Ang Hagit alang sa Templo
Ni Sister Joy D. Jones
Kinatibuk-ang Presidente sa Primary
“Ang mga kasingkasing sa mga anak mobati sa ilang mga amahan” (Doktrina ug mga Pakigsaad 2:2).
Usa ka Dominggo ang akong mga magtatambag ug ako mibisita og usa ka miting sa Simbahan. Mihatag kami og pakigpulong mahitungod sa templo ug espesyal nga mga butang nga mahitabo didto. Human sa miting, usa ka 12 anyos nga batang babaye nga ginganlan og Colby miduol nako ug milamano sa akong kamot. Nag-istorya mi mahitungod sa templo. Dayon gihagit nako siya sa pagpangita og family name nga dad-on ngadto sa templo.
Sa wala madugay, nakadawat ko og sulat gikan ni Colby. Ania unsay gisulti ni Colby kanako:
“Mipauli ko ug nakakita og bag-ong ngalan. Wala damha nga akong nakit-an ang ikatulo nakong apohan sa tuhod!
“Sa wala madugay ako miadto sa templo ug nabunyagan alang kaniya. Espesyal kaayo kadto tungod kay ang akong igsoong lalaki mibunyag nako ug ang akong papa mikumpirma nako alang kaniya.
“Mibati ko og kainit nga pagbati sa kaugalingon nga nakahatag og kalinaw. Gibati nako nga unsay akong gibuhat alang sa akong apohan nindot kaayo tungod kay karon siya makaadto na sa celestial nga gingharian aron magpuyo uban sa iyang pamilya. Alang sa nahibilin sa tibuok adlaw, nindot kaayo ang akong gibati sa kaugalingon.
“Nahibaloan usab nako nga walay usa nga nakaila kinsa ang mga ginikanan sa akong ikatulo nga apohan sa tuhod, mao nga pangitaon nako ang ilang mga ngalan ug dad-on usab kini ngadto sa templo!”
Pagkanindot nga ehemplo si Colby! Bisan pila pay inyong edad, kamo mahimong usa ka ehemplo sa inyong pamilya ug sa mga higala. Kamo mahimong mopakigbahin sa ebanghelyo sa tanan nga inyong nailhan—bisan sa inyong mga katigulangan!