Ang Katapusang Pulong
Ang Ulohang Bato sa Pamag-ang sa Atong Pagtuo
Gikan sa Oktubre 1984 nga pakigpulong sa kinatibuk-ang komperensya.
Sa matag bag-ong templo kita adunay seremonya sa bato sa pamag-ang sa pakig-uyon sa tradisyon nga balik sa karaang mga panahon. Sa wala pa ang kinatibuk-ang paggamit sa kongkreto, ang pundasyon nga mga bong-bong sa gambalay gibutangan og dagko nga mga bato. Ang usa ka lungag kaluton, ug ang mga bato ibutang isip pundasyon. Sugod sa usa ka dapit sa pagsugod, ang pundasyon nga bong-bong paabton ngadto sa usa ka direksyon ngadto sa usa ka bato sa pamag-ang; dayon ang bong-bong paabton padulong sa sunod nga eskina, diin ang laing bato gibutang, diin ang bong-bong paabton ngadto sa sunod nga eskina, ug gikan niana ngadto sa dapit sa sinugdanan. … Ang katapusan nga bato nga gihisgutan nga ang ulohang bato sa pamag-ang, ug ang pagbutang niini mahimong rason sa dako nga selebrasyon. Uban niini nga bato sa pamag-ang nga nahimutang na, ang pundasyon andam alang sa dakong estraktura. Mao kana ang analohiya nga gigamit ni Pablo sa paghulagway sa tinuod nga Simbahan:
“Busa kamo karon dili na mga langyaw ug mga dumuloong, kondili mga katagilungsod sa mga balaan, ug mga sakop sa panimalay sa Dios;
“Kamo mga tinukod ibabaw sa patukoranan nga mao ang mga apostoles ug mga propeta, nga niini si Jesukristo mao ang ulohang bato sa pamag-ang;
“Diha kaniya ang tibuok nga tinukod nausa ug nagatubo ngadto sa pagka-templo nga balaan diha sa Ginoo” (Mga Taga-Efeso 2:19–21).
Kita aduna sa sukaranan nga bato sa pamag-ang diin kining bantugan nga Simbahan sa ulahing adlaw giestablisar sa Ginoo ug gitukod, “tibuok nga tinukod nausa.” Kini importante gayud kaayo sa buhat, ang pundasyon, ang suporta diin kini magbarug. … [Apan] gihisgutan nako ang ulohang bato sa pamag-ang, nga atong giila ug gitahud nga si Ginoong Jesukristo. …
Siya mao ang ulohang bato sa pamag-ang sa Simbahan nga nagdala sa Iyang ngalan, Ang Simbahan ni Jesukristo sa mga Santos sa Ulahing mga Adlaw. Walay laing ngalan nga gihatag ngadto sa mga tawo diin kita mahimong maluwas (tan-awa sa Mga Buhat 4:12). Siya ang tuboran sa dayong kaluwasan, ang tighatag sa kinabuhing dayon (tan-awa sa Mga Hebreohanon 5:9). Walay makatupong Kaniya. Wala gayud sukad. Wala gayud hangtud kanus-a. Salamat sa Dios alang sa gasa sa Iyang Hinigugma nga Anak, kinsa mihatag sa Iyang kinabuhi aron kita mabuhi ug kinsa mao ang ulohan, dili matarug nga bato sa pamag-ang sa atong pagtuo ug sa Iyang Simbahan.