Mga Tingog sa mga Santos sa Ulahing mga Adlaw
Duha ka Pahina nga Puno sa Pasalamat
Elise Dahlen
Utah, USA
Paghulagway pinaagi ni Allen Garns
Ang akong papa nag-antus sa iyang tibuok kinabuhi gikan sa ubos nga pagtan-aw sa kaugalingon ug mga pagbati nga walay bili. Gipadako siya sa usa ka palahubog nga amahan kinsa kanunay nga mosulti kaniya kon unsa siya ka walay bili sa iyang pagtuo. Salamat, ang akong papa wala gayud mahimong usa ka palahubog, apan wala gayud siya mosulti nako ug sa akong mga igsoon nga siya mapasigarbuhon kanamo o midayeg namo sa mga butang nga maayo namo pagkahimo. Sa nagtubo pa, naningkamot ko nga mopahimuot kaniya, apan ako sa kanunay mibati nga ako dili kaayo maayong makapahimuot niya. Kini maoy nakaingon nga dili maayo ang among relasyon.
Usa ka tuig, gihisgutan nako kini sa akong maalamon nga bishop. Mitambag siya nako nga pagsulat sa akong papa magsulti kaniya sa tanang mga rason nga ako mapasalamaton kaniya. Kini lisud alang kanako. Lawom kaayo ang akong mga samad, ug ako dili gusto nga ang akong sulat sa pasalamat mahimong sulat sa kasuko. Mao nga nag-ampo ko. Uban sa Espiritu nga naggiya nako, ang mga rason nga ako mapasalamaton sa akong papa nagsugod sa pagpangabut. Nagkinahanglan kini og panahon, apan sa dihang nahuman nako, napuno nako ang duha ka pahina.
Akong gihatud ang akong sulat, wala makahibalo kon unsa kahay itubag sa akong papa. Apan ako nasayud nga ako dili makapili sa iyang tubag. Kinahanglan lang nako nga motan-aw sa akong kaugalingong kasingkasing ug mahinumdom ngano nga ako misulat sa sulat.
Pagkasunod buntag, nakadawat ko o tawag sa telepono gikan sa akong ina-ina. Siya naghilak. Misulti siya nako nga gibalik-balik sa pagbasa sa akong papa ang sulat. Miingon siya nako nga siya dili makaistorya nako tungod kay siya naghilak pag-ayo.
“Salamat!” miingon siya. “Gikinahanglan kini sa imong papa.”
Unya nianang adlawa, ang akong papa mitawag aron sa pagpasalamat nako. Mitawag siya matag adlaw sulod sa daghang mga adlaw aron sa pagpadayag kon unsa ka importante ang sulat ngadto kaniya.
Maayo unta nga ako makasulti nga ang among relasyon milagroso nga naayo, apan kami aduna pay daghan nga buhaton. Paglabay sa panahon, ang akong kasingkasing nagsugod sa pagkaayo, ug ang among relasyon milambo. Sa katapusan, ako nakapasaylo na niya.
Paglabay sa pipila ka tuig, human sa grabe nga pakigbisog sa kanser, ang akong papa namatay. Nakasiguro ko nga siya karon nakasinati na og dakong kalipay samtang ang Manluluwas mitabang kaniya nga mamaayo gikan sa katuigan nga pang-abuso. Nasayud ko nga ako nakasinati og pagkaayo pinaagi sa gahum sa Pag-ula ni Jesukristo. Ang Manluluwas nakasabut sa atong mga panginahanglan ug makatabang nato sa pagkuha sa negatibong epekto sa kasakit ug kasuko gikan sa atong mga kalag. Ako nasayud nga ang pagpasalamat, pagpasaylo, ug paghigugma mao ang gamhanan nga tambal.