Sa Digital Lamang
3 ka Paagi nga ang mga Propeta maoy Ebidensya Nga Ikaw Gihigugma sa Dios
Ang tagsulat nagpuyo sa Virginia, USA.
Ang mga propeta usa lamang sa mga paagi nga ikapakita sa Langitnong Amahan kon unsa kadako ang Iyang paghigugma kanato.
Unsaon nimo sa pagkahibalo nga ang Dios nahigugma kanimo? Alang kanako, pagkakita kini sa matahum nga pagsalop sa adlaw, pagkakita og hingpit nga mensahe sa kasulatan alang sa akong adlaw, o pagkadawat og mga text gikan sa mga higala. Apan ang usa ka puno sa gahum nga saksi sa gugma sa Dios ngari kanako mao ang pagkaadunay buhi nga propeta sa yuta karon. Si Elder Dieter F. Uchtdorf sa Korum sa Napulog Duha ka mga Apostoles miingon, “Tungod kay gihigugma sa Langitnong Amahan ang Iyang mga anak, sila wala Niya pasagdi nga maglakaw niining mortal nga kinabuhi nga walay direksyon ug giya.”1 Ania ang tulo ka paagi nga kita mobati sa gugma sa Dios pinaagi sa buhing propeta.
1. Ang propeta makadawat og pagpadayag alang sa tibuok kalibutan ug usab para kanako lang.
Sukad pa sa sinugdanan, ang Dios kanunay nga mihatag og pagpadayag ngadto sa mga propeta. Ang Ginoo miingon, “Bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra” (D&P 1:38). Ang mga miyembro sa Simbahan napanalanginan sa tiningub ug sa tinagsa-tagsa nga paagi tungod sa modernong mga pagpadayag, lakip ang paghubad ug pagmantala sa Basahon ni Mormon, ang pagtukod og mga templo, ug sa tumong nga makapangalagad sa usag usa.
Alang nako sa personal, nausab ang akong kinabuhi pinaagi ni Presidente Thomas S. Monson (1927–2018) niadtong 2012 dihang gipahibalo niya nga ang mga sister makaserbisyo na og misyon sa edad nga 19. Akong gibati ang hilabihan nga paghigugma ug pagsalig gikan sa Dios nianang gutloa, ug tungod niana nga pahibalo nakabiya ko alang sa akong misyon unom ka adlaw human sa akong ika-19 nga adlawng natawhan. Ang akong desisyon nga moserbisyo nianang panahona mihulma sa dalan sa tibuok nakong kinabuhi.
Ipakita usab sa Dios ang Iyang gugma pinaagi sa pagpanalangin kanato og pihong mga mensahe nga alang kanato pinaagi sa tambag sa mga propeta. Apan sa gihapon angay kitang maminaw og maayo ug mangutana sa atong kaugalingon, “Unsa nga bahin niini nga mensahe ang alang kanako?” Sa matag higayon nga ang akong mga pag-ampo o mga pangutana matubag pinaagi sa mga mensahe sa mga propeta ug mga apostoles, tandugon ako sa Espiritu pinaagi sa kahibalo nga ang Dios nahigugma kanako ug nakaila kanako sa personal.
2. Ang mga propeta mahimo nga imong personal nga giya.
Gihatagan kita sa Amahan og propeta sa atong panahon, si Presidente Russell M. Nelson. Bisan og mas magulang siya og mga dekada kanimo, ang iyang kasinatian sa kinabuhi sa tinuod usa ka dako kaayong bintaha samtang mopaambit siya og kaalam ug tambag gikan sa Dios. Uban sa paghunahuna sa atong panginahanglan, giandam sa atong Langitnong Amahan si Presidente Nelson pinaagi sa mga kasinatian sa tibuok niyang kinabuhi ug padayon sa balaanong paggiya kaniya aron makatudlo siya ug makasabut sa atong henerasyon.
Si Presidente Monson naghupot sa tanang mga yawe aron makadawat og pagpadayag. Ang Langitnong Amahan, kinsa hingpit nga nahibalo sa mga panglimbasog ug panginahanglan sa atong henerasyon, mihatag og pagpadayag ni Presidente Nelson kon unsaon nga siya makatudlo ug makagiya kanato sa pinakamaayong paagi. Ang debosyunal ni Presidente Nelson nga “Pagkahimo nga Tinuod nga mga Milenyal,”2 diin gitudlo ang tambag sa Ginoo ug pagpanambag sa mga milenyal, maoy ebidensya nga ang Langitnong Amahan migamit ni Presidente Nelson aron motabang kanato sa paggiya sa panaw sa kinabuhi.
3. Mopasidaan kanato ang mga propeta sa peligro.
Tungod kay gihigugma kaayo kita sa Langitnong Amahan, gusto Siya nga luwas kita sa pisikal ug sa espiritwal. Kinahanglang magmabinantayon kita sa tanan nga tingog sa saba nga kalibutan, apan kanunay kitang makasalig sa tingog sa propeta tungod kay ang Dios sa mapinanggaong paagi misaad kanato nga dili gayud Siya motugot sa propeta nga mopasaag kanato. Si Presidente Nelson mihangyo nga mobasa kita sa Basahon ni Mormon matag adlaw ug modawat og personal nga pagpadayag aron magpadayong luwas sa espiritwal nga paagi.3 Miingon siya, “Giawhag ko kamo nga palapdan pa ang inyong kasamtangang espiritwal nga abilidad sa pagdawat og personal nga pagpadayag.”4
Ang mga propeta usa lamang sa daghang paagi nga ikapakita sa Langitnong Amahan kon unsa kadako ang Iyang pagpakabana kanato ug ang personal nga pagkaila kanato. Si Elder Ulisses Soares sa Korum sa Napulog Duha Ka mga Apostoles mitudlo, “Ang pagkaadunay mga propeta usa ka timaan sa gugma sa Dios alang sa Iyang mga anak. Ipahibalo nila ang mga saad ug ang tinuod nga kinaiyahan sa Dios ug kang Jesukristo ngadto sa Ilang katawhan.”5 Dihang misalig ko sa mga pulong sa mga propeta ug mipatalinghug sa ilang tambag, nakadawat ko og mga tubag sa akong mga pangutana. Mapasalamaton kaayo ko niining mga pagpakita sa gugma sa Dios.