Kaming Duha Napanalanginan
Anna Fingerle
Hesse, Germany
Paghulagway pinaagi ni Carolyn Vibbert
Nihanap na ang akong panan-aw dihang nalagpot ko sa akong bisikleta sa pagbangga sa usa ka trak. Mga kapin lang og gamay sa upat ka tuig human niadto, atol sa Kapaskohan niadtong 2011, naaghat ko nga mohangyo og panalangin sa pagkapari [priesthood] sa usa ka brother nga akong nailhan sa kanhi nga ward. Dili nako kanunay makita kini nga brother, mao nga wala ko makasabut nganong siya ang akong hangyoon. Nasayud kong dunay ubang takus nga mga naghupot sa pagkapari [priesthood] nga pwede nakong mahangyo.
Sa mga semanang misunod, ang pagbati nga nagkinahanglan ko og panalangin nagkakusog. Nagserbisyo ko isip usa ka temple worker sa Templo sa Frankfurt Germany, mao nga mihukom ko nga mangayo og panalangin sa usa sa kaigsoonan didto.
Human nga akong nahimo kini nga desisyon, ang brother diin ako nadasig nga hangyoon misulod sa templo. Diha dayon nahibalo ko nga dili kini sulagma—gusto sa Langitnong Amahan nga hangyoon nako kini nga brother sa piho gayud. Nagtigom ko og kaisug ug mihangyo nga makigsulti kaniya human sa iyang sesyon. Miuyon siya.
Sa wala madugay, mipasabut ko nga wala ko kahibawo ngano, apan mibati ko nga nagkinahanglan ko og panalangin gikan niya. Miingon siya nga malipay siyang motabang. Nagdapit siya og laing brother sulod sa kwarto ug gisugdan ang paghatag kanako og panalangin. Sa iyang pagkahuman, naglibug ko. Nindot ang panalangin apan walay butang nga espesyal mahitungod niini.
Dayon akong gibuka ang akong mga mata.
Sa pagbuka nako sa akong mga mata, hapit klaro kaayo ang akong panan-aw sa tibuok kwarto. Dili ko katuo! Gipangutana nako ang brother kon nahibalo ba siya nganong siya ang gikinahanglan nga mohatag kanako og panalangin. Ang iyang tubag naghimo nakong mapaubsanon.
“Tingali kini nga panalangin dili lang para nimo,” miingon siya. “Alang usab kini kanako. Ugma mohatag ko og panalangin sa akong pag-umangkon nga babaye kay bunyagan siya. Ang among pamilya dili aktibo sa Simbahan, ug siya ang unang sakop sa pamilya nga mabunyagan sulod sa hapit na mag-20 ka tuig. Daghan sa among pamilya ang motambong sa bunyag, ug dili ko sigurado kon may igo bang kalig-on ang akong pagtuo sa paghatag sa panalangin. Karon nasayud kong mahimo nako kini.”
Sa mga adlaw nga misunod, nagkaklaro na ang akong panan-aw mao nga wala na nako kinahanglana ang puti nakong sungkod. Giputos nako kini ug gihatag kini nga usa ka regalo sa Pasko ngadto niini nga brother nga gipaubanan og sulat. “Nasayud kong dili kini sungkod ni Moises,” misulat ko, “apan nanghinaot ko nga mopahinumdom kini kanimo sa gahum sa pagkapari [priesthood] nga imong gihuptan.”
Ang Langitnong Amahan nahigugma kanato ug malipay nga mopanalangin kanato. Ang panalangin atol sa Kapaskohan wala lang mopahiuli sa akong panan-aw apan mihatag usab sa usa ka mapaubsanong naghupot sa pagkapari og pagsalig sa iyang pagkapari nga panerbisyo.