“Tuuina Atu o Faamanuiaga o le Perisitua,” Liahona, Iuni 2018
Tuuina Atu o Faamanuiaga o le Perisitua
Savavali se aiga i le lotoa o le Malumalu o Accra Kana, o se tasi o malumalu e valu na faasilasila mai, o loo fausiaina, po o loo faagaoioia i Aferika.
“O loo aoao mai le Tusi a Mamona, “ua tutusa tagata uma i le Atua,” e aofia ai le “uliuli pe paʼepaʼe, e pologa pe saoloto, o tane ma fafine” (2 Nifae 26:33). Ona e alofa le Atua ia i tatou uma, ua Ia saunia ai le ala mo i tatou taitoatasi ia toe foi atu ai ia te Ia (tagai Mose 5:9; Mataupu Faavae o le Faatuatuaga 1:3). I le faagasologa o le talafaasolopito o le Ekalesia, ua papatisoina tagata o soo se ituaiga ma aganuu mo lena faamoemoega ma ua soifua o ni Au Paia faamaoni o Aso e Gata Ai.
Mai le ogatotonu o le vaitau o le 1800, e lei faauuina e le Ekalesia ia alii e tupuga mai i tagata Aferika uli i le perisitua pe faatagaina alii po o tamaitai uli ia maua faaeega paia o le malumalu po o sauniga faamau.1 I le aluga o tausaga, sa atiaeina ni manatu eseesee e tauamiotonu ai le tapu. O Elder Jeffrey R. Holland o le Korama a Aposetolo e Toasefululua na faamamafaina mai faapea o soo se manatu ua tuuina mai i se taumafaiga e faamatala ai le tapu o “tala tuugutu mai” lea e le tatau ona faaauauina: “Ae po o le a lava le lelei o le faamoemoega o faamatalaga, ou te manatu e toetoe lava o na faamatalaga uma e le atoatoa ma/pe sese. … Tatou te le iloa lava pe aisea na faatulagaina ai lena faiga.” 2
O le toatele o perofeta ma Peresitene o le Ekalesia, e aofia ai Polika Iaga, na folafola mai o le a oo mai le aso o le maua ai e alii uma o e agavaa le perisitua. O le iloaina o nei folafolaga ma le molimauina o le faamaoni o le Au Paia uli o Aso e Gata Ai, na “loa ona talosagaina atu ai ma le faatauanau” e taitai o le Ekalesia i le seneturi ogatotonu o le 20 “le Alii mo se taitaiga faalelagi.” 3
Faaaliga mai le Atua
O lena taitaiga na oo mai ia Peresitene Spencer W. Kimball (1895-1985) “i le mavae ai o le mafaufau loloto ma le tatalo i potu paia o le malumalu paia.” O le aso 1 o Iuni, 1978, na faaali mai ai e le Alii i Ana perofeta ma uso o le Au Peresitene Sili ma le Korama a Aposetolo e Toasefululua e faapea “ua oo mai le aso ua leva ona folafolaina e maua ai e alii faamaoni uma ma agavaa o i le Ekalesia le perisitua paia, faatasi ai ma le mana e faaaoga ai lana pule paia, ma olioli faatasi ai ma e pele ia te ia i faamanuiaga uma e tafe mai ai, e aofia ai faamanuiaga o le malumalu”4
I le faasilasilaina atu o le faaaliga, na ta’ua ai e le Au Peresitene Sili, “Matou te folafola atu ma le faamaoni ua faailoa mai nei e le Alii lona finagalo mo le faamanuiaina o ana fanau uma i le lalolagi atoa.”5
I le taimi o le konafesi aoao na sosoo ai, sa tuuina atu ai e le Au Peresitene Sili le faaaliga i tagata o le Ekalesia, ia na taliaina e avea o se “afioga ma le finagalo o le Alii” ma na lagolagoina autasi i le Folafolaga Aloaia 2 e avea o se veaga o tusitusiga paia.
O Le Taunuuga o le Faaaliga
Aoao atu se alii talavou i le taimi o se sauniga a le korama i Pale, Farani, lea e tele uarota e i ai tagata mai atunuu eseese i le salafa o le lalolagi.
Na loloto le aafiaga o le faaaliga. E le gata ina tuuina atu e le Atua faamanuiaga o le perisitua ma le malumalu i tagata agavaa uma e tusa lava po o le a le ituaiga, ae ua mafai foi ona faataunuuina sauniga o le malumalu mo tagata uma o e ua soifua mai.
O le faaaliga na oo mai ai avanoa e faalauteleina ai le galuega faafaifeautalai, ma ua faamanuiaina ai tagata o le ekalesia i le tele o atunuu, aiga, gagana, ma tagata.
Aoaoga a le Ekalesia
A o faaauau pea ona salalau atu le galuega a le Alii i le lalolagi atoa, ua olioli tagata o le Ekalesia i se taimi o le faateleina o le lotogatasi. A o faateleina le fegalegaleai o tagata o le Ekalesia ma isi mai le tele o ituaiga tagata ma aganuu, ua faamamafa mai e taitai o le Ekalesia le taua o le alofa ma le faamalosiau atu i le tasi ma le isi ma ia faaitiitia le faaituau ma le faailogalanu o soo se ituaiga.
“E tatau ona tatou taliaina ma le agaalofa fanau a le Atua ma faaitiitia soo se faaituau, e aofia ai le faailogalanu, faailoga tagata, ma le manatu faapito,” na aoao mai e Peresitene M. Russell Ballard, Sui Peresitene o le Korama a Aposetolo e Toasefululua. Ia faapea ona tau atu ua tatou talitonu moni o faamanuiaga o le talalelei toefuataiina a Iesu Keriso e mo fanau uma a le Atua.”6 O le talanoa ai e uiga i le aiga e faavavau a le Atua, na aoao mai ai Peresitene Russell M. Nelson: “Na o le malamalama i le moni o le Tulaga Faatama o le Atua e mafai ona aumai ai se lagona talisapaia atoatoa o le usoga moni o le tagata. O lena malamalama e uunaia ai le manao e fausia alalaupapa o le galulue faatasi nai lo pa pupuni o le feeseeseaiga.”7
Agai Faatasi i Luma
E ui tatou te le iloa mea uma, e i ai ni nai mea e mafai e i tatou taitoatasi ona iloa. E mafai ona tatou iloa e alofa le Atua ia i tatou ma e i ai se fuafuaga mo i tatou uma ia avea o se aiga lotogatasi ma faavavau. E mafai ona tatou iloa o le Ekalesia toefuataiina lenei a le Alii ma e Na te taitaiina e ala i Ana perofeta. O le i ai o se molimau patino o nei upumoni e mafai ona fesoasoani a o tatou agai faatasi atu i luma e ala i avanoa ma luitau o feagai ma i tatou i le ala o le avea faapei o Ia (tagai Moronae 7:48).