Mga Panalangin sa Panglantaw sa Ebanghelyo
Ni Elder Gary E. Stevenson
Sa Korum sa Napulog Duha ka mga Apostoles
Gikan sa usa ka pakigpulong sa debosyonal, “Usa ka Panglantaw sa Ebanghelyo,” nga gihatag didto sa Brigham Young University–Hawaii niadtong Septyembre 19, 2017.
Ang panglantaw sa ebanghelyo makahatag kaninyo og mas klaro kabahin kon unsaon ninyo sa paghunahuna ang inyong mga prayoridad sa kinabuhi, pagsulbad sa mga problema, ug pag-atubang og personal nga mga tintasyon.
Mga litrato gikan sa Getty Images
Pagkadako nga panalangin nga mahimong miyembro sa Simbahan ni Jesukristo sa dispensasyon sa dihang ang pagpahiuli sa mga yawe sa gingharian ug ang katumanan sa panagna nagtugot nato sa pagsaksi pag-una “ang ebanghelyo mokaylap ngadto sa mga kinatumyan sa yuta, ingon sa bato nga gipikas gikan sa bukid nga walay gigamit nga mga kamot mokaylap, hangtud kini mopuno sa tibuok yuta” (Doktrina ug mga Pakigsaad 65:2).
Kini nga panagna, nga gihatag ni Daniel sa Daang Tugon ug dayon gibalik-balik niini nga dispensasyon, ingon og anaa sa taliwala sa katumanan niini samtang atong maobserbahan ang labaw sa 3,300 ka naorganisar nga mga stake sa Simbahan karon. Sa miaging 50 ka tuig, ang mga miyembro sa Simbahan mitubo gikan sa 2.1 ka milyon ngadto sa labaw sa 16 ka milyon.1
Isip talagsaon ngari kanako kining paspas nga pagtubo ug kausaban mao ang kamatuoran nga ang mga baruganan ug mga binuhatan sa ebanghelyo nagpabilin nga pareha, lakip sa balaang-gidumala nga modelo nga gipadayag alang sa Simbahan ni Jesukristo. Kini nga modelo nagtugot sa organisasyon sa mga stake, gihimo aron sa paghatag “alang sa usa ka dangpanan gikan sa unos, ug gikan sa kaligutgut sa diha nga kini ibu-bu nga walay pagkuto diha sa tibuok yuta” (Doktrina ug mga Pakigsaad 115:6).
Mga kaigsoonan, ang Ginoo manggihatagon kaayo sa mga panalangin nga Iyang ihatag kanato. Ang pagsabut sa mga panalangin mao ang paglihok sa atong pagkamasulundon sa mga sugo ug nga ang pagtuman sa mga sugo mao ang pagpakita sa atong gugma sa Ginoo mga bililhon nga mga pagtulun-an nga makat-unan. Ang mga baruganan sa ebanghelyo sama niini naghatag og importante nga panglantaw alang kanato.
Kini mosangpot ngadto sa duha ka mga punto nga gusto nakong hatagan og gibug-aton. Nahinumduman nako nga si Presidente Dallin H. Oaks, Unang Magtatambag sa Unang Kapangulohan, kaniadto mipakigbahin niining duha ka punto uban sa mga young single adult niadtong 2015.
Ipadayon ang usa ka Panglantaw sa Ebanghelyo
Si Presidente Oaks nakaingon nga ang “panglantaw nagpasabut nga makakita sa tanang kamatuoran sa makahuluganong relasyon, sa tibuok talan-awon.”2 Ania ang pipila ka butang nga inyong masabtan kon kamo motan-aw gikan sa panglantaw sa ebanghelyo:
-
Kamo mga anak sa mahigugmaong Langitnong Amahan (tan-awa sa Doktrina ug mga Pakigsaad 76:24).
-
Ania kamo sa yuta alang sa usa ka katuyoan, uban sa abilidad sa paghimo og mga pagpili (tan-awa sa 2 Nephi 2:27; 10:23).
