Ua Toe Manuia le Au Paia Mai Le Afa Fulifao
O le afa fulifao o Gita na afua ai se faatamaiaga matautia i atumotu ma le talitonuga o le toatele o se mala aupito leaga lea ua taia ai le atunuu i totonu o le 60 tausaga.
O le Afa Fulifao o Gita na afua ai se faatamaiaga tele i Samoa faapea Amerika Samoa, peitai na sili ona leaga le taiaina o Toga.
Na ta’ua e se Au Paia i Toga, o Lima Finau “o se tasi o afa aupito sili ona taufaafefe ua ou vaai i ai.”
Sa i le fale Sister Finau faatasi ma lona toalua o Tuai ma le fanau e toatolu ina ua agi le afa.
“Sa matuai taufaafefe moni lava,” na ia ta’ua ai.
“Sa matuai malosi naua, ma sa ogaoga mea sa faatamaia. Sa matuai faaleagaina atoa lo matou poletito i luma ma sa lelea atu i tuafale o lo matou tuaoi. Sa lele ese foi le taualuga o le faletaavale o le matou tuaoi.
“Sa ou le iloaina pe ou te ola. Sa na o lo’u faafetai ona sa matou faatasi ma lo’u aiga i le taimi na tupu ai.”
O le ofisa tutotonu mo auaunaga i Pesega—o le fatu mo galuega faatino, mo mataupu o fesoasoaniga mo tagata ma isi taumafaiga faaletino i Samoa ma Amerika Samoa—sa lolovaia ma sa faaleagaina ona tane le ta’ua. Sa lipotia mai foi le faaletonu o le suavai i nisi o nofoaga.
O le Nofoaga Tutotonu o le Siteki o Ottoville i Pago Pago na mafatia i le faaleagaina o le taualuga o ona fale faaleaganuu. Sa pauu laau i luga o nisi o pa o faletapuai o le Ekalesia.
O loo faaauau pea ona galulue ia taitai o le Ekalesia i Samoa ma Amerika Samoa faatasi ai ma sui o malo e faatautaia le lagolago faavolenitia i vaega na aafia.
I Toga, pe tusa ma le 50% o fale sa faatamaiaina pe faaleagaina ma e tele fale masani sa faatafunaina e le afa fulifao. Sa motusi pe lia’ia laau ma sa toulu laina eletise i le motu atoa. I se fuafaatatau e ono tele ni vaiaso faatoa mafai ona toe maua le eletise.
Sa galulue faifeautalai o le Ekalesia a Iesu Keriso o le Au Paia o Aso e Gata Ai e fesoasoani i le faalaolaoina o auala. O loo latou fesoasoani foi i le faamamaina, tailiina o laau, ma isi taumafaiga e faamama ai.
O loo faia foi e tagata o le ekalesia le mea sili latou te mafaia e fesoasoani ai, e pei o Sister Va’enuku, o le sa tapenaina taumafa mo le nuu i nai itula na pasia ai e le afa ia Toga.
Peitai, e le o se mea e ofo ai ia Rina Taufa, o le na fai mai “Ou te manatua le taimi o o’u 15, o Sister Va’enuku e kuka lava ia na o ia mo le lotu po o fanau a ana fanau pe tusa ma le 100. E oo mai lava la i lenei taimi, e leai lava se mea o suia ai! O i latou e iloaina o ia, ua iloa e na te foai e oo lava i lana toe pene apa i se tagata e le masani ai.”
Sa talaia e Le Ekalesia a Iesu Keriso o le Au Paia o Aso e Gata Ai ia faitotoa o o latou faletapuai i tagata pe tusa ma le 9,000 o e sa lolofi atu i falelotu ia malu mai le malosiaga o le afa fulifao.
Ina ua mavae le po o le afa, sa laupae i fafo volenitia ma taoofu samasama o Lima Fesoasoani i aofaiga e le mafaitaulia faatasi ai ma o latou tuaoi e amata le galuega o le faamamaina ma le toefauina.
“Sa sulufai ia faifeautalai i ‘toga i fale lotu e mamao ese mai le talafatai ma faia ia tapenapenaga e tatau ai e fesoasoani ai ia saogalemu, na ta’ua ai Daniel Woodruff, o le sooupu mo Le Ekalesia a Iesu Keriso o le Au Paia o Aso e Gata Ai. Na ia toe faaopoopo mai, “Matou te tatalo mo i latou uma i le Pasefika i Saute o e ua aafia i lenei afa malosi.”
O loo saogalemu ia faifeautalai uma ma isi tagata O le Ekalesia a Iesu Keriso o le Au Paia o Aso e Gata Ai.