Ang Pagtahud Gugma
Pagka-Biyernes gihangyo ako sa akong magtutudlo sa pagbasa og balak nga akong gisulat atubangan sa tanang estudyante, mga magtutudlo, ug mga ginikanan atol sa among panagtigum sa eskwelahan. Nalipay kaayo ko, mao nga miingon ko nga, “Oo!” Apan sa tinuod gikulbaan gyud ko mahitungod niini.
Sa dihang naglingkod na ko sa entablado naghulat nga mobasa sa akong balak, nagsugod sa pagpitik og kusog kaayo ang akong kasingkasing. Labihan ang akong kakulba mahitungod sa pagpaambit og butang nga akong sinulat ngadto sa daghang tawo.
Dayon usa ka panghunahuna ang misulod sa akong kaisipan. Naghunahuna ko kon sa unsang paagi ang akong pamilya ug ako dungan nga mibasa gikan sa Basahon ni Mormon sa kada buntag sa dili pa moeskwela. Ang hunahuna mahitungod sa pagbasa sa mga kasulatan kauban sa akong pamilya nakapahunahuna nako sa Langitnong Amahan. Naghunahuna ko giunsa Niya ako sa paghigugma. Mibati ko og kahupayan ug wala na mag-inusara. Wala na magpitik og sama niana kakusog ang akong kasingkasing, ug mibati ko og balaang pagtahud.
Diha sa Songbook sa mga Bata sa pahina 31, ang mga lyrics nag-ingon,
Ang pagtahud dili lang nga molingkod:
Mamalandong sa Amahan,
Kini makalipay nga hunahunaon.
Tungod ang pagtahud gugma.
Sa pulong ug sa buhat, kini makita.
Ug klaro kaayong dalan.
Ug kon ako magmatinahuron man
Naa si Jesus ug Amahan.
Nagpasalamat ko nga akong gibati ang gugma sa Amahan dihang gikulbaan ko atol sa panagtigum. Ug nagpasalamat ko sa pagkahibalo nga Siya nahigugma kaayo kanako.
Nahibalo ko nga sa lisud nga mga sitwasyon, pwede ra kong mopili nga magmatinahuron ug maghunahuna sa Dios.