ʻEletā Mathias Held
Fitungofulu Taki Māʻolungá
ʻE lava ke ui ʻa ʻEletā Mathias Held mo hono uaifí, Irene, ko e fakatātā ʻo ha Siasi fakaemāmani lahi. ʻOkú na haʻu fakatouʻosi mei Kolomupia mo e kuí mei Siamane. Naʻe ʻave kinaua ʻe he ngāué mo e akó mei hona fonau tupuʻanga ʻi ʻAmelika Sauté ki Kānata, Siamane, Kuatemala, Palāsila, pea faifai pē peá na toe foki ki Kolomupia. ʻI he fonua takitaha, naʻá na ako ha lea mo ha anga fakafonua foʻou.
Naʻe pehē ʻe ʻEletā Held, naʻe hikinimaʻi ko ha Fitungofulu Taki Māʻolunga ʻi he ʻaho 31 ʻo Māʻasi, 2018, “Ka naʻe tatau tofu pē ʻa e Siasí ʻi he feituʻu kotoa pē naʻá ma ʻalu ki ai.”
Naʻe hanga ʻe he “tatau” fakalaumālie ko iá ʻo fakamālohia e ongomātuʻa ko ʻení lolotonga ʻena ohi hake ha fānau ʻe toko tolu mo tupulaki ʻi he ongoongoleleí.
Naʻe ako fakataha e ongomātuʻá ni ʻi ha ʻapiako lea faka-Siamane ʻi hona fonua tupuʻangá ʻi Pokotā, Kolomupia. Naʻe silaʻi kinaua ʻi he ʻaho 13 ʻo Sune, 1989, ʻi he Temipale Frankfurt Germany, hili hono maʻu ʻe Mathias ha mataʻitohi B.A. ʻi he ʻenisinia makēnikí ʻi Pokotā mo ha mataʻitohi M.A. ʻi he pule fakapisinisí ʻi Kānata.
Naʻe ʻave ʻe he ngaahi faingamālie fakangāué e ongomātuʻá kimui ange ki Hēnouva, Siamane, ʻa ia naʻe maʻu ai ʻe Sisitā Held ha ongo mālohi ʻoku ʻamanaki ke liliu ʻena moʻuí.
Naʻá ne pehē, “Naʻá ku talaange kia Mathias ne u maʻu ha ongo te ma maʻu ha pōpoaki mei he langí.” Ne ma maʻu e pōpoaki fakalangi ko iá ʻi ha efiafi ʻuha ʻi he 1987 ʻi ha tukituki ʻi he matapā ʻi muʻá. Naʻe tuʻu ʻi tuʻa ha ongo faifekau Māmonga ne na lea faka-Siamane ʻi he ongo faka-ʻAmeliká.
ʻI he māhina ʻe 10 ne hoko maí, naʻe ako e fāmili Helds mo e ongo faifekaú mo maʻu ha ngaahi kaungāmeʻa ʻi he kāingalotu ʻo e Siasí. Hili haʻana lotu lahi, ne na maʻu ha fakapapau fakalaumālie ki he moʻoni ʻo e ongoongoleleí pea ne papitaiso kinaua ʻi he 1988.
Ne ngāue ʻa ʻEletā Held ʻo laka hake ʻi he taʻu ʻe 25 ki he kautaha ngaahi meʻalele Daimler-Benz, mo feʻaveʻaki holo ia ʻe hono ngaahi fatongia fakapulé ʻi he funga ʻo e māmaní. Kuo fakafalala e fāmili Helds ki he ʻEikí ʻi he meʻa kotoa pē.
Naʻá ne pehē, “ʻOku ʻikai mahuʻinga e ngaahi faingataʻa ʻokú ke fouá.” “Kapau ʻokú ke fetuʻutaki mo e langí, te ke sai pē koe.”
Naʻe fāeleʻi ʻa ʻEletā Held ʻi he ʻaho 5 ʻo Sune 1960, kia Michael mo Elisabeth Held, kuó ne hoko ko ha tokoni ʻi ha kau palesitenisī fakasiteiki, ko ha tokoni ʻi ha kau pīsopeliki, mo ha Fitungofulu Fakaʻēlia ʻi he ʻĒlia ʻAmelika Saute Tokelau-hihifó.