-
“Kay kini gikinahanglan gayud, nga adunay katugbang sa tanan nga mga butang” (2 Nephi 2:11).
-
Si Jesukristo mao ang atong Manluluwas ug manlalaban ngadto sa Amahan (tan-awa sa 1 Juan 2:1; Doktrina ug mga Pakigsaad 110:4).
Ikonsiderar unsay mahitabo kon ang inyong panglantaw sa ebanghelyo mahimong mga lente nga inyong tan-awon diha sa matag aspeto sa inyong kinabuhi. Ang panglantaw sa ebanghelyo makahatag kaninyo og mas klaro kabahin kon unsaon ninyo sa paghunahuna ang inyong mga prayoridad sa kinabuhi, pagsulbad sa mga problema, ug pag-atubang og personal nga mga tintasyon. Kini sa tinuod makaapekto sa inyong kinatibuk-ang pagtan-aw sa inyong tibuok kinabuhi ug sa nagkalain-laing mga desisyon nga inyong pagahimoon.
Uban niini nga panglantaw, nasayud kita nga ang Ginoo gusto nga moambit kita sa sakramento matag semana ug nga kita magtuon sa mga kasulatan ug mag-ampo ngadto Kaniya matag adlaw. Agig dugang, kita nasayud nga si Satanas motintal kanato nga dili mosunod sa atong Manluluwas o maminaw sa hilom nga mga aghat sa Espiritu Santo. Dayon kita mas makahibalo nga ang kaaway naningkamot sa pagkuha sa atong kabubut-on ug abilidad sa pagbatok sa iyang mga paningkamot pinaagi sa adiksyon, lakip sa drugas ug pornograpiya.
Sa yanong pagtandi, ang mga paagi sa ebanghelyo naghatag nato og klaro nga pagsabut sa kaimportante sa paghimo og mga pamilya—pagpili nga magminyo ug pagpadako og mga anak diha sa pagkamatarung. Kini nga panan-aw nag-abli usab sa atong mga mata nga makakita nga ang kaaway gusto nga molaglag sa yunit sa pamilya ug libugon ang mga tahas sa pagkalalaki ug pagkababaye [gender], sa ingon mosangpot ngadto sa pagkunhod sa bili sa pagtuo sa katilingban sa paghimo ug pagtukod og mga pamilya.
Ipadayon ang Espirituhanon nga Pagbalanse
Si Presidente Oaks mipahayag: “Kon ang mga young adult adunay panglantaw- adunay kinatibuk-ang panan-awon, importante kini kanila nga magpadayon sa espirituhanong pagbalanse sa ilang kinabuhi. Sa paghimo niini, kamo kinahanglan nga maglikay gikan sa pipila ka mga kamadanihon sa kalibutan ug mobuhat usab sa mga butang nga gikinahanglan aron makapaduol ngadto sa Manluluwas.”3
Sa laing bahin, kamo adunay mga dinalian nga mga isyu ug mga prayoridad sa kinabuhi sa tanang gidak-on ug pagkalain-lain, ang tanan nagkinahanglan og pagtagad, pagtutok, ug paggiya. Ang listahan alang sa matag usa kaninyo tingali lahi ra base sa inyong personal nga mga sirkumstansya, apan anaa niini sa pagkatinuod kamo mangita og edukasyon, trabaho, kaminyoon, ug sa emosyonal ug pisikal nga kaayohan. Dayag lang, ang inyong hagit mao ang pagbalanse niining importante nga mga tahas sa kinabuhi batok sa inyong pagkaespirituhanon.
