Karika te Mwakuri n Ibuobuoki bwa e na Kakukurei

Te beku ma te tangira e na uota te kimwareirei nakon te tia anga ao te tia karekea.

Tamnei

Jesus with the leper

TE REBERA AE E TAEKINA KO RABWA, iroun John Steel

N tai tabetai kakaean te kukurei n te maiu aio e na taraa n ae ai aron te biri iaon te bwai ni biribiri. Ti biri ma tia biri ao ti bon namakina naba ae kanga ti aki nako n te tabo teuana. Irouia tabeman, iangoan te mwakuri n ibuobuoki nakoia raora e taraa n ae ti a anganaki riki ae mwaiti bwa ti na karaoia.

Ma Tamara are i Karawa e tangiria bwa ti na rinanon te kimwareirei ao e a tia n tuangira, “ao a riki aomata bwa aonga ni karekea te kimwareirei” (2 Nibwaai 2:25). Ao e reirei te Tia Kamaiu bwa te mwakuri n ibuobuoki nakoia tabeman e bon kakawaki ni mwakoron karekean te kimwareirei nakon maiura ao nakon maiuia tabeman.

Tera te Kimwareirei?

E a tia ni kaotaki nanon te kimwareirei bwa “te namakin ae e kaungaa te nano ao te kukurei.”¹ Burabeti ni bong aikai a tia ni kamataata bwa e nako mai iaa te kimwareirei ao e kanga ni kuneaki. “Te kimwareirei are ti namakinna akea reitakina ma bwaai ake a riki inanon maiura ao bwaai ni kabane a riki man katuruan raoi ara iango iaon maiura,” e taku Beretitenti Russell M. Nelson. “… E reke te kimwareirei man ao ibukin [Iesu Kristo]. Bon Ngaia ae e nako mai irouna te kimwareirei ni kabane.”²

Te Mwakuri n Ibuobuoki e Uota te Kimwareirei

Ngke e kana uaan te kai ni kamaiu Riaai, e kaonaki nanona n “te kimwareirei ae moan te bati” (1 Nibwaai 8:12). Te moan bwai ae tangiria bwa e na tibwaa uaan te kai anne ma ake e tangiriia.

Tauraoira ni buokiia tabeman e kona n uota te aekaki ni kimwareirei ae ai aron aei nakoira ao nakoia tabeman. E reireiniia taan iriiria te Tia Kamaiu bwa taian uaa ake ti karekei ngkana ti reitaki ma Ngaia e buokiira ni karekea iroura te kimwareirei ae bwanin (taraa Ioane 15:1–11). Karaoan Ana mwakuri ni beku ao n ukeriia ni kairiia tabeman Nakoina e kona ni karika te namakin ae uota te kimwareirei (taraa Ruka 15:7; Aramwa 29:9; Reirei ao Berita aika Tabu 18:6; 50:22). Ti kona n namakina te kimwareirei aei inanon naba namakinan te kakaitara ao te rawawata (taraa 2 I‑Korinto 7:4; I‑Korote 1:11).

E kaotia te Tia Kamaiu nakoira te katooto ae kororaoi bwa teuana te korakora n oin karekean te kimwareirei ni koaua n te maiu aei e bon reke rinanon te ibuobuoki. Ngkana ti karaoa te ibuobuoki nakoia tarira ao mwaanera n aron te Tia Kamaiu, ma te tangira ae itiaki ao te tangira inanora, ti kona n namakina te kimwareirei ae e riaon riki ae tii te kukurei.

“Ngkana ti butimwaea te [mwakuri n ibuobuoki] ma nanora ae e tauraoi, ti na … kaniiaki ao n riki bwa aomatan Tion ao n namakina te kimwareirei ae rianako ma ake tia tia ni buokiia iaon kawaira n riki bwa ana reirei,” e reirei Titita Jean B. Bingham, Beretitenti n te Bootaki n Aine ni Kabuta.³

Ti na Kanga ni Karika te Mwakuri n Ibuobuoki bwa e na Rangi ni Kakukurei?

A mwaiti kawai n uota te kimwareirei ae korakora inanon ara mwakuri n ibuobuoki. Aikai tabeua iango:

Ko na ataa te kantaninga n te mwakuri n ibuobuoki. A mwaiti bukin te mwakuri n ibuobuoki. N tokina, ara kekeiaki a na riai n titebo ma ana kantaninga te Atua n “uota te aki mamate ao te maiu ae akea tokina nakoia aomata” (Mote 1:39). Ni butimwaean ana kakao Beretitenti Russell M. Nelson ni buokiia tabeman iaon kawain te berita, ti kona ni kunea te kimwareirei ni irakin karaoan ana mwakuri te Atua.⁴ (Ibukin riki taian kantaninga iaon te mwakuri n ibuobuoki, taraa “Ministering Principles: The Purpose That Will Change Our Ministering,” inanon Tianuare 2019 Riaona.)
Karaoa te mwakuri n ibuobuoki ibukiia aomata tiaki te beku. E aki toki ni kauringiira Beretitenti Thomas S. Monson, “Tai kariaia ni katoka te kaanganga bwa e na boongana riki nakon tangiran te aomata.”⁵ Te mwakuri n ibuobuoki bon ibukin tangiraia aomata, tiaki ibukin karaoan te bwai teuana. N ara tai n rikirake n tangira n aron te tTa Kamaiu, ti na rangi n tauraoi nakon karekean te kimwareirei ae roko man buokaia tabeman.
Karika te Mwakuri n Ibuobuoki bwa e na Bebete. Beretitenti M. Russell Ballard Bonomwi ni Beretitenti n te Kooram n Abotoro n te Tengaun ma Uoman, e tuangiira: “A riki bwaai aika korakora man bwaai aika bebete man karako. … Ara mwakuri n akoi ao n ibuobuoki aika uarereke ao ni bebete a na bwarikoriko nako nanon te maiu ae onrake n te tangira ibukin Tamara are i Karawa, te kakaonimaki nakon ana mwakuri te Uea Iesu Kristo, ao te namakin ae rau ao ni kimwareirei ni katoaa te tai are ti kanakoa baira ni buokiia tabeman.”⁶
Kanakoa te bwarannano man te mwakuri n ibuobuoki. Tiaki tabem bwa ko na mwakuriia kamaiuakin temana. Anne bon imarenan te aomata n tatabemaniia ma te Uea. Tabera bwa ti na tangiriia ao ni buokiia ni kairiia nakon Iesu Kristo, are bon ngaia aia Tia Kamaiu.

