Jerbal kōn Tōmak
Tiim eo ad iiō in ej pedped ioon naan ko “ilo̧k im kōm̧m̧ane,” juon ennaan ekajoor kar letok jen juon rikanaan eo etiljek ilo Bok in Mormon Nipai 1 Nipai 3:7. Ak m̧ōttan eo em̧m̧antata ilo eoon in ej waļo̧k ilo iien eo Nipai eaar kwaļo̧k bwe Irooj enaaj iien otemjej “kepooj juon iaļ” bwe jerbal eo An en dedeļo̧k.
Tōmak eo bwe Anij enaaj keppooj iaļ eo im̧aam̧ ej itok wōt jen tōmak eo ekajoor. Nipai eaar jeļā bwe n̄e Anij ekajjitōk jabdewōt men bwe en kōm̧m̧ane, Anij enaaj bar jipan̄ e kōm̧m̧ane jerbal eo. Im jejeļā bwe kōn tōmak im leke eo an Nipai ilo Irooj, ekar maron̄ in bōk pilej brass ko.
Āinwōt Nipai, jemaron̄ bōk tōmak n̄an “etal im kōm̧m̧ane.” Kwomaron̄ in jab meļeļe aolep iien “etke” eo itulikin kōmeļeļe ko ritōl ro im ro jinen im jemen ak im̧we ko jān Jetōb Kwojarjar. Eban alikkar aolep iien, ak emaron̄ im pen n̄an kōm̧m̧ane. Bwe “ippān Anij ejjeļo̧k men reppen ” (Luk 1:37). Ilo am̧ etal wōt kōn tōmak, kwonaaj lo bwe aolep iien ewōr juon an Anij jibadbad im karōk.
Anij eban kajjitōk ippām̧ n̄an kōm̧m̧an jabdewōt men Ejeļā kojjab maron̄ kōm̧m̧ane. Eban kōm̧m̧an bwe kwon likjab. Ak Emaron̄ kajjitōk bwe kwon kōm̧m̧ane jet men me ekitbuuj kajoor in tōmak im pedped ioon Jetōb n̄an tōl.
Kii eo n̄an bōk tōmak n̄an “ilo̧k im kōm̧m̧ane” ej kōļapļo̧k leke. N̄e ewōr am̧ leke ilo Irooj, kwoj leke bwe Enaaj kōm̧m̧an bwe kwon jokkon wōt juon ilo aolep jerbal. Ļōmņak kake—kar jilkintok eok n̄an laļ ilo iien in kōnke kopojak im maron̄ n̄an kōm̧m̧ane jerbal eo an Irooj ijin kiiō. Kar kālet eok n̄an mour ilo tōre in kōnke Irooj ej leke eok.
Kōjeraam̧m̧an ko kwoj būki kōn jerbal in tōmak im leke rekabwilōn̄lōn̄. Kwonaaj jeļā wōn kwe im jibadbad eo am̧ ilo juon jekjek im mije eo eļap; enaaj ļapļo̧k am̧ leke ilo Jisōs Kraist im Pinmuur eo An; im kwonaaj jeļā bwe, kōn jipan̄ an Irooj, eļap tokjam̧.