Si Presidente Oaks usab mitambag nga kinahanglan kamong magmabinantayon samtang inyong “igahin ang inyong panahon aron dili ninyo mapagutman ang inyong kaugalingon sa espirituhanon nga paagi panahon sa oras nga ang inyong nag unang mga kalihokan anaa og ubang mga butang. Kana nga baruganan nagpasabut ngano nga importante kaayo alang sa mga young adult…sa pagsunod sa tambag sa pagtambong sa mga miting sa Simbahan, pagserbisyo diha sa simbahan, paghimo og kada adlaw nga pagtuon sa kasulatan, paghimo og kada adlaw nga pag-ampo diha sa pamilya nga magluhod, ug pagserbisyo sa mga calling sa Simbahan.”4
Sa taliwala sa inyong personal ug nagkalain-laing mga panginahanglan, sa pagbalanse sa mga panginabuhian ug mga hagit sa kinabuhi uban sa inyong pagkaespirituhanon, kamo makaamgo nga ang pagbalanse makab-ot ra. Ang Ginoo wala magsugo kaninyo og butang nga dili ninyo mahimo. Nakadungog ko ni Presidente Thomas S. Monson (1927–2018) sa daghang okasyon nga mitambag nga “kinsa ang tawagon sa Ginoo, ang Ginoo mopasarang.”5 Ako nagtuo nga kini alang sa mga miyembro sa Simbahan.
Sama tingali kahadlok sa paghimo niini nga pagbalanse, ako mosaad nga usa sa labing dakong mga milagro sa inyong mortal nga pagpakabuhi mao ang inyong abilidad sa pagpangita og balanse tali sa inyong espirituhanon ug sa ubang importante nga mga tahas sa kinabuhi. Kini mahitabo sa paagi nga makatugot kaninyo dili lamang sa pagpadayon sa inyong pagkaespirituhanon ug sa mga tahas sa kinabuhi sa kahimtang karon apan usab sa pagtubo ug pagpalambo niining importante nga mga bahin.
Ang pinakadako nga rason nga kini posible mao nga ang Ginoo mao ang sentro. Siya mao gayud ang sentro nga bahin sa pagbalanse. Ug Siya adunay balaan nga tinguha diha kaninyo sa personal isip usa sa Iyang mga anak. Apan kini nga sangputanan gibase sa inyong tukma nga pagtutok ug pagpaningkamot sa pagpangita og balanse.
Gikan sa akong obserbasyon ug personal nga kasinatian, ingon og kita adunay kalagmitan sa atong tibuok kinabuhi nga mas magsalig bisan sa unsang paagi. Aron magpabilin ang balanse sa atong kinabuhi nagkinahanglan kini sa atong kanunay nga paningkamot ug pag-atiman. Aktibong mopili nga magpabilin nga makanunayon.
Makapaikag, kini mahimong dili mabalanse sa duha ka paagi. Tingali adunay mga panahon nga kamo makakaplag nga kamo kinahanglan nga magmabinantayon sa pagtutok og klaro sa inyong trabaho sa eskwelahan o propesyon, nga “mahimo ang pagserbisyo sa Simbahan sa oras na sa pagserbisyo sa Simbahan.”6 Hinoon, hinumdumi sa paghimo sa Ginoo nga sentro sa inyong kinabuhi aron kamo makakaplag sa inyong angay nga espirituhanong pagbalanse.
Ang Ginoo Motabang Kaninyo
Kon kita motuman sa panglantaw sa ebanghelyo, sayon ra sabton ang importante nga kamatuoran nga ang Ginoo motabang kanato. Ang usa ka sukaranan nga baruganan mao nga kita mga anak sa mahigugmaong Langitnong mga Ginikanan. Natural lang alang Kanila sa pagtabang nato sa tanang paagi aron makabalik sa atong langitnong panimalay.
Gusto ko nga mopakigbahin og ehemplo sa unsa nga paagi ang Ginoo makatabang kaninyo. Usa sa akong mga lider sa kabatan-onan, si Thad Carlson, mipakigbahin niini uban nako daghang mga tuig na ang nakalabay. Si Thad, nga bag-o lang namatay, adunay dako kaayong impluwensya ngari nako samtang ako nagtubo. Nagdako siya sa panahon sa Dakong Depresyon, ang ikasiyam sa 14 ka anak. Ang iyang pamilya nagpakabuhi pinaagi sa pag-uma ug pagpadako og kabakahan. Lisud sa kwarta kadto nga panahon, ug ang ilang labing dako nga katigayunan mao ang ilang panon sa kabakahan.
