Gikan sa Panaugdaog ngadto sa Pagkabunyag
Ni Elder Hugo Montoya
Sa Seventy
Ang inyong panaghigalaay ug matarung nga ehemplo makapanalangin sa inyong mga higala ug sa mga henerasyon nga moabut.
Illustrations by Brooke Smart
Sa dihang nag-edad ko og 17 anyos, nag-atubang ko og grabe nga pagpamugos sa kaedad sa akong high school. Ang akong mga higala dili pareho nako og mga mithi. Ang akong mga higala ug ako miapil sa daghang angay nga mga kalihokan sama sa basketball o football. Apan sila usab moinom og alkohol ug manigarilyo—duha ka kalihokan nga dili nako buhaton uban nila.
Usa ka adlaw usa ka grupo namo ang diha sa gawas sa among eskwelahan nagtuon alang sa usa ka eksamin nga among kuhaon nianang adlawa. Uban nako ang duha sa akong labing suod nga higala, sila si Juan ug Francisco (mga ngalan giusab). Nianang higayuna, dunay mipagawas og mga lighter ug mga sigarilyo. Nagtuo ko nga ang akong mga higala gilaayan sa pagtuon ug nakalimot nga diha ko. Nahibaloan nako nga ako nasayop sa dihang sila mitan-aw nako ug miingon, “Karon mao ang panahon alang ni Hugo nga makat-on unsaon sa pagpanigarilyo.”
Sa wala pa ko makahigayon sa pagtubag, sila si Juan ug Francisco miduol nako ug migunit nako sa mga bukton sa matag kilid. Ilang gigunitan ang akong mga bukton sa dihang dihay miduot og sigarilyo sa akong mga ngabil. Ang akong lawas diha-diha misalikway niini, ug akong giluwa ang sigarilyo ngadto sa yuta, layo nako. Sa wala madugay, gibati nako nga dunay kinumo nga miigo sa akong apapangig. Sila mihulga nako, nag-ingon, “Modagkot kami pag-usab og sigarilyo, ug ikaw kinahanglang makat-on sa pagpanigarilyo. Ayaw kini ilabay sa yuta. Kon buhaton nimo, dilikado.”
Nianang higayuna, nasayud ko nga ako anaa sa kadaut. Gipiyong nako ang akong mga mata ug daling nag-ampo nangayo og tabang. Sa dihang nahuman ko sa akong pag-ampo, ang sakyanan sa among magtutudlo mihunong ug miparking duol namo. Migawas sa sakyanan ang among magtutudlo ug nangutana namo unsay among gibuhat. Gibuhian ko sa akong mga higala. “Nag-andam mi alang sa eksamin,” gihatagan nilag kasiguroan ang magtutudlo. Miadto mi sa eskwelahan ug mikuha sa eksamin, ug ang sitwasyon natapos.
Bisan unsa kalisud kana nga kasinatian, akong gipasaylo ang akong mga higala sa unsay ilang gibuhat. Nasayud ko nga wala sila makasabut sa akong mga sumbanan ug ang akong desisyon sa pagsunod sa Pulong sa Kaalam, mao nga gipasaylo nako sila ug mipili nga dili magbaton og dili maayong pagbati ngadto kanila. Sa dihang nahuman kami sa pag-eskwela, mibiya ko padulong sa akong misyon apan nagpadayon sa pagsinulatay nila ni Juan ug Francisco. Misulat ko nila kanunay nagpakigbahin nila sa ebanghelyo ug sa akong pagpamatuod ni Jesukristo. Gidapit nako sila sa paghinulsol ug sa pagsimba. Sa akong dakong kasurprisa, usa nila misimba.
Kanunay kong modapit sa akong mga higala sa mga miting sa Dominggo kaniadto, apan walay usa ang midawat hangtud karon. Bisan og ako dili makauban ni Juan, ang akong mga igsoong lalaki ug ang akong amahan anaa diha sa pagtabang kaniya ug sa pagpakigdait kaniya. Ang akong pamilya midawat kaniya, ug si Juan mibati nga komportable kaayo sa simbahan. Nagsugod siya sa pagkausab sa hinay-hinay hangtud nga siya mihimo og desisyon nga magpabunyag. Nadasig ko alang kaniya ug gani mas nadasig sa dihang misulti siya nako nga siya nakat-on sa paghigugma ni Jesukristo tungod sa akong mga sulat. Sa dihang miuli ko gikan sa akong misyon, ako usab nakigsuod ni Francisco, ug human sa pipila ka bulan, siya ug ang iyang asawa nabunyagan. Karon, sila si Juan ug Francisco mao gihapon ang akong labing suod nga mga higala.
Kini nga mga panghitabo nakaapekto sa akong kinabuhi. Akong nakat-unan nga ang labing maayong paagi sa pag-impluwensya sa mga kinabuhi mao ang pagpuyo sa matarung nga paagi, paghigugma sa uban, ug pagtabang. Ang booklet sa Alang sa Kalig-on sa Kabatan-onan nag-ingon, “Aron makabaton og maayo nga mga higala, magminaayo ka usab nga higala. Pagpakita og tinuoray nga interes sa uban; pahiyom ug ipahibalo kanila nga kamo nagpakabana kanila.”1 Kini mao ang unsay gitabang sa Ginoo nga akong buhaton nila ni Juan ug Francisco. Tungod niini, ako adunay duha ka labing maayo nga higala nga sukad akong nailhan, ug karon nagtambayayong kami sa pagsuporta sa gingharian sa Dios isip mga miyembro sa Simbahan.
Kanunay tumana ang mga sumbanan sa Simbahan, bisan kon kamo anaa sa malisud nga sitwasyon sama nako. Ang Alang sa Kalig-on sa Kabatan-onan nagtudlo, “Samtang nagtinguha kamo nga mahimong higala ngadto sa uban, ayaw ipaubos ang inyong mga sumbanan. Kon ang inyong mga higala moawhag kaninyo sa pagbuhat sa mga butang nga sayop, barug alang sa katarung.”2 Bisan kon ingon og ang tanan naghimo sa unsay supak sa mga sugo, pagmalig-on tungod kay ang imong ehemplo gamhanan. Himoa nga kamo mao ang matang sa ehemplo nga mahunahuna sa inyong mga higala panahon sa ilang mga panginahanglan. Sa pipila ka sitwasyon sama nako, ang inyong pagpakighigala tingali mao ang butang nga makatabang kanila nga makat-on, maghinulsol, ug magpakabig.