O Le Taimi Moe mo Felise
E alala le tusitala i Iuta, ISA.
“A valaau mai tina ou te usitai, ou te manao e fai mea lelei, i aso uma” (Tusipese a Tamaiti, 197).
Sa matamata Anetone ao sii ai e le lau o le komepiuta le vaega lona ono mo le pei o le faamiliona lea o taimi. Sa ia manava tele i totonu ma amata loa ona feosofai solo i le auala lavelave, lele i luga ae o mea matuituia felanulanuai ma ui atu i ana o afi. Sa atili vave le tata o lona vae ao latalata ma latalata atili atu o ia i le laina o le tini.
“Anetone?” O le leo lea o Tina. Na pei na i ai se mea sa ia manaomia.
“E le o le taimi lenei!” o ona mafaufauga ia. Sa puna o ia i luga o se isi mea matuitui ma masau atu i le loloto o se isi ana. “Ia?” sa ia fai atu ai, ae sa le aveesea lana vaai mai le lau.
“E mafai ona e faia le ofumoe o Felise ma faitau i ai se tala faamolemole? Se’i faauma ona ou tapenaina le umukuka.”
“Um … ,” Sa matuai lalata atu lava o ia! Sa pio ese o ia mai se pioga matuitui, ova i luga o se isi afimumu, pasia se sauai soli [tagata], ma … IOE! ma alu atu loa i le laina o le tini!
Na sii mai e le komepiuta le vaega lona fitu. Sa foliga mai na faigata teisi atu, ae sa le mafai ona faatali Anetone i le fia faataitai i ai. Sa galue malosi lava o ia ina ia oo atu i le vaega lenei. Sa oomi e Anetone le faamau o le malolo ma tilotilo atu ia Tina, o le sa siiina lona uso laitiiti o Felise. “E mafai ona tuu mai ni nai isi minute? O lea faatoa ou oo i le vaega lona fitu!”
“O loo ou matuai manaomia lava lau fesoasoani,” sa fai atu ai Tina. “E mafai ona e faia se isi vaega se tasi pe a uma ona e vaaia Felise.”
Na ataata Felise. “Molemole?” sa ia fai atu ai i si ona tamai leo e lua tausaga le matua.
Sa tilotilo atu Anetone i le lau o le komepiuta ma mapusela. “Ua lelei.” O le a ia topea lava ina ia mafai ona toe foi mai i lana taaloga.
Sa ia sii ae Felise ma ave atu o ia i luga o sitepu i le la potu.
“O ai lo’u uso pepe e sili ona ou fiafia i ai?” sa ia fai atu ai, ma tuitui le manava vaivai o Felise. Sa ia feulaina le manava o Felise ma ataata a o ii le ata a Felise.
Sa faaofu e Anetone ia Felise i lona ofumoe tainasoa e sili ona fiafia i ai. Ona ia siia lea o Felise i luga o le moega ma savali loa mo le faitotoa. Sa fai atu Tina ia te ia e faitau foi se tala ia Felise, ae na ia faia le vaega taua. Atonu o le taimi lenei e mafai ona oo ai i nisi vaega se lua ao lei oo i le taimi e moe ai.
O le taimi lava lena, sa faalogoina ai e Anetone se toso i lona ofutino. Sa tilotilo ifo o ia ma vaaia ai ua pea ese Felise mai le moega.
“Pea?” Sa fesili atu ai Felise. Sa tamoe o ia i lana ato tusi ma aumai ai se tusi e i ai le pola pea i luma.
“Se, Felise, o loo i ai a’u mea e fai!” Sa fai atu ai Anetone. Sa uu e Felise le tusi i luga ae o lona ulu, ma tilotilo atu ia Anetone i ona mata lapopoa eena.
Sa leai se mea na mafai e Anetone ae nao le ata. “E te le manao lava e tali atu leai, a ea? Ia, LELEI.”
Sa saofai ifo Anetone i luga o le moega o Felise, ma sa pe’a atu Felise i luga o ona vae. Sa susue e Anetone le itulau muamua ma faitau ao faalagolago atu Felise ia te ia. Sa tusi atu le lima o Felise i meaola taitasi i luga o le itulau ma faataitai ona ta’u le igoa. “Zee-ba … famingo … wah-wus.”
Ina ua uma, sa tapuni e Anetone le tusi ma aui Felise i le palanikeke. “Manuia le po, Felise,” sa ia fai atu ai, ma kisi i le ulu o Felise ma tu i luga e alu.
Ae ao savali atu o ia agai i le faitotoa, sa ia toe faalogoina foi lena leo itiiti. “Faapupuu?”
Na ataata Anetone. “Ua Lelei. Soso atu. O le a ou nofo laitiiti.”
Sa taoto Anetone i luga o le aluga. O le mea e sili ai o le taimi lea, na te lei fia faia ai lava se isi mea. Sa ataata o ia ina ua mavava tele Felise ma moeiini ona mata. Sa ia lagona o le fiafia sili lea na ia oo i ai i le aso atoa. E mafai ona faatali lana taaloga.