Tamnei

Jesus with children

KRISTO AO ATAEI N ANA BOKI MOOMON, iroun Del Parson

Tai Katibanakoa Reken te Kimwareirei man te Ibuobuoki

N tabetai aomata aki waekoa n tuatua buokaia n te bwai are a kainanoia, ngaia are karaoan ara ibuobuoki tao bon te bwai ae a kainnanoia. Ma kairoroan baike ti iangoi iaoia aomata, bon tiaki te kaeka naba. Titiraki n anaa te kariaia imwain te mwakuri n ibuobuoki bon te iango ae tamaroa.

Unimwaane Dieter F. Uchtdorf man te Kooram n Abotoro n te Tengaun ma Uoman e karakina te tina ae akea buuna ae e reke irouna te aoraki ae te bwaoki—ao a manga ewekaki natina. Te auti are e teimatoa ititiakina e a moanna ni mangaongao ao ni barekareka. Bwai n amwareke ao kunnikai aika a tuai uatiaki a bwarietata.

N te tai are e namakina bwa akea te bwai ae e kona ni karaoia, a karebwerewe aine man te Bootaki n Aine iaon ana mataroa. Aki kangai, “Ko a manga tuangiira ngkana iai te bwai ae ti kona ni karaoia.” Ngke a noora te bwai ae riki, a waekoa naba ni karaoa te mwakuri.

“A kaitiaka te mangaongao, a uota te ota ao te itiaki nakon te mweenga, ao ni wetea raoraoia bwa e na uoti amwarake aika a na kainnanoaki riki. Ngke e a bane aia mwakuri ao ni kabo nakoina, a katuka te kairake n tina anne ma matana aika ranran—ran ni mata ni kakaitau ao n tangira.”⁷

Ngaiia ni kabane ake taan anga ao te tia karekea a namakina te kimwareirei inanoia.

Karikirakea te Kimwareirei ni Maium

Kabatiaan te kimwareirei, te rau, ao te kukurei n aron maium are ti kona ni karikirakea inanon maiura, bon kabatiaan riki are ti na kona n tibwaia ma tabeman n ara tai ni ibuobuoki. E reke te kimwareirei rinanon te Tamnei ae Raoiroi (taraa I‑Karatia 5:22 ao Reirei ao Berita aika Tabu 11:13). Bon te bwai ae ti kona n tataro ibukina (taraa Reitei ao Berita aika Tabu 136:29) ao ni kaoa nako nanon maiura. Aikai tabeua iango ni karikirakea te kimwareirei ibon inanon maiura:

Wareki am bwai. Inanon taraan maium, korei n am tienoo bwaai ake e tia ni kakabwaiako iai te Atua.⁸ Noori tamaroan nako bwaai ake a katobibiko.⁹ Taraia bwa tera ae e na konaa n tukiko man namakinan te kimwareirei ao korei kawai ake a na buoka katokana ke ko na mataata raoi iaoia. N tain te Itita aio, karekea te tai are ko na ukeuke ni karekea te itoman ae korakora ma te Tia Kamaiu (taraa Reirei ao Berita aika Tabu 101:36).
Kataneiako n atai katabeakim. Te kimwareirei e kona ni baiti n roko iroum n taai aika rau n am tai ni iango¹⁰ Rangi ni kakauongo bwa tera ae e uota te kimwareirei nakoim (taraa 1 Rongorongo 16:15). N tabetai kararoakin bwaai ake a kabonganaaki ibukin kanakoan rongorongo e na tau ni kataneiakim n atai katabeam.¹¹
Tai kabootaua arom ma tabeman. E taekinaki bwa te kabootau e na iraea kukureim. E kauring Bauro bwa naake “a bon baireia i bon i rouia, ni kabotaunariia ma ngaiia, ao a aki atai bwaai” (2 I‑Korinto 10:12).
Ukora te Kaotioti ae onoti ibukim. E reirei te Tia Kamaiu: “Ngkana ko bubuti, ko na anganaki te kaotioti iaon te kaotioti, te atatai iaon te atatai, are ko na atai kamimiin ao raun bwaai ni kabane—are a na uota te kimwareirei, are e uota te maiu ae akea tokina” (Reirei ao Berita aika Tabu 42:61).

Te Kakao ni Mwakuri

Ko na kanga ni karikirakea te kimwareirei are ko kunea ni maium rinanon te mwakuri n ibuobuoki?