Sa pagkabatan-on ni Thad, usa sa iyang mga responsibilidad mao ang pag-atiman ug kon gikinahanglan, pag-atiman sa kabakahan sa pagsiguro nga kini makakita og labing maayong pagkaon—usa ka dako nga trabaho alang sa usa ka batan-on. Nahimo niya kini uban sa tabang sa usa ka nati nga baka kinsa nakahibalo gayud unsay buhaton sa gamay nga direksyon. Ang nati ginganlan og Old Smoky. Apan si Old Smoky adunay usa ka sayop: dili gayud siya gusto nga madakpan. Bisan kinsa ang moduol kaniya, siya modagan palayo, nakahibalo nga siya patrabahoon.
Usa ka adlaw, human madakpi si Old Smoky, mabutangi og busal ug montora, ang batan-ong si Thad misakay padulong ngadto sa pastuhan diin ang kabakahan nagsibsib. Ang yuta uga, ug mao usab ang pastuhan, apan si Thad nakakita nga ang kasagbutan sa gawas sa pastuhan daplin sa agianan sa riles sa tren nga mas taas ug mas berde. Mao nga naghunahuna siya nga iyang dad-on ang mga baka sa gawas sa gikoral nga pastuhan ug pasibsibon sila sa maanindot nga sibsibanan sa daplin sa agiananan sa riles sa tren.
Uban sa tabang ni Old Smoky, si Thad midala sa kabakahan sa gawas sa pastuhan, diin sila nagsugod sa pagbalik-balik subay sa daplin sa riles sa tren nanibsib sa mas maayo, mas berde nga kasagbutan. Ang nakontento nga mga baka ingon og naningkamot sa ilang kaugalingon, mao nga si Thad mikanaog gikan sa iyang gisakyan ug milingkod sa mga renda sa montora, nalingaw sa iyang palibut, nagdula ug nahimuot. Nagtan-aw mismo sa sibsibanan sa berde nga kasagbutan, si Old Smoky sa katapusan nakabuhi, ang iyang mga renda nakalighot gikan sa paglingkod ni Thad.
Kining kalma ug malinawon nga panahon misangpot sa dinalidali ug kalit nga paghunong sa dihang si Thad kalit nga nakadungog og lanog nga tingog gikan sa layo. Sirbato kini sa umaabut nga tren nga kusog nagdagan sa riles sa tren diin diha ang iyang kabakahan nga nagpahulay nga nagkatag diha gayud sa iyang atubangan! Nakahibalo siya nga ang mga sangputanan mahimong dakong kadaot ngadto sa kahayupan ug usab ngadto sa iyang pamilya kon dili dayon siya molihok sa pagkuha sa kabakahan balik ngadto sa pastuhan ug magpalayo gikan sa nagsingabut nga tren. Gibati niya nga dili gayud siya makapasaylo sa iyang kaugalingon sa wala pagtuman sa gisalig kaniya nga responsibilidad.
Si Thad daling mibarug ug midagan aron sa pagkuha sa mga renda ni Old Smoky. Si Old Smoky nga nakakita ni Thad nga nagsingabut ug dali nga midagan palayo kaniya, dili gusto nga madakpan. Naghangus ug desperado, uban sa mga imahe sa patay nga mga baka ug trahedya sa pamilya nga misulod sa iyang hunahuna, si Thad nasayud nga kinahanglan siyang molihok dayon.
Dayon iyang girekord unsay nahitabo: “Ang akong magtutudlo sa Primary mitudlo kanamo sa pag-ampo ug pagpalig-on sa mga pagtulun-an nga among nakat-unan gikan sa akong inahan. Walay laing mahimo, miluhod ko ug nagsugod sa pag-ampo alang sa panabang sa paghawan sa mga baka gikan sa agianan sa tren.”
