Lisa L. Harkness
Tokoni ʻUluaki ʻi he Kau Palesitenisī Lahi ʻo e Palaimelí
Naʻe manako maʻu pē ʻa Lisa L. Harkness ʻi he akó pea mo e māmaní, ko ha meʻa naʻá ne ako mei heʻene ongomātuʻá. Naʻá ne ako ki he politikalé kae pehē foki ki hono tokangaekina ʻo e fanga monumanu ngaoló lolotonga ʻene ngāue ʻi he Mīsiume Monte L. Bean Life Science heʻene ako ʻi he ʻUnivēsiti Pilikihami ʻIongí—kau ai e fanga ngatá.
Naʻá ne pehē, “ʻOku ʻi ai pē mo honau ʻulungaanga, pe te ke tui ki ai pe ʻikai.” “Ne ʻi ai ha kiʻi monumanu ʻe taha naʻá ne ʻiloʻi au ʻi he taimi kotoa pē naʻá ku puke ai iá.” Naʻe kaka hake ʻa Hauati, ko ha ngata naʻe lanu kulokula hono hikú, ki hono umá, ʻo takatakaiʻi hono kiá, pea fakafalala hono ʻulú ki he ʻulu ʻo Lisá lolotonga ʻene akoʻi ha kulupu naʻá nau ō ange ki he mīsiumé.
ʻI he ngaahi ʻahó ni, te ne kei malava pē ke toʻo hake ha ngata mo ʻiloʻi e faʻahinga ngata ko iá—ʻo kapau he ʻikai feinga ke uʻu ia.
Naʻe fāʻeleʻi ʻa Sisitā Harkness ʻi Losi ʻEniselisi, Kalefōnia, USA, ʻi he ʻaho 13 ʻo Sānuali, 1965 kia Ronald mo LaRae Long. Ko e lahi taha ia ʻi ha fānau ʻe toko nima, pea naʻa nau “manako hono fai ha meʻa foʻoú, ngāue ki tuʻá mo e ako fekauʻaki mo e māmaní.” Naʻá ne pehē koeʻuhí ko ʻene lava ʻo ʻeke maʻu pē ha ngaahi fehuʻi ki heʻene ongomātuʻá, “Naʻá ku tui mo falala kakato te u lava ʻo fehuʻi ki he Tamai Hēvaní pea maʻu ha ngaahi tali.”
Hili e ngāue fakafaifekau ʻa Sisitā Harkness ʻi ha misiona lea faka-Sipeini ʻi he Misiona Louisiana Baton Rouge, naʻá ne fakaʻosi ako mei BYU mo ha mataʻitohi B.A. ʻi he politikalé mo e ako fakafaiako ki ha ako māʻolungá. Naʻá ne mali mo David S. Harkness ʻi he ʻaho 22 ʻo ʻEpeleli, 1988, ʻi he Temipale Salt Lake. ʻOkú na maʻu ha fānau ʻe toko nima mo ha makapuna ʻe toko ua.
Kuo hoko foki ʻa Sisitā Harkness—ʻa ia naʻe fokotuʻu ko e Tokoni ʻUluaki ʻi he Kau Palesitenisī Lahi ʻo e Palaimelí ʻi he ʻaho 31 ʻo Maʻasi, 2018—ko ha mēmipa ʻo e poate lahi ʻo e Palaimelí, palesiteni ʻo e Kau Finemuí ʻi he siteikí, palesiteni ʻo e Kau Fineʻofá ʻi he uōtí, tokoni ʻi ha kau palesitenisī ʻo e Kau Finemuí ʻi he uōtí, fai faleʻi ʻi he Maea Meití, talēkita kemi ʻi he Kau Finemuí, talēkita ʻo e hisitōlia fakafāmilí ʻi he siteikí, fai faleʻi ʻi he hisitōlia fakafāmilí ʻi he uōtí, mo ha faiako ʻo e Tokāteline ʻo e Ongoongoleleí.
Kuó ne ngāue tokoni foki ʻi he fakataha ʻa e mātuʻá mo e kau faiakó, fakataha alēlea ʻa e koló, Kau Hiva mo e Tāmeʻa ʻo ʻIutaá, pea mo e Kātoanga Fananga ʻa e Timpanogos, kae pehē ki ha ngaahi tuʻunga kehekehe ʻi he puleʻangá.