Pagpangalagad sama sa Gibuhat sa Manluluwas
Kon buhaton nimo ang tanan sa pagtabang sa uban, ablihan sa Ginoo ang imong mga mata aron ikaw makakita uban sa gugma ug kalooy.
Tanan kita nakamatikud og usa ka higala nga dunay dili maayong adlaw o tawo nga nagmasulub-on o gibugal-bugalan sa eskwelahan. Tingali nakadungog ka mahitungod sa usa ka miyembro sa imong ward o branch nga nagsagubang og grabing hagit. Sa mga higayon nga sama niini, unsay pwede nimong buhaton?
Usahay lisud ang pagkahibalo unsaon nimo sa pagtabang. Daw mas mosayon kon maghulat ka og laing tawo nga molihok, apan may daghan kang pwedeng mahimo, bisan pahibaloon lang nimo ang mga naa sa imong palibut nga ikaw naghunahuna kaniya. Ang mga oportunidad naa ra sa atong palibut, ug bisan kanus-a nga ikaw mopakita og gugma, kabalaka, ug interes sa uban, ikaw nangalagad.
Personal nga Pagpangalagad
Pagpangalagad. Tingali nakadungog ka na niana nga pulong sa makadaghan bag-o lang sa simbahan. Sa miagi, gihisgutan nato kanunay ang mahitungod sa Manluluwas o mga propeta ug mga apostoles nga nangalagad, apan ikaw ba nakahunahuna na kon ikaw kaha may personal nga pangalagad?
Ang pagpangalagad nagpasabut sa paghigugma ug pagkabalaka alang sa uban ug sa paghimo sa mga butang nga buhaton sa Manluluwas kon Siya kauban pa nato karon. Ang pagpangalagad usa ka paagi sa pagtabang sa uban nga mobati sa gugma sa Langitnong Amahan ug matubag ang ilang mga espiritwal ug temporal nga panginahanglan.
Si Jesus “mianhi dili aron pag-alagaran, kondili sa pag-alagad” (Mateo 20:28). Nangalagad Siya samtang Siya “[n]agpangadto-adto sa paghimog mga kaayohan” (Mga Buhat 10:38). Isip Iyang mga disipulo, gihangyo kita sa pagsunod sa Iyang ehemplo. Aduna kitay personal nga pagpangalagad!
Apan dili kinahanglang mohimo ka og dakong proyekto sa pagserbisyo aron makapangalagad. Si Presidente M. Russell Ballard, Akting nga Presidente sa Korum sa Napulog Duha ka mga Apostoles, miingon: “Ang ubang mga oportunidad sa pagserbisyo pormal—diha sa atong pamilya, sa atong mga calling sa Simbahan, ug sa atong pag-apil sa mga organisasyon sa pagserbisyo sa komunidad. …
“[Apan] daghan sa mga oportunidad sa pagserbisyo dili pormal—walay assignment—ug moabut samtang motabang kita sa uban nga atong mahimamat dinhi sa biyahe sa kinabuhi.”1
Sa kasagaran, ang Kristohanong pagpangalagad mahitabo sa ginagmay, sinserong mga buhat nga imong gihimo matag adlaw.
Sa Tinagsa-tagsa
Dihang ang Manluluwas mipakita sa mga Nephite, gisultihan Niya ang tanan sa pagduol ug paghikap sa mga marka sa Iyang kilid ug sa Iyang mga kamot ug tiil. “Ug kini sila mihimo, miduol tagsa-tagsa hangtud silang tanan nakaduol” (3 Nephi 11:15; emphasis gidugang).
Dayon Iya silang gidapit sa pagdala sa tanan nga nagmasakiton, nasakitan, o “gitakbuyan sa tanan nga mga matang sa sakit … ug siya miayo kanila matag usa kanila nga gidala ngadto kaniya” (3 Nephi 17:7, 9; emphasis gidugang). Human niini Siya “mikuha sa ilang gagmay nga mga bata, sa tinagsa, ug mipanalangin kanila, ug nag-ampo ngadto sa Amahan alang kanila” (3 Nephi 17:21 emphasis gidugang).
Si Kristo Mibisita sa mga Nephite, ni Minerva K. Teichert
Dili kini gamay ra nga pundok sa katawhan. Ang kasulatan nagsulti kanato nga mga 2,500 ka mga tawo ang didto (tan-awa sa 3 Nephi 17:25). Apan ang Manluluwas sa gihapon migahin og panahon sa pagpang-ayo, paghupay, pag-awhag, ug pagpakita og gugma sa matag indibidwal.
Si Elder Ronald A. Rasband sa Korum sa Napulog Duha ka mga Apostoles mitudlo: “Dunay lawom kaayo ug mahigugmaong personal nga mensahe dinhi. Nangalagad si Jesukristo, ug nahigugma sa tanan kanato, nga usag usa.”2 Ang gugma nga gipakita ni Jesus ngadto sa usa maoy buot ipasabut sa pagpangalagad.
Mata nga Makakita
Ang Manluluwas mitabang niadtong mga anaa sa Iyang palibut. Si Jean B. Bingham, Kinatibuk-ang Presidente sa Relief Society, miingon nga Siya “mipahiyom ni, nakigsulti ni, nakiglakaw kauban ni, naminaw ngadto ni, mihatag og oras alang ni, miawhag, mitudlo, mipakaon, ug mipasaylo. Giserbisyuhan niya ang mga pamilya ug mga higala, mga silingan ug mga dili kaila, ug gidapit Niya ang mga kaila ug mga minahal sa pagpahimulos sa buhong nga mga panalangin sa Iyang ebanghelyo.”3
Si Jesukristo dunay mga mata nga makakita sa panginahanglan sa tanang naglibut Kaniya, ug mitabang Siya sa tanan kanila! Masunod nato ang Iyang ehemplo ug makatabang niadtong nagkinahanglan usab sa atong tabang.
