibbon̄. Ekar wortōre nimen dān in kadōk m̧okta jān an baļuun eo kar kelo̧k, im ekar kajjitōk ippa eļan̄n̄e em̧ōj aō m̧are, ikar jino nana aō ļōmņak kōn kōrā in ilo ļōmņak eo aō.
“‘Aaet, ewōr emān nejū im emān jibū,’ ikar uwaake ilo an utiej buruō.
“Innām ekar ba n̄an eō juon men me ekar ukōt men otemjej. Ļeo pāleen ekar jako raan eo m̧okta ālkin an kar koma ium̧win ļalem raan. Men̄e ekar juon taktō ilo emergency, ekar jab maron̄ lo̧mo̧o̧ren e ālkin an kar ļōtļo̧k ilo iien kakkije eo aer.
“Ikar jook bwe aō lo arin armej im ļōmņak rekar lukkuun bōd. Ta eo inaaj ba n̄an e? Ke ij kaenōm̧m̧an eō, ikar en̄jake an Jemedwōj Ilan̄ lutōktok Jetōb eo An bwe in kar maron̄ jerbal in karejar n̄an kōrā in im kwaļo̧k jet iaan m̧ool ko raorōk an gospel eo.
“Ikar ekkatak bwe men̄e ekar ejjeļo̧k an kabun̄, ekar tōmak ilo Jisōs Kraist im ej riit Baibōļ Ke ikar kajjitōk ippān eļan̄n̄e ejeļā kōn Kabun̄ eo an Jisōs Kraist im Armej ro Rekwojarjar ilo Raan ko Āliktata, ekar uwaak bwe ejeļā jidik wōt. Ikar kwaļo̧k juon enaan jān kweilo̧k eo eļap jān Elder Richard G. Scott (1928–2015) etan, ‘The Eternal Blessings of Marriage,’ innām ikar kam̧ool kōn baam̧le n̄an indeeo im wāween an Jemedwōj Ilan̄ jeļā kajjier im iakwe kōj kajjojo. Ikar jeļā tokālik ke ej etal n̄an Hawaii ijo ekar rūttoļo̧k ie, im ikar rōjan̄e bwe en loļo̧k Laie Hawaii Temple.
“Kōm kar jepelļo̧k jān doon ilo airport eo ilo Salt Lake City, Utah. Eļap aō kam̧m̧oolol bwe Irooj ekar maron̄ kōjerbal eō, kōjekdoon bōd ko aō, n̄an tōpar kōrā in me ej aikuj iakwe im kaeņōm̧m̧an.”
John Tippetts, Utah, USA
Pedped in Katak ko n̄an Kōļmenļo̧kjen kaki
“Ekajet ko renana”
Mōkaj in ekajete armej emaron̄ dāpij kōj jān ad lo mour in kwojarjar eo aer (lale Matu 7:1).
“Lutōkļo̧k Jetōb eo An”
Lōke kallim̧ur ko an Anij n̄an leļo̧k ta eo ej ba ilo iien eo wōt (lale Katak im Bujen ko 100:5–6).
“Kar Ekkatak”
Kajjitōk ta eo ro jet rej tōmak, ron̄jake kōn tūriam̧o̧, im kautiej tōmak ko aer kōn aorōkier.
“Kar Kam̧ool ”
Pukot iien ko rem̧m̧an n̄an kwaļo̧k naan in kam̧ool eo kōn wāween an Irooj kar jerbal ilo mour eo am̧ (lale Mosaia 24:14).
“Kar Rōjan̄”
Kūr er n̄an mour kōn m̧ool bwe Jetōb Kwojarjar en maron̄ kam̧ool n̄an er (lale Jon 7:17; Moronai 10:5).
Lo̧mo̧o̧ren Membōr ro rej Kab Bar Rool tok
“Kōn iakwe āinwōt kein kōketak, menin bwilōn̄ ko renaaj waļo̧k, im jenaaj lo wāween ko n̄an boktok m̧aan im kōrā ro jeid im jatid ro me “rejaniknik” im karuwaineneik er n̄an gospel eo an Jisōs Kraist.” —Jean B. Bingham3
“Eto aō jab bar jar ium̧win jiljino iiō ko ke ļeo pāleeō im n̄a kom̧ro kar em̧m̧akūt n̄an juon jikin ekāāl. Būreejtōn eo aō ekāāl an Doulul eo an Kōrā ro ekar lotok eō, kajjitōk eļan̄n̄e remaron̄ jilkintok juon kōrā bwe en lotok eō. Kōn aō āliklik, ikar errā. Sister in ekar lotok eō kajjojo allōn̄, kōjekdoon an jakkar n̄an kidu—im ewōr juon nejū kidu eawiie! Jerbal in karejar eo an ekar wōnm̧aanļo̧k wōt ium̧win ruo iiō, im ekar kōm̧m̧an eļap oktak ilo n̄a.
“Men̄e lotok ko an rekar lukkuun m̧ool im ekkā an kar kajjitōkin eō kajjitōk ko me ekar tōl kōm n̄an bwebwenato ko kōn mour in jetōb. Men kein rekar kōm̧m̧an menin aō āliklik jidik, ak rekar im̧we eō n̄an kāālōt eļan̄n̄e ij wōnm̧aanļo̧k wōt ilo gospel in ak pād wōt ijo ij pād ie. Kāālōt ko aō rekar pen n̄an eō, ak ikar kāālōt n̄an loļo̧k ippān sister mijenede ro.
