Maisugon nga mga Ehemplo
Pagserbisyo sa Ginoo sa Kinatsila
Ang tagsulat nagpuyo sa Utah, USA.
Hunahunaa nga ang imong higala mitunol kanimo sa labing maayong libro nga iyang nabasa sukad. Imong giablihan ang hapin … ug nakadiskobre nga ikaw dili makabasa sa libro. Lahi ang pinulongan niini! Unsa ang imong buhaton?
Sa unang mga katuigan sa Simbahan, ang Basahon ni Mormon giprinta lamang sa Iningles. Si Presidente Brigham Young mitawag og duha ka misyonaryo sa pagsangyaw sa ebanghelyo didto sa Mexico ug mihubad sa Basahon ni Mormon ngadto sa Kinatsila. Apan sila nagkinahanglan og dugang tabang sa pagbuhat niini. Wala kaayo sila mahibalo nga tabok sa dagat, ang Dios miandam og usa ka tawo kinsa mohatag kanila sa eksakto nga tabang nga ilang gikinahanglan.
Si Meliton Gonzalez Trejo gikan sa usa ka adunahan nga pamilya sa Espanya. Nagtuon siya pag-ayo sa eskwelahan ug nahimong opisyal sa kasundalohan sa Katsila. Siya interesado kaayo pirme sa relihiyon, apan wala siyay nakit-an nga sakto. Usa ka adlaw nakadungog siya sa laing opisyal nga nakig-istorya sa grupo sa mga tawo kinsa mitawag sa ilang kaugalingon nga “mga Santos.” Sila nahisakop sa Ang Simbahan ni Jesukristo sa mga Santos sa Ulahing mga Adlaw, ug usa ka propeta sa Dios ang migiya kanila ngadto sa Rocky Mountains sa Estados Unidos. Si Meliton mibati og dakong tinguha nga makighimamat kanila. Miapil siya og biyahe sa militar ngadto sa Pilipinas, naglaum nga kini makatabang kaniya unya ngadto sa Estados Unidos. Apan si Meliton nagkapuliki sa iyang trabaho nga ang pagbisita sa mga Santos dili na kaayo importante.
Dayon si Meliton grabing nasakit. Nahinumdom siya ngano nga siya mianhi sa Pilipinas ug nag-ampo sa Dios mahitungod sa unsay iyang buhaton. Nianang gabhiona, si Meliton adunay espesyal nga damgo. Nasayud siya nga siya kinahanglang molarga padulong sa Rocky Mountains.
Sa dihang naayo na si Meliton gikan sa iyang sakit, nagpadayon siya sa iyang biyahe ngadto sa Estados Unidos. Miabut siya sa California niadtong Hulyo 4, 1874, ug mipaingon ngadto sa Salt Lake City.
Sa dihang miabut si Meliton sa Salt Lake, naproblema siya: makabasa siya og Iningles apan sukad wala makasulti niini. Dili siya makaistorya ni bisan kinsa! Apan siya nakahukom kon siya dili makaistorya sa mga tawo, siya mokuha sa ilang pagtagad sa laing paagi. Si Meliton misul-ob sa iyang uniporme sa Katsila nga sundalo ug nagmartsa balik-balik sa kadalanan sa siyudad. Sama sa iyang gilauman, daghang mga tawo ang nakamatikod niya! Sa katapusan nakit-an siya sa usa ka miyembro sa Simbahan nga ginganlan og Brother Blanchard, usa ka propesor sa unibersidad kinsa makasulti og Kinatsila. Si Brother Blanchard mitabang ni Meliton nga mahimutang sa Salt Lake ug mitudlo kaniya sa ebanghelyo. Sa wala madugay si Meliton nabunyagan.
Si Brother Blanchard mipaila usab ni Meliton ngadto ni Presidente Brigham Young. Si Meliton misulti ni Presidente Young nga labaw sa tanan, siya gusto nga mohubad sa Basahon ni Mormon ngadto sa Kinatsila.
Si Presidente Young mihangyo ni Meliton sa pagtabang sa mga misyonaryo kinsa moadto sa Mexico sa paghubad sa mga bahin sa Basahon ni Mormon ngadto sa Kinatsila. Si Meliton migahin og daghang mga semana sa paghubad sa Iningles nga mga pulong ngadto sa Kinatsila. Matag gabii iyang ribyuhon ang iyang hubad uban sa mga misyonaryo. Sila makasulti og Kinatsila apan mibati nga kining importante nga paghubad nagkinahanglan og lumad nga mamumulong sa Kinatsila. Sila nasayud nga si Meliton mao ang tubag sa ilang mga pag-ampo. Niadtong 1875 ang hubad gimantala. Kini gitawag og Trozos Selectos del Libro de Mormon (Pinili nga mga Tudling gikan sa Basahon ni Mormon).
Ang mga misyonaryo andam na karon nga moadto sa Mexico. Gikarga nila ang 1,500 ka kopya sa nahubad nga kasulatan ngadto sa likod sa kabayo ug nagsugod sa ilang panaw. Sa unang higayon, ang mga mamumulong sa Kinatsila nakahimo sa pagbasa sa Basahon ni Mormon sa ilang kaugalingong pinulongan! Bisan og si Meliton nagpuyo og liboan ka milya ang gilay-on didto sa Espanya, ang Langitnong Amahan migiya kaniya ngadto sa eksakto diin siya gikinahanglan. Tungod sa kaisug ug pagtuo ni Meliton, siya mitabang sa pagdala sa pulong sa Dios ngadto sa dili maihap nga katawhan.