“Ako Man ang Mao Ako”: Mga Simbolo ni Jesukristo sa Daang Tugon
Labi na dinhi sa karaang rekord, kinahanglang pangitaon si Jesukristo o posibling dili Siya makit-an.
Kahayag ug Kamatuoran, ni Simon Dewey
Samtang gitago ni Moises ang iyang nawong, ang puno sa kalooy nga mga pulong sa Ginoo nga naggikan sa nagdilaab nga sampinit [o sagbut] daw og pamilyar: “Nakita ko pag-ayo ang kaguol sa akong katawhan … ; kay naila ko ang ilang kalisdanan;
“Ug nanaug ako sa pagluwas kanila. …
“Ug miingon si Moises sa Dios, Ania karon, kung ako makadangat sa mga anak sa Israel, ug magaingon ako kanila, Ang Dios sa inyong mga ginikanan nagsugo kanako nganhi kaninyo, ug kung sila mangutana kanako, Kinsa ang iyang ngalan? unsa ang igatubag ko kanila?
“Ug mitubag ang Dios kang Moises: AKO MAN ANG MAO AKO: Ug miingon siya, Mao kini ang igaingon mo sa mga anak sa Israel, Ako man mao ang nagsugo kanako nganha kaninyo” (Exodo 3:7–8, 13–14).
Nailhan sa karaang Israel isip Ginoong Jehova, ang premortal nga si Jesukristo nagpaila sa Iyang kaugalingon nga mao ang tinubdan diin ang katawhan makahangad alang sa katubsanan. Mga liboan ka tuig human niadto, gipamatud-an og balik ni Jesukristo ang Iyang gisaad nga kaluwasan sa modernong Israel pinaagi niini nga mga pulong: “Paglipay, ug ayaw kahadlok, kay Ako ang Ginoo anaa uban kaninyo, ug mobarug diha kaninyo; ug kamo magpamatuod kanako, gani si Jesukristo, nga Ako ang Anak sa buhi nga Dios, nga Ako mao kaniadto, nga Ako mao karon, ug nga Ako mao ang moabut” (D&P 68:6; emphasis gidugang).
Ang mga kasulatan, ang mga pulong sa kinabuhi, gidesinyo nga aron ang mga anak sa Dios sa matag henerasyon magtutok kang Jesukristo alang sa kaluwasan gikan sa sala ug kamatayon ug sa tanan natong yutan-on nga mga suliran. Ang Daang Tugon labut gihapon; sama sa ubang volume sa kasulatan, gituyo kini aron ang atong mga kasingkasing ug hunahuna mobati ngadto sa atong Tigluwas, ang Ginoo nga si Jesukristo. Apan labi pa dinhi niining karaan nga rekord, kinahanglang pangitaon Siya o posibling dili Siya makit-an.
Kon magsiksik mahitungod ni Kristo diha sa bisan unsang kasulatan, makatabang ang padayon nga pagpahinumdom sa atong kaugalingon unsay atong gipangita. Si Jesukristo ang tinubdan sa kinabuhi! Sa makalilisang kaayong mga problema sa espiritwal ug pisikal nga kamatayon nga maoy resulta sa Pagkapukan, si Kristo maoy mahangturon nga sulbad alang sa Israel. Gipahayag ni Lehi, “Siya mihalad sa iyang kaugalingon … sa pagtuman sa katuyoan sa balaod” (2 Nephi 2:7; emphasis gidugang). Mao kana ang tubag—ang Manunubos sa Israel, ang Talagsaong “Mao Ako”—nga atong pangitaon kon magsiksik sa mga kasulatan. Diha sulod sa balaknon ug sa kasagaran karaang pinulongan sa Daang Tugon, bisan pa, ang mahangturong mga problema—ug si Jesukristo, ang solusyon—dili sa kanunay dali nga makita. Bisan pa, makita ra si Jesukristo pinaagi sa dugang nga pagsiksik, naghulat nga makita diha sa karaang mga sugilanon.
Kon ibutang nimo sa imong hunahuna ang ngalan sa Ginoo nga gipaambit ni Moises sa Bungtod sa Sinai—“Mao Ako”—hunahunaa ang daghang butang nga si Jesukristo mao niadtong mobutang sa ilang pagsalig diha Kaniya. Ang mosunod nga mga ehemplo nagsimbolo sa mga pagtulun-an gikan sa Daang Tugon nga gidesinyong mopabati sa atong mga kasingkasing ug hunahuna ngadto sa Ginoo nga si Jesukristo alang sa kaluwasan.
Mao Ako … ang Kordero nga Gipatay alang Kaninyo
Mananap nga Isakripisyo ug mga Sinina nga Panit
Sa wala pa papahawaa si Adan ug si Eva sa Tanaman sa Eden, gisininaan sila sa Ginoo og mga sinina nga panit sa mananap nga itabon kanila. Diha sa Daang Tugon, ang pulong nga pag-ula, sa managlahi nga matang, makita sa 81 ka higayon. Sa 73 ka higayon nga makita kini, ang orihinal nga Hebreohanon nga pulong mao ang kaphar, nga sa literal nagpasabut nga “pagtabon.”
