O La Tatou Avanoa
Ootia e ala i Upu a se Perofeta Soifua
Ata na tusia e J. Beth Jepson
Ina ua 15 ou tausaga, sa ou vaai i ni faifeautalai se toalua i luma o se faleoloa supamaketi. Sa valaaulia au e le tasi o i laua ou te sau i le lotu. Ou te lei manao tele i ai, o lea sa ou fai atu ai ia i laua, “Atonu i se aso,” ma savali ese.
O le aso na sosoo ai, sa valaau mai ai le uso o lou tina ma fai mai i lou tina e alu atu i lona fale e faalogologo i se savali faapitoa. Sa ma taufetuli atu ma lou tina ma vaaia ai faifeautalai ia na ou vaai i ai i le aso na muamua atu o saofafai mai i totonu o le fale o le uso o lou tina! Sa fiafia lou tina i le la savali ma o lea na amata ai ona ou faalogologo foi i ai. Ae peitai, ina ua fesili mai faifeautalai ia te au pe ou te talitonu i se perofeta soifua, sa ou tali atu ma se leai mausali. Sa uu ae e se tasi o alii faifeautalai se ata o Thomas S. Monson ma molimau mai o Peresitene Monson o se perofeta. Sa laua valaaulia au ou te sau i le konafesi aoao i le aso e sosoo ai e fai ai lau lava filifiliga. O le fia iloa, sa ou malie ai ou te sau.
O le aso na sosoo ai, sa matou taunuu atu i le falelotu i le taimi tonu ao tau faaiuiu le tatalo amata. Ao ou savali atu i totonu o le potu, sa ou vaaia le faaali mai o Peresitene Monson i luga o le lau. Sa ia ataata ma fai mai, “Ou uso e ma tuafafine pele, ou te faafeiloai atu ia te outou …”
O le taimi lava na matala ai le fofoga o Peresitene Monson, na oo mai ai i ou luga se lagona malosi, e faamautu mai ai o ia lava o se perofeta a le Atua. I le faaiuga o le konafesi, sa ou fai atu i faifeautalai, “Ua ou fia papatiso.” Talu mai lena taimi, na ou auauna atu i se misiona ma aoaoina le toatele o isi i upumoni matagofie o le talalelei toefuataiina.
Ou te iloa ua faamanuiaina i tatou e le Atua e ala i le toe valaauina o perofeta. E alofa le Atua ia i tatou ma e fetalai mai ia i tatou e ala i perofeta o onaponei.
Maicon B., São Paulo, Pasila
Ou Te Le Ma
Ao ou aoga i se aoga nofotumau, sa matou nonofo faatasi ai ma isi tamaiti aoga. Sa ou faia le mea sili e ola ai i mataupu o le talalelei e ala i le tatalo ma le suesue o tusitusiga paia i le tele o taimi.
I se tasi o aso, sa matauina mai ai e se tasi o le matou vasega lou suesueina o le Tusi a Mamona i luga o lou moega. Sa amata ona ia lisiina ma le ita ia auala uma sa ia manatu na sese ai lau lotu. Ona ia fai atu lea i isi tagata uma o le nofotumau e uiga i ou talitonuga e “ese lava.” Sa amata e nisi o lau vasega ona ulagia au ma lau tapuaiga; ae o isi nao le aloese ma au. Sa iu ina ou nanaina lau Tusi a Mamona i lalo o se atigipusa o ou lavalava ma suesue ai nao le Tusi Paia ina ia taofi ai le taufaalilili o tagata o lau vasega ia te au.
Sa ou suesue pea i le Tusi Paia seia oo ina ou tau i le Roma 1:16, lea o loo folafola mai: “Aua ou te le ma i le tala lelei a Keriso: aua o le mana lava lea o le Atua e ola ai i latou uma o e faatuatua.” Sa ou iloaina e ala i le nanaina o le Tusi a Mamona, sa ou tau atu ai i tagata o lau vasega sa ou ma i ou talitonuga. Sa ou toe aumaia lau Tusi a Mamona ma ole atu i le Tama Faalelagi mo le faamagaloga. Ona ou alu atu lea i lau tupulaga ma tuu atu i ai lau molimau e uiga i le talalelei toefuataiina. O le toatele o i latou sa tuu le ulagia o au ma toe avea ma au uo.
Ua ou iloa e malamalama le Atua i tofotofoga tatou te uia. A tatou tutu atu mo o tatou talitonuga ma faaali atu tatou te “le ma i le tala lelei a Keriso,” o le a Ia tuuina mai ia i tatou Lona mana, puipuiga, ma le taitaiga.
Pamela O., Abuja, Nigeria
Auauna Atu e ala i le Saini
Ina ua ono masina o lou matua, o lau faailo muamua lava o le “susu” ma, o ni nai vaiaso mulimuli ane, sa ou faaleoina ai le [upu] “panda.” E mafai ona ou faalogo, ae o lau gagana muamua o le Gagana Faifaailoga Amerika. Sa auauna atu lou tina i se misiona GFA ona faaauau ai lea ona suesue i gagana faifaailoga i le aoga, ma sa manao o ia ia ou iloaina foi.
Ua avea le gagana faifaailoga o se faamanuiaga maoae i lou olaga. Ua mafai ai ona ou vaai ma aoao le tele atu o mea nai lo o mea e mafai ona ou aoaoina pe ana aunoa ma lea. Na te aumaia faatasi ai tagata. Ou te fiafia i le mafai ona ou aoao atu i tagata mea ua ou iloa e ala i aoaoga faitaitoatasi ma le tuuina atu o aoaoga i aoga ma i le lotu. E ese foi le manaia o le matamata faatasi ma lou tina i le konafesi aoao ma isi vitio a le Ekalesia i le gagana faifaailoga.
O le i ai o le gagana faifaailoga i lou olaga ua avea o se mea maoae e fausia ai [lau] molimau. Ua mafai ona ou masani i le toatele o fanau a le Atua nai lo le mea e i ai pe ana aunoa ma lea, ma o se meafaigaluega lelei tele e faaaoga o se auaunaga mo isi. Ou te faafetai mo lenei meaalofa i lou olaga ma mo tagata ofoofogia ua mafai ona ou feiloai i ai ma aoao mai ai.
Israel H., Oregon, ISA