“Aio te Maiu!”
Richard J. Anderson
Utah, USA
Kamataata n tetamnei iroun John Kachik
I rimwii n okira mwengau n tairikin te kamwaitoro teuana imwin karaoan marooro ni bitiobi aika mwaiti. I rangi ni kua. E a tia n rangi ni kakua te mwakuri inanon wiiki aika mwaiti, ao tabeu n au utu ao n te Ekaretia e kakorakora tabeu n te aro are I aki kona ni karaoi bwaai ni kabane ake I tuangaki bwa N na karaoi.
N te tairiki anne, N na karaoa au kaa bwa I aonga n nako ni mwakuri n te moaningabong are imwina. Ngke I karina au kunnikai ibukin mwakuri aika barekareka, I bita tabeu man te bitiobi nakon te mwakaeneke. I wene iaon tanon te karaati ae mwaitoro iaan te kaa ao ni moana au mwakuri. Bukin tera ae N na mwaitorotoro, ni kua, ao ni kamaraki bubuan waeu imwin ae I a tia ni mwakuri korakora n te bong anne? E bua au taotaonaki n nano ao ni moana te kauntaeka, te tataro ni bubuti nakon te Tama are i Karawa.
“Ko kona n ae Ko buokai teutana?” I taku. “I karaoa au kabanea n tamaroa n riki bwa te karo, te bumwaane, ao te bitiobi ae tamaroa ao ni maiuakin tuua. I kona ni beku n ae tamaroa riki ngkana I karekea au motirawa? Taiaoka buokai ni katia aei bwa I aonga n nako ni matu.”
N te tai ae waekoa, teniua taeka aika itiaki, ao ni mataata a roko nakon au iango: “Aio te maiu!”
“Tera?” I kaeka.
A manga roko riki taeka aikai: “Aio te maiu!”
E moanna n oota au iango ao nanou ngke a roko taeka n te kateniua n tai: “Aio te maiu!” A uota te rongorongo taeka aikai nakon tamneiu. I kunea bwa “ngaia” bon te maiu ae mamate, ao I rinanon te rikirake ae waekoa ae karaoaki bwa e na buokai n riki bwa te aomata ae tangirai Tamau are i Karawa bwa N na katotongnga. Ti tebo ma e kangai te Tamnei nakoiu, “Ko kantaninga te mwananga n te maiu aei bwa a na akea iai te korakai?” Ngke I teirake mai aontano ae timantiaki ae mwaitorotoro, I a kaokoro.
Ni kaineti ma aron ara kaeka nakoia, a kona n riki kataaki bwa bwaintituaraoi mairoun Tamara i Karawa ae tangira. E karekea ara tai ni kaitarai kataaki bwa ti aonga ni kona n rairaki Nakoina. Ngkana ti karaoia, ti kakabwaiakaki ma te reirei ao te rikirake n tamnei.
Taeka aika teniua aika roko n au iango n te tairiki ae kamwaitoro anne iaon tano ae timantiaki n au karaati e a tia ni kakabwaiaai n te maan ae raka iaon 35 te ririki. I kekeiaki n taraia bwa e na akea te kataaki ae e na bakataeaki. I noori kataaki bwa taai n reiakin bwaai ae I tuai n reiakin ni kawai tabeua.