Ang Basahon ni Mormon: Usa ka Espesyal nga Regalo
Claudette Bybee Burt
Washington, USA
Gihulagway ni Eva Vasquez
Sa Gabii sa Pasko sa tuig 2016, samtang ako ug ang akong bana nagserbisyo isip temple missionaries sa Manila Phillipines Temple, gusto kong mohatag og kopya sa Basahon ni Mormon ngadto sa usa ka tawo. Sa ilawom sa atubangang hapin sa kopya, akong gisulat ang akong pagpamatuod ug gilakipan kini og postcard sa Manila Temple kauban sa impormasyon kon asa makakat-on og dugang pa mahitungod sa Simbahan. Dayon miluhod ko sa pag-ampo ug mihangyo sa Ginoo nga giyahan ako ngadto sa tawo nga Iyang giandam.
Mibiya ko sa among apartment ug milabang sa karsada. May usa ka security guard duol sa missionary training center nga may kaistoryang duha ka tawo. Misinggit siya, “Maayong Pasko!” Naaghat ko nga moduol kanila.
Human nako napaila ang akong kaugalingon, akong nahibaloan nga ang usa nila tig-atiman diay sa mga nataran sa missionary training center ug ang usa mag-uuma. Akong nahibaloan nga pareho silang mga miyembro sa Simbahan.
Nangutana ko kon may nahibaloan ba silang interesado nga makadawat og regalo sa Pasko nga kopya sa Basahon ni Mormon. Ang mag-uuma daw nakalitan. Miingon siya nga duna siyay higala nga mobisita sa mga nataran sa templo kuyog niya nga moabut mga pipila na lang ka minutos. Gusto siyang mohatag sa iyang higala og Basahon ni Mormon apan wala siyay kopya. Napuno sa emosyon, akong gikuha ang Basahon ni Mormon sa akong bag. Gisultihan nako sila mahitungod sa akong pag-ampo ug akong gihatag kaniya ang basahon.
Ang Espiritu mitandog kanamong tanan, ug ang mag-uuma nanghinaot nga ang iyang higala mobasa sa Basahon ni Mormon ug modawat sa ebanghelyo. Sa akong pagbalik sa akong apartment, akong gipasalamatan ang Ginoo ug nag-ampo nga ang higala sa mag-uuma motuman sa iyang gisaad nga mobisita sa mga nataran sa templo.
Mga 15 minutos wala madugay, nakadawat ko og tawag gikan sa security sa gate sa MTC. Ang higala sa mag-uuma miabut na. Miadto dayon ako sa pakigkita kaniya. Usa siya ka kapitan sa barko nga kargahanan sa pangtinda nga molargahay na usab sulod sa duha ka adlaw. Iya kong gipasalamatan sa Basahon ni Mormon ug miingon nga iya kining dad-on inig larga niya sa barko. Sa wala pa kami manamilit sa usag usa, gitan-aw nako siya direkta sa iyang mga mata ug giingnan, “Kini nga basahon tinuod.” Samtang gibuhat nako kini, gipamatud-an sa Espiritu diri kanako kini nga kamatuoran.
Niana nga Pasko nakahatag ko og usa ka espesyal nga regalo: usa ka Basahon ni Mormon ug sa akong pagpamatuod nga kini tinuod. Nakadawat usab ako og espesyal nga regalo: gitubag sa Ginoo ang akong pag-ampo ug mipanalangin kanako og oportunidad nga makapaambit sa ebanghelyo.