Human nga gipabiya sila sa tanaman, si Adan ug si Eva gisugo nga mohalad sa unang natawo sa ilang mga hayop isip halad sa Ginoo. Usa ka anghel misugo kanila sa wala madugay nga ang pagbuhat niini “usa ka pagkasama sa sakripisyo sa Bugtong Anak sa Amahan” (Moises 5:7).
Ang mga paghalad og mananap nagpadayon ubos sa balaod ni Moises, kadungan sa ritwal nga pagtabon niadtong moapil sa mga ordinansa sa pagkapari [priesthood].
Kon makigsaad kita sa Ginoo ug makadawat sa Iyang balaan nga mga ordinansa, ang Iyang Pag-ula motabon kanato aron dili kita mabantang sa tibuok nga mga epekto sa Pagkapukan ni Adan. Si Jesukristo tinuod nga mao ang Kordero sa Dios nga gisakripisyo alang kanato aron dili na kita maubos pa sa mga epekto sa sala ug kamatayon.
Genesis 3:21; 37:3; Exodo 40:14–15; Ezequiel 16:1–12; Mateo 22:11–12; Mga Taga-Galacia 3:26–29; 1 Nephi 11:21, 32–33; Alma 34:14–16; Moises 5:5–8; 7:47
“Ako mao … ang Tinapay sa Kinabuhi”
Manna
Samtang si Moises ug ang mga anak sa Israel mipanaw gikan sa Ehipto padulong sa gisaad nga yuta, misalig sila sa mga kalooy sa Ginoo alang sa inadlaw nga tinapay. Gisangkapan sila sa Ginoo og tam-is nga “tinapay gikan sa langit,” nga gitawag sa katawhan og “Mana” (gihubad nga “Unsa kini?”). Kadtong nanagtigom sa tinapay matag adlaw ug nagpabiling matinud-anon sa Ginoo ug sa Iyang propeta nakabaton og padayon nga kinabuhi sa tibuok nilang panaw sa kamingawan.
Si Jesukristo mao ang Tinapay sa Kinabuhi; mianhi Siya sa yuta gikan sa Langit sa pagdala og kinabuhi matag adlaw sa atong mortal nga panaw. Samtang magtigom kita sa Iyang mga pulong matag adlaw, makasinati kita sa katam-is ug kalagsik nga anaa pinaagi Kaniya sa tibuok natong panaw sa pagka-mortal.
Exodo 16:4, 12–21, 31; Deuteronomio 8:2–3; Juan 6:26–35, 48–58, 66–68; 3 Nephi 20:8
“Ako Mao … ang Tinubdan sa Buhing Tubig”
Tubig gikan sa Bato sa Horeb
Dihang ang mga anak sa Israel giuhaw og tubig didto sa kamingawan, miduol si Moises sa Ginoo. Gisugo si Moises sa pagbunal og usa ka piho nga bato sa Horeb (sa Bungtod sa Sinai) gamit ang sungkod nga gihatag kaniya sa Ginoo. Sa iyang paghimo, miagas ang tubig gikan sa bato nga nakasuporta sa kinabuhi sa minilyon sa nagapanaw nga mga Israelite.
Si Jesukristo mao ang Bato sa Israel; dihang gidapatan Siya sa Kalbaryo, ang dugo miagas gikan sa Iyang lawas. Ang dugo ni Kristo magbunga diri kanato og kinabuhi! Atong maangkon ang kinabuhi nga anaa sa maulaon nga dugo ni Kristo kon sundon nato ang mga propeta kinsa gihatagan sa mga yawe aron sa pagdala og buhing tubig gikan Kaniya.
Exodo 17:1–6; Numeros 20:8, 11; Juan 4:10–15; 1 Mga Taga-Corinto 10:1–4; D&P 28:2
Ako … Ang Imong Tig-ayo
Bitin nga Giisa Pataas sa usa ka Tukon
Ang mga kalisud sa ilang panaw maoy hinungdan nga nangreklamo ang mga anak sa Israel, nagbagulbol batok sa propeta ug sa Ginoo. Isip resulta, gitugot sa Ginoo nga mapaakan sila sa makamatay nga mga bitin, nga mipatay og daghan. Nag-ampo si Moises nga wagtangon sa Ginoo ang mga bitin; apan hinoon, ang Ginoo mihatag og paagi aron malikay ang mga tawo sa pagkamatay kon sila mapaakan. Ang buhat nga gikinahanglan aron sila maayo mao ang pagtan-aw hangad sa bitin nga bronse nga gibutang sa usa ka tukon.
Si Jesukristo gilansang sa usa ka tukon—ang krus—aron kita mohangad sa pagtan-aw Kaniya atol sa atong mga pag-antus ug dili mabuntog niini. Dili sa tanang higayon wagtangon ni Jesukristo ang atong mga pagsulay, apan isip atong Tig-ayo, pwede Niyang tangtangon ang hilo gikan niini pinaagi sa mga panalangin sa Iyang Pag-ula.
Numeros 21:4–9; Juan 3:14–16; 1 Pedro 2:24; Alma 33:18–22; Helaman 8:14–15; 3 Nephi 27:13–15