Si Thad wala makadungog og tingog, apan usa ka klaro nga hunahuna miabut kaniya: “Tan-awa ang mga baka nga maglakaw uban ni Old Smoky ug siya dili modagan. Mao nga … karon nga nagdapat na ang imong mga tuhod sa yuta, idapat usab ang imong mga kamot sa yuta. Pagpakaaron -ingnon nga ikaw usa ka baka padulong ngadto ni Old Smoky.”
Miingon si Thad: “Gibuhat nako. Wala siya modagan. Gikuha nako ang iyang mga renda migiya kaniya ngadto sa koral, mikabayo sa iyang likod, ug kami mipadagan sama sa hangin aron sa pagpabalik sa mga baka ngadto sa pastuhan. Si Old Smoky dili kasarangan nga maalamon sa matag liko ug pagbalik.”
Unya, sa dihang si Thad diha sa high school, hingpit siyang nakaamgo nga siya nakadawat og klaro nga tubag sa iyang pag-ampo sa kritikal nga panahon sa panginahanglan. Nakaobserbar siya, “Ang mga anghel nangalagad ngadto ni Old Smoky lapas sa akong abilidad, ug ang among pamilya naluwas sa trahedya.” Unya siya miingon: “Kini mao ang una sa daghang mga pag-aghat nga [mi]abut ngari kanako. ‘‘Ug bisan unsa nga kamo mangayo sa Amahan diha sa akong ngalan, nga matarung, magtuo nga kamo makadawat, tan-awa kini ihatag nganha kaninyo’ (3 Nephi 18:20).”7
Kitang tanan adunay atong kabakahan nga hipuson gikan sa mga riles sa tren sa dili pa moabut ang tren. Ang atong mga kakuyaw moabut sa daghang lain-laing mga porma ug mga gidak-on. Ang uban sama ka seryoso sa makuyaw nga sitwasyon nga nasinati ni Thad, mga sangputanan nga naghulga sa kinabuhi o naghulga sa kalag alang nato o sa atong mga minahal.
Ang ubang mga sitwasyon nga atong giatubang tingali dili sama ka seryoso ang mga sangputanan apan bisan pa niana nakapabug-at sa atong mga hunahuna ug mga kasingkasing. Usa ka butang nga sigurado—matag usa nato adunay kalisdanan ug kasakit sa atong kinabuhi tungod kay kini kabahin sa atong mortal nga kasinatian. Apan hinumdumi, ang Ginoo motabang kanato!
Ganahan ko niini nga mga pulong nga makita sa Basahon ni Mormon: “Atong makita nga ang Dios mahunahunaon sa matag katawhan, bisan asa nga yuta nga sila anaa; oo, siya nag-ihap sa iyang mga katawhan, ug ang iyang kasingkasing sa kalooy anaa sa tibuok yuta” (Alma 26:37).
Kana nagpasabut sa matag usa kanato. Pagkadako nga kahupayan nga makahibalo nga ang Ginoo motabang kanato.
Pagtuo, Paglaum, ug Panglantaw sa Ebanghelyo
Sa pag-summarize, ako moawhag kaninyo sa paghinumdom sa pagpadayon og panglantaw sa ebanghelyo. Tan-awa ang kalibutan sa inyong palibut pinaagi sa ebanghelyo ni Jesukristo.
Ipadayon ang espirituhanon nga pagbalanse. Kitang tanan nag-atubang og mga hagit ug mga oportunidad sa atong nagkalain-laing mga tahas sa kinabuhi, ug kini maserbisyohan pag-ayo kon kita mobalanse niini uban sa atong pagtuo diha kang Jesukristo ug sa Iyang Pag-ula.
Sa katapusan, pagbaton og pagtuo ug paglaum nga ang Ginoo motabang kaninyo. Kini nga kahibalo maoy makatabang kaninyo nga masaligong moatubang sa mga hagit nga dili kalikayan nga kabahin sa inyong mortal nga misyon.