O Totila ma Amigas
E alala tusitala i Iuta, ISA.
“A e manao i se uo, ia e faaali atu e te alofa” (Children’s Songbook, 262).
Sa faaivaiva Adriana. Sa manao e taaalo ma lona uso masaga o Taiana. Ae sa o Taiana ma Mama e faatau mai le meaai mai le maketi. Sa mapusela Adriana. Sa lagona le matuai gaogao o le fale. Sa moomoo anailoa lava latou te o.
Sa tonu ia Adriana e asiasi i lona tuaoi o Makalita. O le fanau a Makalita ua matutua uma, ma sa pei o ia o se tinamatua ia Adriana. E tele lava mea malie la te faia faatasi i taimi uma.
Sa alu Adriana i fafo. Sa vevela le susulu ifo o le la ao ia savali atu i le fale o Makalita. Sa faaonoono atu lona ulu i totonu o le faitotoa. “Makalita, o e i le fale?”
“Sí, O lea ou te i le umukuka,” o le valaau lea a Makalita. Sa tau atu Adriana o saofai o ia i le laulau i le umukuka o loo punou lona ulu. Sa ea a’e o ia ina ua alu atu i totonu Adriana.
“Malo, Adriana,” na fai atu ai Makalita. Sa ataata laitiiti o ia. Ae sa foliga mai e faanoanoa.
“E i ai se mea o faaletonu?” sa fesili atu ai Adriana.
Sa mapusela Makalita. “E le o se mea e tatau ona e popole i ai.”
“E mafai faapefea ona ou fesoasoani ia lelei ona lagona?” Sa mafaufau ai Adriana. O taimi uma lava sa foliga mai e fiafia ai Makalita pe a la faia faatasi se kuka. ”E mafai ona ou fesoasoani ia te oe e fai ni totila?”
“Lea faatoa uma lava ona ou faia,” o le tala lea a Makalita. Sa ia aveese se solofafano e faaali mai ai se faaputuga totila.
“Ia e mafai la ona ou fesoasoani ia te oe i le aiga o totila?” Sa fesili atu ai Adriana ma se ataata.
Sa ata Makalita. “Ioe. Se’i ou faavevelaina ni pi e ai faatasi ai.”
Sa tutu Adriana i talaane o Makalita i le ogaumu ma saeu ia pi uliuli ua toe falai i totonu o se ulo. Ina ua vela pi, sa ia aveina atu i le laulau. Sa aumai e Makalita ia totila ma le sisi.
Sa aumai e Adriana se totila mafanafana ma fola ai luga pi. Ona ia faasalalau ai lea o le sisi i luga. Sa manaia lona foliga mai! Sa le mafai ona faatali Adriana e u. Ae sa i ai se mea sa manao o ia e fai muamua.
“E mafai ona ou faia se tatalo, faamolemole?” Na fesili atu ai Adriana ia Makalita.
“Ioe.”
Sa moeiini mata o Adriana ma piilima ona lima. “Le Tama Faalelagi, matou te faafetai atu i Lau Afio mo lenei meaai. Faamolemole ia faamanuia ia matou maua ai le ola maloloina ma le malosi. Ma faamolemole fesoasoani ia Makalita i soo se mea na te manaomia. Ou te fiafia o au o lana uo. I le suafa o Iesu Keriso, amene.”
Na pupula mata o Adriana. Sa i ai se ataata lapoa i [foliga] o Makalita—o le taimi lenei o se ataata moni. A o la aai, sa la talanoa e uiga i le aoga ma taaloga ma tusi. E fiafia tele Adriana e talanoa ma Makalita.
Ina ua uma ona la aai, sa tuu atu e Adriana se opo lapoa lava ia Makalita. “Faafetai lava mo le meaai. Sa ou maua se taimi fiafia!”
Sa opo atu e Makalita ia Adriana. “Faafetai lava, Adriana. Sa ou manaomia se uo ananei.”
Sa matuai fiafia Adriana. “Ua ou fiafia ua ta amigas.”
“Ua ou fiafia foi ua ta uo,” o le tala lea a Makalita. “Aisea e te le alu ai ma ave ia totila uma nei i le fale? Ua matuai ou maona lava.”
Sa musamusa atu Adriana ina ua toe foi i lona fale. Sa ia lagona foi le maona—ma e le mai nao totila! Sa tumu o ia i le faauoga mai le ulu e oo i tamaivae.
Totila o Faauoga
O totila sana nei e faigofie ma e fetaui lelei lava mo le faia ma le faasoaina atu i uo! Ia mautinoa e i ai se tagata matua e fesoasoani atu.
2 ipu masa farina (falaoamata mai le sana)
1 1/2 ipu vai vevela
-
Saeu le masa farina i le vai vevela. Lomi le paluga seia vaivai.
-
Olo le paluga e fai ai ni polo laiti. Tuu le polo e tasi i le va o pepa faaga’o e lua.
-
Faaaoga se apa po o se falai, oomi i lalo ia polo mo ni nai taimi.
-
Kuka le totila i se falai i le vevela feoloolo. A enaena loa le itu i luga, liliu ona kuka lea o le isi itu.
-
Tuu ai i luga pi ma le sisi, ma ai fiafia loa!