Lua Misiona, Lua Aiga ua Faamanuiaina
Juan Manuel Gomez, Rosario, Atenitina
Ata na tusia e Carolyn Vibbert
Ao [ou] auauna atu i le Misiona a Arisona Mesa, sa masani ona ou maua ni imeli mai lou tuafafine matua i Atenitina. O Natalia sa le o se tagata o le Ekalesia. O ni nai tausaga na muamua atu, ina ua maliu lana tama teine, sa taumafai ai lo matou aiga e faasoa atu le talalelei ia te ia, peitai sa le manao lava i ai.
Sa faaauau ona faasoa atu i ai lau molimau ia te ia i lau misiona. I se tasi o imeli, sa ou faamatala i ai e uiga i se tamaitai sa ma feiloai i ai ma la’u soa. Ua faapena foi ona maliu lana tama teine. Sa ma molimau atu e uiga i aiga e faavavau ma sa ia lagonaina le faamoemoe i mea sa ma faasoaina atu. Sa ou tau atu ia Natalia e mafai foi ona faapena ona lagona. Sa toe tusi mai o ia, ma tau mai sa manao na te lagonaina lena faamoemoe ae sa manatu sa le lava le malosi o lona faatuatua.
Sa tonu ia te au e auina atu ia Natalia se tusi e tusilima e valaaulia ai o ia e tatalo mo le fesoasoani ina ia talitonu. Sa ou lagonaina le uunaiga e tusi se parakalafa e tasi i le faaPeretania ma faatuatusi atu i se faifeautalai. Sa na’o le faaSipaniolo sa iloa e Natalia, o lea sa ou fai atu ai ia te ia e sue faifeautalai ma fai atu ia i laua e faaliliu atu ia te ia. Sa ou manatu o le a iloa e se faifeautalai le faaPeretania.
E lei leva lena, ae ou maua se imeli mai ia Natalia. Sa ia mauaina faifeautalai ma fai atu ia i laua e faaliliu lau tusi. Sa la faitauina lemu ma ataata. Ina ua fesili Natalia po o le a le mea na ou tusia, sa la tali mai, “Se’i o tatou talanoa e uiga i ai!” Sa ou tusia, sa tauivi Natalia ma le maliu o lana tama teine, ma sa ou fai atu i faifeautalai e aoao o ia e uiga i le ata o le faaolataga.
Sa faasoa atu e faifeautalai se savali puupuu, ma sa fiafia Natalia i mea sa la aoaoina atu. Ona tau lea i ai e Natalia sa ou auauna atu i se misiona i Mesa, Arisona, ISA. Sa fai atu se tasi o alii faifeautalai o Elder Larson, o iina e sau ai o ia.
E tasi le tausaga mulimuli ane, sa ou siitia ai i le eria e nonofo ai le aiga o Elder Larson. Sa oo ina ou iloa lona aiga ao ia iloaina foi lo’u aiga, ma sa faamanuiaina ai ia aiga uma e lua. Sa tatalo Elder Larson mo lona uso laitiiti, o le sa tauivi ma lana molimau. Sa mafai ona ma o i ni fesuiaiga ma lona uso ma fesoasoani ia te ia e faamalosia lana molimau. Sa faaauau ona aoao e Elder Larson ma lana soa ia Natalia ma iu ai ina papatisoina o ia. Ua ou iloa na auina atu i ma’ua e le Alii i ni itu se lua, o au i Arisona ae o Elder Larson i Atenitina, ina ia mafai ona ma fesoasoani uma ia te Ia e faamalolosia o ma’ua aiga i le talalelei.