Ilo raan eo ikar etal n̄an kweilo̧k in jar eo ejkab juon kōttan ium̧win jiljino iiō ko, ikar mijak in delo̧n̄. Ke ij etal n̄an mōn jar eo, sister eo ej jerbal in karejar ippa ej kōttar eō, im ekar etetal tok ippa n̄an jikin jar eo. Ālkin menin, ekat bar rool likļo̧k n̄an wa eo waan, kajjitōkin eō ta eo emaron̄ kōm̧m̧ane n̄an jipan̄ eō ilo em̧m̧anļo̧k eo ilo aō epaake ļo̧k Rilo̧mo̧o̧r eo.
“Iien ko an sister eo ilo an lotok eō im an iakwe ekar jipan̄ eō bar rool n̄an m̧akūtkūt ko an kabun̄ in, im ij likūt kijejeto ko an āinwōt juon iaan menin letok ko reļļap me rekar letok n̄an n̄a. Eļap aō kam̧m̧oolol bwe ekar jutak iliki ilo iaļ eo aō n̄an rool tok n̄an Kabun̄ eo an Rilo̧mo̧o̧r eo.”
Name withheld, British Columbia, Canada
Pedped in Katak ko n̄an Kōļmenļo̧kjen kaki
“Lotok eō kajjojo allōn̄, kōjekdoon an jakkar n̄an kidu”
Ewi wāween am̧ kwaļo̧k am̧ kea kōn ro rej jerbal in karejar n̄an eok eļapļo̧k jān men ko jet? (lale Katak im Bujen ko 121:44).
“Kajjitōk ko”
Kajjitōk kajjitōk ko rekkar remaron̄ jipan̄ etale mour ko ad make. Keememej bwe jerbal in karejar ko ad ewōr juon aer unleplep eo eļapļo̧k jān bwebwenato.4
“Kōttar n̄a”
Aolep rej en̄jake aer ruwainene (lale 3 Nipai 18:32).
“Jutak likū ilo aō kar bar jepļaak”
Jipan̄ eo ad emaron̄ kōm̧m̧an juon oktak eaorōk n̄an ro rekar tippo̧k n̄an jepļaak n̄an Rilo̧mo̧o̧r im bōk kōmour (lale Hibru 12:12–13).
Jerbal in Karejar im Aiintok
“Ilo jabdewōt wāween ko me rej make waļo̧k im ekkā n̄an eok, kwaļo̧k ippān armej ro etke Jisōs Kraist im Kabun̄ eo An rej aorōk n̄an kwe. …
“… Jerbal eo am̧ ej n̄an kwaļo̧k ta eo kwoj en̄jake im tōmak im mour jokkun wōt juon ippān tōmak ko am̧.” —Elder Dieter F. Uchtdorf5
Jerbal in Karejare im Kwaļo̧k gospel eo rej ippān doon. Erein jet iaan wāween ko me jemaron̄ kobaļo̧k ippān ro m̧ōttad im rūtūrūr kōn jerbal in karejar—ak jerbal in karejar ilo ad kakobaiktok ro m̧ōttad im ro rūtūrūr:
-
Jerbal ippān doon. Pukot iien ko rem̧m̧an n̄an kūr juon m̧ōttam̧ ak ritūrūm̧ bwe en kobawaj ilo jerbal in karejar eo am̧ n̄an lale aikuj ko an ro jet. Kajjitōk ippāer n̄an jipan̄ eok kōpooj juon m̧ōn̄ā n̄an juon m̧am̧a ejkab wōr nejin, kōm̧m̧an jerbal ilo melan ko an rūtto ro ritūrūm, ak karreo mōn juon eo enan̄inmej.
-
Katakin doon. Ļōmņak n̄an kūr juon eo m̧ōttam̧ ak rūtūrūm̧ eo ejāja an pād ilo iien katak ko an mijenede ro ilo m̧weo mōer n̄an ioon mijenede ro, n̄an rie eok ilo am̧ kōm̧m̧an katak ilo m̧weo im̧ōm̧, ak etal ippam̧ n̄an kōm̧m̧an juon katak ilo m̧ōn juon armej.
-
Pukotļo̧k. Kōn eļapļo̧k ikkijeen jerbal in karejar n̄an ro me kar jitōn̄ eok n̄an loļo̧k er, komaron̄ barāinwōt loļo̧k ro jet n̄e kwoj lo bwe rej aikuj. M̧ōņōņō in ektak er n̄an iien jar ko. Kūr ajri ro n̄an m̧akūtkūt ko an ajri ro im jodikdik ro. Ta wāween ko jet jemaron̄ jerbal in karejar im aiintok?
-
Kōjerbal kein jipan̄ ko me Kabun̄ ekar letok. Kabun̄ in ej letok elōn̄ kein jipan̄ ko n̄an membōr ro n̄an jipan̄ er kwaļo̧k gospel eo. Komaron̄ lale jākjen eo “Missionary” ilo Gospel Library app, alooje “Come and See” bitio ko (ilo ChurchofJesusChrist.org/go/12011), im loļo̧k ComeUntoChrist.org n̄an ļōm̧ņak ko kōn kilen aiintok Israel ilo jukjukin pād ko ad.