Hangtud sa Sunod Natong Panagkita
Ang Pagkaila kang Kristo pinaagi ni Joseph Smith
Gikan sa “Joseph Smith—The Mighty Prophet of the Restoration,” Ensign, Mayo 1976, 94–96. Ang pagkapital gi-standardize.
Adunay usa ka tawo diin ang kahibalo mahitungod kang Kristo ug sa kaluwasan miabut sa atong panahon.
Nagtudlo ug nagpamatuod kita nga ang kaluwasan anaa kang Kristo. Siya ang atong Ginoo, atong Dios, atong Hari. Gisimba nato ang Amahan sa Iyang ngalan, sama sa gibuhat sa tanang balaan nga mga propeta, ug sa tanang mga Santos sa atong kapanahunan.
Naglipay kita Kaniya ug sa Iyang maulaon nga sakripisyo. Ang Iyang ngalan labaw kay sa tanang pangalan, ug Kaniya ang matag tuhod moluhod ug matag dila mokumpisal nga Siya ang Ginoo sa tanan, nga kon wala Siya walay pagka-imortal ug walay kinabuhing dayon.
Apan karon mamulong ako og lain, sa usa ka tawo diin ang kahibalo mahitungod ni Kristo ug sa kaluwasan nga miabut sa atong panahon. …
Mamulong ako mahitungod ni Joseph Smith, Jr., ang bantugang propeta sa Pagpahiuli, ang tawo kinsa maoy unang nakadungog sa langitnong tingog niini nga dispensasyon, ang tawo kansang pagkainstrumento ang gingharian sa Dios sa makausa pa naestablisar taliwala sa katawhan. …
Sa tingpamulak sa tuig 1820 [ang Dios nga Amahan ug ang Iyang Anak, si Jesukristo] miiway sa tabil sa kangitngit diin sa dugay kaayong kapanahunan mitabon sa yuta. … Mikanaog Sila gikan sa Ilang celestial nga panimalay ngadto sa kakahoyan duol sa Palmyra, New York. Mitawag sa batan-ong Joseph pinaagi sa ngalan, Sila dayon misulti kaniya nga … siya ang himoong instrumento sa Ilang mga kamot alang sa pagpahiuli sa kahingpitan sa Ilang walay katapusang ebanghelyo. …
Mas makaayo sa tanang katawhan nga mangutana gayud sila sa ilang kaugalingon kon asa ang ilang barugan kon hisgutan ang mahitungod ni Joseph Smith ug ang iyang balaanong misyon. Nagpakisayud ba sila kabahin sa iyang ngalan ug nangita niana nga kaluwasan nga makita lamang diha sa ebanghelyo ni Kristo nga gipadayag ngadto sa Iyang propeta sa ulahing adlaw … ? Ang dakung pangutana diin ang tanang katawhan sa atong panahon kinahanglang motubag—ug nga nakapapeligro sa ilang kaugalingong kaluwasan—mao: Si Joseph Smith ba gitawag sa Dios? …
… Ayaw itugot nga dunay dili masabtan. Mga saksi kita ni Kristo. Siya ang atong Manluluwas. … Apan mga saksi usab kita ni Joseph Smith, diin pinaagi kaniya nakaila kita kang Kristo, ug kinsa maoy legal nga tigdumala kang kinsa ang gahum gihatag alang sa pagbugkos dinhi sa yuta ug pagsilyo didto sa langit, aron ang tanang katawhan sugod sa iyang kapanahunan hangtud karon mamahimong mga manununod sa kaluwasan.