Mga Hulagway sa Hugot nga Pagtuo
Wilson Di Paula
San José, Uruguay
Ang aksidente sa motorsiklo maoy nakaingon nga naparalisar si Wilson. Paglabay sa usa ka tuig ang iyang asawa namatay. Isip usa ka biyudo nga dunay duha ka gagmay nga mga anak nga babaye, si Wilson wala makahibalo unsay buhaton. Wala siya makahibalo kon aduna bay katuyoan sa kinabuhi. Si Wilson nagmasuk-anon unta. Hinoon, nagsugod siya sa pagpangita sa kamatuoran.
Cody Bell, litratista
Human ako naaksidente sa motorsiklo ug pagkamatay sa akong asawa, nahibilin nako ang duha ka batang mga babaye nga buhion. Wala gyud ko makahibalo unsaon nako sa pagbuhi ang akong mga anak nga babaye nga ako ania sa wheelchair. Kini nga aksidente hingpit nga nakapausab sa akong kinabuhi.
Ako adunay daghang mga pangutana. Nganong mahitabo ang dili maayong mga butang? Ako nagpakabuhi nga naningkamot sa pagbuhat sa sakto nga mga butang, ug ang akong asawa gikuha gikan nako ug ako nahibilin diha sa usa ka wheelchair, dayon ang mga doktor kinahanglan moopera sa ulo sa akong anak nga babaye aron pagkuha sa tumor. Nagsugod ko sa paghunahuna nga ang kinabuhi walay katuyoan.
Nakaamgo ko nga ako kinahanglan nga mangita sa kamatuoran. Giimbistigar nako ang nagkalain-laing mga relihiyon ug nakaplagan Ang Simbahan ni Jesukristo sa mga Santos sa Ulahing mga Adlaw. Gibati nako nga kini mao ang kamatuoran.
Akong nakat-unan nga adunay kinabuhi human niini nga kinabuhi, ug kon kita mamatay, posible nga makauban ang mga tawo nga atong gihigugma. Kini nakahatag nako og kalipay tungod sa 10 ka maanindot nga katuigan nga akong gikauban ang akong asawa.
Ang pagkakaplag sa ebanghelyo nakapausab sa akong tibuok kinabuhi. Nagsugod nga ako nakabaton og kalinaw sa hunahuna ug kalinaw sa tanlag. Ang kalipay misulod sa akong pamilya samtang kami mosimba matag Dominggo. Mopauli kami nga nalig-on. Nabunyagan kami ug sa katapusan nasilyo alang sa tibuok kahangturan sa templo sa Argentina.
Karon nagpadayon ako diha sa Simbahan. Nagserbisyo ko isip magtatambag sa bishopric, ug naningkamot nga makat-on gikan sa tanan nakong mga kasinatian, gikan sa tanang mga pagsulay sa kinabuhi. Nakahatag kini nako og kalig-on. Samtang naglingkod sa akong wheelchair sulod sa 20 ka tuig, ako nakat-on nga ang kalipay magagikan sa kaugalingon. Ang usa ka tawo makat-on matag adlaw. Tungod niana ako mapasalamaton.
Nakahibalo na ako karon nga adunay katuyoan nga aniaa sa yuta. Ania kita dinhi isip kabahin sa mahangturong plano sa Langitnong Amahan. Kita adunay Manluluwas kinsa mibuntog sa kamatayon ug nabanhaw. Ang pagkahibalo niini nakahatag nako og kalig-on. Karon, ako naningkamot nga makalahutay ug makapadayon. Ako adunay katuyoan ug ako nasayud nga samtang ako maningkamot nga magpuyo og takus nga kinabuhi, ako makabaton og mahangturong pamilya.
Bisan pa sa mga hagit nga giatubang ni Wilson ug sa iyang anak nga babaye nga si Sofia, ang ebanghelyo nakahatag nila og kalinaw, kalipay, ug kalig-on. Si Sofia nagpuyo sa iyang amahan sukad sa iyang operasyon. Si Wilson nakakaplag og kalipay sa pagserbisyo diha sa Simbahan.
Magluto samtang siya magmaniubra sa iyang wheelchair libut sa kusina mao ang usa sa daghang mga kahanas nga napalambo ni Wilson sukad sa aksidente nga nakaparalisar kaniya.
Nakakaplag si Wilson og paglaum ug kalig-on gikan sa Manluluwas samtang siya nagtuon sa mga kasulatan.
Ang mga misyonaryo miapil sa pamilyang Di Paula sa panihapon. Ang gugma ni Wilson sa ebanghelyo mao ang kalig-on sa iyang pamilya ug ngadto sa Simbahan.
Human sa usa ka seryoso nga aksidente ug sa kamatayon sa iyang asawa, nakapangutana si Wilson sa katuyoan sa kinabuhi. Siya nakakaplag sa katuyoan sa dihang nakaplagan ang ebanghelyo ni Jesukristo.
Si Wilson ug si Sofia nakakaplag og paglaum sa ebanghelyo. Ang paggahin og labaw sa 20 ka tuig diha sa wheelchair wala makapugong ni Wilson gikan sa pagserbisyo sa makahuluganong mga paagi.
Ang pahiyom ni Wilson naghatag og ebidensya sa espirituhanong kaabunda sa iyang kinabuhi. “Ang kalipay magagikan sa kaugalingon,” miingon si Wilson. “Ang usa ka tawo makat-on og daghan matag adlaw.”
Samtang sila nangaon, ang pamilyang Di Paula mipakigbahin labaw pa sa pagkaon uban sa mga misyonaryo, sila usab mipakigbahin sa ilang gugma ug pasalamat alang sa ebanghelyo.