O Ata o le Faatuatua
Delva Netane
Kalefonia, ISA
E fiafia Delva ma Krikome Netane i le taimi la te faaaluina faatasi ma le la fanau, o Teisa (taumatau) ma MeLa (tauagavale). Ua faamanuiaina le aiga o Netane talu mai lena taimi i nisi tamaiti e toalua.
E ui sa faigata le maitaga lona lua o Delva, ae ua faafetai Delva ma Kirkome mo faamanuiaga ua la maua. Fai mai Delva, “O lenei aafiaga ua latalata atili ai lo matou aiga i le tasi ma le isi ma latalata atili atu ai i le Alii.”
O le toe taua ai o le maitaga faigata, fai mai Kirkome, “Sa matuai ou popole lava. Ae sa ma taofimau pea ma lou toalua i a maua molimau o le talalelei. Sa ma taofimau i le faamoemoe ma malilie ai, afai e i ai lava se avanoa e mafai ona ma tuuina atu i le ma afafine, o le a ma faia le mea sili.”
“O se faamanuiaga le mafai ona matou taaalo ma MeLa i aso uma ma vaai ia te ia o ataata,” o le tala lea a Kirkome. “O se molimau faifaipea ia i matou e faapea, o le Atua e pule, ma o tali i tatalo e mafai ona oo mai ma le manino tele ma le ola, nai lo soo se mea lava e mafai ona tatou mafaufau i ai.”
O le fa o masina o lana maitaga lona lua, sa tau atu ai ia Delva o lana pepe sa i ai se faaletonu e seasea ona tupu i koromasome e ta’ua o le turisomi 13. Sa itiiti se avanoa e ola ai le pepe, ma talu ai e mafai foi ona lamatia ai le ola o Delva, o lea sa faafia ona fautuaina e fomai o ia e faapau le maitaga. O le feagai ai ma se taunuuga le mautinoa, sa filifili ai Delva e faatuatua i le Tama Faalelagi e tusa lava po o le a le mea e tupu.
Christina Smith, le pue ata
Sa tau mai ia te au o le a le ola lau pepe mo le silia ma se itula pe afai e ola o ia. Ma afai e ola o ia, sa tau mai ia te au, o le a leai se aoga o lona olaga. Sa fautuaina malosi au e lau fomai e faamuta le maitaga. Sa ou alu i se isi fomai ma o le tala lava lea e tasi na fai mai ai: faamuta le maitaga.
Ona ou alu ai lea i se fomai sa o se uo ma o se tagata o le Ekalesia. Sa ou faamoemoe e uunaia o ia e le Agaga e tuuina mai se faaiuga e ese mai. Sa tilotilo o ia i taunuuga uma o suesuega ma faaata ma faailoa mai lea lava atugaluga e tasi e pei o isi fomai. Ae sa fai mai o ia, o le a tatalo ma anapogi mo lou aiga ma faamoemoe mo le mea e sili ona lelei.
Sa vaai au e le tele o fomai eseese ma fomai faapitoa i le taimi atoa o lou maitaga. O taimi uma lava latou te fautua mai ai e faamuta ona latou te popole o le a lamatia ai lou ola. Ae sa le mafai ona ou vaai faalemafaufau i le faia o lena mea.
Sa ma naunau ma lou toalua e ola i le po o le a lava le mea e tupu mai. Afai e maliu le ma tama teine, o le a ma iloa o ia o se agaga faapelepele. Ma afai e ola o ia ma o le a avea ai o se tauiviga, sa ma faatuatua o le a mafai ona ma taulimaina.
Sa matuai faigata pea lava. Sa ou taumafai e taofiofi i totonu ou lagona, ona sa i ai sau tama teine e lua tausaga le matua, ma ou te lei manao na te iloa mai le le mafai na taofiofia ou lagona. Sa ou le iloa se mea e fai, se mea e mafaufau i ai, po o fea e liliu i ai mo se fesoasoani. Sa lagolagosua mai lau tane, uo, ma le aiga, ae sa ou lagonaina latou te lei malamalama atoa i le mea sa ou oo i ai. Na pau lava le tagata e mafai ona malamalama moni o le Alii. Sa faaauau pea ona ou tatalo mo le faamafanafanaga ma le taitaiga.
Mulimuli ane, sa ou talanoa ai i lou epikopo ma faamatala i ai le mea na tupu. Sa ia valaaulia le uarota e anapopogi mo le matou aiga. O le mea lenei sa amata ai se faamoemoe mo au. Sa amata ona ou lagonaina le malamalama taiala o le lagi i faaiuga uma sa tatau ona ou faia.
I le valu ma le afa masina, sa ou alu ai mo se faaata tafa 4 [4D].
O ni nai vaiaso ona fanau lea o le ma pepe, ma sa ou iloaina o le iuga lea e ono i ai. Sa ou manao foi e pue le leo o le tata o le fatu o lau tama teine e tuu i totonu o se pea meataalo ina ia i ai se mea ou te manatua ai o ia.
I faaata na faia muamua, sa le mafai e fomai ona vaaia soo se vaaiga faaletino. Ona o lenei mea, sa latou fai mai ai o lima o lau tama teine o le a o ni ponati ae o ona foliga o le a faaletonu. O ata i se faaata tafa 4 e sili atu ona auiliili, o lea ina ua amata e le tagata e galue i le masini le faaata, sa ou vaaia le lima atoatoa lelei o lau tama teine o talotalo mai ia te au i luga o le lau. Sa ou vaaia foi ni mata atoatoa se lua ma se gutu atoatoa. Sa ou maua se lagona faagaeetia e le oti o ia.
Ina ua fanau mai le ma tama teine o MeLa, sa tutu sauniuni lava fomai faapitoa ae sa lei manaomia. Sa lei maua MeLa i le turisomi 13. Sa le mafai e fomai ma tagata faapitoa ona faamatala pe aisea, ae sa ma iloa ma lou toalua sa o se vavega.
Ina ua fanau mai MeLa, sa fautua mai e fomai ni suega faaopoopo mo le kenera e vaai ai pe i ai ni isi tulaga o faaletonu. Na faaalia i taunuuga o suega sa lei maua o ia i se tulaga e seasea ona tupu i kenera. Sa popole le fomai faapitoa mo kenera ina nei tauaso, tutuli, pe le mafai e MeLa ona savali ma tautala, Ae peitai, i le taimi nei, e ui o loo i ai nisi o vaega o lona tuputupu ae o loo tuai ai, ae o loo mafai e MeLa ona vaai, faalogo, ma faaaoga se masini faamasani e fesoasoani i lana savali. Ua ia tauina foi ni upu mai lea taimi ma lea taimi. O ia o se tamaitiiti e sili ona fiafia!
Matou te matuai faafetai mo le faamanuiaga ua matou maua e ala i lenei faagasologa atoa. Ua matou iloa o le Tama Faalelagi o le Foafoa silisili ma le Fai Faaiuga silisili o le ola. Ua matuai faamanuiaina i maua e avea ma se vaega o lena [faagasologa]. O aso uma lava matou te vaavaai atu ai ia MeLa ma iloa ai o ia o se vavega. Ua aumai e le ma fanau le fiafia i o maua olaga ma faamanatu mai ua ia i maua ni mea se tele e faafetai ai.