Apan hingpit ang atong Manluluwas. Unsaon nato nga makakita sa panginahanglan sa uban ug makapangalagad sama sa Iyang gihimo? Miingon si Presidente Ballard: “Sa inyong pag-ampo sa buntag matag adlaw, pangayo sa Langitnong Amahan nga giyahan kamo nga makakita og oportunidad sa pagserbisyo sa usa sa Iyang bililhong mga anak. Dayon lakaw tibuok adlaw nga ang inyong kasingkasing puno sa pagtuo ug gugma, mangita og tawo nga katabangan. … Kon buhaton ninyo kini, ang inyong espirituhanong kasensitibo molambo ug makakita kamo og mga oportunidad sa pagserbisyo nga sa una wala ninyo masayri nga posible.”4
Lihoka ang mga Pag-aghat
Hunahunaa kini nga sitwasyon: Nakita nimo ang imong higala sa eskwelahan, ug makita nga daw may problema siya. Gibati nimong kinahanglan kang dunay buhaton para kaniya, apan nabalaka ka basin masamok nimo siya o mapakaulawan siya o ikaw mismo. Dayon nagsugod ka sa pagkabalaka kon espiritwal ba kaha kini nga pag-aghat o sa imoha lamang.
Usahay lisud ang pagkahibalo kon nakadawat ka ba og espiritwal nga pag-aghat aron makaalagad o kaha imo ra kining hunahuna, apan gitudloan kita ni Mormon kon unsaon sa pag-ila sa espiritwal nga mga pag-aghat: “Kana nga iya sa Dios nagdapit ug nagdani sa paghimo sa maayo sa kanunay; busa, matag butang nga magdapit ug magdani sa pagbuhat sa maayo, ug sa paghigugma sa Dios, ug sa pag-alagad kaniya, dinasig sa Dios” (Moroni 7:13).
Si Presidente Thomas S. Monson (1927–2018) miingon, “Kon kita mapaniiron ug magpakabana, ug kon kita mobuhat sa mga pag-aghat nga moabut kanato, kita makahimo og daghang kaayohan.”5
Ang Pagpangalagad Alang sa Tanan
Atol sa Abril 2018 nga kinatibuk-ang komperensya, si Presidente Russell M. Nelson mipahibalo nga: Ang Ginoo naghimo og importanting kausaban sa paagi nga kita moatiman sa usag usa. Ang mga kaigsoonan—tigulang ug batan-on—moserbisyo sa usag usa sa bag-o, mas balaang paagi.”6 Naglakip kini sa mga oportunidad sa pagserbisyo pinaagi sa managkompanyon nga pagpangalagad, apan ang pagpangalagad dili lang butang nga buhaton nato sa Dominggo o atol sa mga Mutual nga kalihokan. Dili lamang kini usa ka responsibilidad gumikan sa piho nga mga calling. Ang pagpangalagad para sa matag usa. Para kini sa tanang panahon.
Dihang gibunyagan kita, misaad kita nga “[makig]tambayayong sa usag usa nga mga alantuson, nga sila mahimo nga magaan; oo, ug [magma]andam sa pagbangutan uban niadto nga nagbangutan; oo, ug sa paghupay niadto nga nagkinahanglan sa kahupayan” (Mosiah 18:8–9). Ang pagpangalagad sa uban usa ka bahin sa unsay atong gisaad nga buhaton.
Si Bonnie L. Oscarson, kanhi Kinatibuk-ang Presidente sa Young Women, miingon, “Ang Ginoo nagtinguha nga mangita ka diha sa imong mga higala ug dayon mangalagad sama sa Iyang gibuhat.”7 Kon buhaton nimo kini, ablihan Niya ang imong mga mata aron makakita uban sa gugma ug kalooy unsaon sa pagserbisyo sa uban. Dili Siya mopasagad kanimo nga magtag-an-tag-an lang unsay imong buhaton. Iya kang giyahan kon unsaon nga maalagaran nimo sila sa mas maayong paagi.
Ang Pagpangalagad Magdala og mga Panalangin
Miingon si Presidente Nelson “Kita isip mga sulugoon [sa Ginoo] mangalagad ngadto sa usa, sama sa Iyang gibuhat.”8 Dili lamang kini makapanalangin sa uban; mopanalangin usab kini kanato.
Si Elder Dieter F. Uchtdorf sa Korum sa Napulog Duha ka mga Apostoles miingon: “Samtang atong ipaabut ang atong mga kamot ug kasingkasing ngadto sa uban sa Kristohanong gugma, usa ka talagsaong butang ang mahitabo kanato. Ang atong kaugalingon nga espiritu mamaayo, mas molambo, ug mas molig-on. Kita mamahimong mas malipayon, mas malinawon, ug mas madawaton sa mga paghunghong sa Balaang Espiritu.”9
Gipakita ni Jesukristo ang dalan ngadto sa mas buhong, mas malampusong kinabuhi. Ang pagpangalagad sama sa Iyang gihimo magdala og tinuod nga kalipay ug pagbati nga kalinaw ug kamaya sa imong kinabuhi.