Faamanuiaina i Soo se Auala e Mafai Ai
Saunia e Elder Edward Dube
O Le Fitugafulu
Sa fanau mai Elder Edward Dube i Zimbabwe, ma o i laua ma lona faletua, o Naume, e toafa le la fanau.
E maeu le faamanuiaina o a’u, o lo’u aiga, ma le Ekalesia i Aferika i le faaaliga.
O le taimi muamua na ou faalogo ai e uiga i le tapu o tagata uli ona umiaina le perisitua, [o le taimi] sa ou i ai i la’u misiona. Sa ou papatiso i le 1984, i le mavae lena ona faamutaina o le tapu. I le lua tausaga mulimuli ane sa valaauina au e auauna atu i le Misiona a Aferika i Saute Johannesburg.
A o tofia ai i Bulawayo, Zumbabwe, sa ma asia ai ma la’u soa, o Elder Francis Jack se tuafafine sa le toaga i le lotu. O lana tane o se polofesa faalelotu mai se isi ekalesia. Sa ia fesili mai ia i maua pe aisea na taofia ai le perisitua mai alii e tupuga mai i tagata uli Aferika. Sa ia faia maia le tele o tala na faasoesa ia te a’u—o mea sa ou lei faalogo muamua ai lava. Ina ua ou savali ese mai lena potu, sa ou lagona le faanoanoa tele ma le lotovaivai tele.
Sa ma tietie atu ma Elder Jack i a ma uila vilivae i le ma fale e aunoa ma se tala. Ina ua ma taunuu iina, sa ia tepa mai ia te a’u ma fai mai, “Elder Dube, o le a le mea ua tupu ia te oe? Ua foliga mai matua e popole lava.”
“E te lei lagona mea na ia fai mai ai?” Sa ou tali atu. “Na faapefea ona tupu lenei mea?”
“Elder, e te talitonu na faaali mai le Tama Faalelagi ma Iesu Keriso i le taulealea o Iosefa Samita?”
“Ioe,” na ou fai atu ai. “Ae o le a le sootaga o lena mea ma lenei mea?
“E faatatau i ai mea uma lava,” Sa tali mai ai Elder Jack. “Tatou te talitonu i faaaliga, a ea?”
Sa ou mafaufau i ana upu ma mea na fai mai ai le polofesa. O lena po sa ou ala a’e ai i le vaeluapo. Sa ou lagonaina le fiafia ma le filemu.
O le tali i fesili uma o le talalelei e noatia i mea na tutupu i le 1820. I le iloaina ai na faaali mai le Tama Faalelagi ma Iesu Keriso ia Iosefa Samita, o lona uiga o ia o se perofeta ma o le Ekalesia lenei a le Alii. Afai sa faaali mai le Tama Faalelagi ma Iesu Keriso i le taulealea o Iosefa, o lona uiga la ua taoto tonu uma ia mataupu faavae ma fesili o le talalelei. O se ekalesia lenei o faaaliga, ma e faaali mai e le Alii ia faagasologa patino i taimi patino i Ana auauna, o perofeta, ma o le mea lena na te aumaia le filemu ia te a’u.
Sa amata ona ou tuupuna i luga ma lalo ma fafagu i luga la’u soa ma alaga atu, “Ioe, ioe! E sa’o oe Elder Jack! Sa faaali mai le Tama Faalelagi ma Iesu Keriso i le taulealea o Iosefa Samita! O le Ekalesia lenei a le Alii!”
O le aveesea o lenei tapu ua avea ma se faamanuiaga i tagata o le ekalesia i Aferika atoa. Ua faamanuiaina a’u ma lo’u aiga e le perisitua i auala uma e mafai ai. Ua avea ma se malosiaga tele ia te a’u le mauaina o faamanuiaga o le malumalu, o le faamanuiaga o le iloaina o le a tatou ola faatasi o ni aiga mo le faavavau.
O le mauaina o le perisitua ua faamanuiaina ai Aferika. O loo fiafia ma lelei tagata iinei, ae ua faaopoopo atu i ai ma le talalelei. E taua tele aiga i Aferika. O le malumalu la ua tagai i ai o se faamanuiaga maoae. O loo vave tele le tuputupu ae o le Ekalesia iinei.
E faalogo tagata iinei i le finagalo o le Atua ma e matou te o ma fai. Ua faamanuiaina e lenei mea tagata o le ekalesia. I se taimi i nisi eria i Aferika sa oo ai i le 90 pasene tagata le faigaluega, ae sa foliga mai na lelei pea o tatou tagata o le ekalesia ona sa ola-tutoatasi i latou. Na faamanuiaina i matou e le perisitua ma le taitaiga mai taitai perisitua.
Ou te faafetai i le Tama Faalelagi ma Iesu Keriso mo le avanoa e umia ai le perisitua, mo le faamanuiaga ua i ai i lo’u olaga, ma le auala ua ia faamanuiaina ai tagata o le ekalesia i le konetineta atoa o Aferika.