Mga Pangutana ug mga Tubag
“Wala ko mobati nga takus nga higugmaon sa Manluluwas. Unsaon nako pagbuntog kini nga pagbati ug makita ang akong kaugalingong bili?”
Mag-ampo aron Mobati sa Iyang Gugma
Kitang tanan anak nga mga lalaki ug babaye sa atong Langitnong Amahan. Ang iyang gugma alang kanato walay sukod. Kon ugaling mobati man kita nga dili takus sa Iyang gugma, kinahanglan nga mag-ampo kita Kaniya. Mag-ampo aron mobati sa Iyang gugma. Mag-ampo aron mobati ka nga takus sa Iyang gugma alang nimo ug aron imong makita ang imong kaugalingon sama sa Iyang pagkakita kanimo. Sa Iyang panahon ug sa Iyang pamaagi, kanunay Siyang motubag sa atong mga pag-ampo uban sa paghimatuod sa Iyang hingpit nga gugma. Sa matag higayon nga mobati ko og kaluya o kasubo, ang pag-ampo alang sa Iyang gugma, kanunay nga mobayaw kanako.
Julia M., edad 16, Virginia, USA
Magpaduol sa Manluluwas
Bag-o lang sa usa ka klase alang sa pagpangandam sa misyon, may diskusyon kami kon unsaon sa pag-abli sa among mga mata ngadto sa gugma sa Dios alang kanato. Gihisgutan namo ang daghang butang nga among mahimo aron mobati og mas dako nga kaugalingong bili; ang pipila niini mao ang pagserbisyo sa imong silingan, pag-ampo og tabang sa mga butang nga importante kanimo, pagbasa sa mga kasulatan, ug sa pagka-misyonaryo. Ang tuyo niining tanan mao ang pagdala kanato paduol kang Jesukristo ug pagtabang nga atong makita ang atong potensyal sa pagkahimong sama Kaniya.
Santiago Z., edad 17, Arizona, USA
Sunda ang Kasugoan
Usahay dili ko mobati nga takus higugmaon sa Manluluwas tungod kay dili hingpit ang akong pagsunod sa mga sugo sa Ginoo. Mabuntog nako kini nga mga pagbati pinaagi sa paghinulsol, usahay pinaagi sa tabang sa akong bishop, kinsa mitudlo nako nga nahigugma ang Ginoo sa tanan Niyang mga anak.
Jacques D., edad 15, Abidjan, Ivory Coast
Ang Paghinulsol Mao ang Yawe
Tanan kita makasala, ug tungod niana, posibling mobati kitang dili takus sa gugma sa Manluluwas. Apan Iyang gihatag ang Iyang kinabuhi alang kanato—misakripisyo Siya alang kanato. Kanang walay hinakog nga buhat gihimo tungod sa gugma. Ang bugtong butang nga angay natong buhaton aron mobati nga takus sa Iyang gugma mao ang paggamit sa gahum sa Iyang Pag-ula pinaagi sa paghinulsol sa atong mga sala. Ang paghinulsol mao ang yawe sa pag-ila sa atong kaugalingong bili ug sa gugma sa Manluluwas.
Sister Custan, edad 23, Philippines Cebu Mission
Higugmaa ang Uban
Usa ka paagi nga atong maila ang atong kaugalingong bili mao ang pag-ila sa kaugalingong bili niadtong mga anaa sa atong palibut. Ang pag-focus ngadto sa uban makatabang nga mobati kita og maayo sa atong kaugalingon tungod kay gipalig-on nato ang uban. Makaayo kini sa tanan! Dihang naglisud pud ko bahin sa pagsalig sa kaugalingon, mihukom ko nga moserbisyo og tawo sa akong palibut nga nagkinahanglan og tabang. Matag adlaw sulod sa usa ka bulan mihatag ko og komplimento sa usa ka higala nga nanglimbasug. Ang pag-focus ngadto sa uban makatabang nga mobati ko nga takus ug gikinahanglan. Kon maningkamot kita sa paghigugma sa uban kon si kinsa man sila, mas daling makita kon unsa ka dako ang paghigugma sa Dios kanato. Ang pagtabang sa uban aron mobati nga takus sa gugma makatabang kanato nga mobati nga takus sa gugma sa atong kaugalingon.
Jayme W., edad 15, Minnesota, USA