ʻEletā Robert C. Gay
Kau Palesitenisī ʻo e Kau Fitungofulú
Lolotonga e hoko ʻa ʻEletā Robert C. Gay ko ha palesiteni misiona ʻi Kaná, naʻá ne maʻu ha ueʻi ʻi ha ʻaho ʻe taha ke tuʻu ʻo tokoni ki ha kiʻi tamasiʻi naʻe tangi. Naʻá ne ʻuluaki tukunoaʻi e ueʻi ko iá ka ne fekau kimui ange ha mēmipa ʻo e Siasí ke ʻalu ʻo kumi mo ʻomi ʻa e kiʻi tamasiʻí kiate ia.
Ne ʻilo ai ʻe ʻEletā Gay, naʻe hikinimaʻi ko ha mēmipa ʻo e Kau Palesitenisī ʻo e Kau Fitungofulú ʻi he ʻaho 31 ʻo Māʻasi, 2018, ʻoku fakatau ika mōmoa ʻa e kiʻi tamasiʻi ko iá maʻa hono tauhí. ʻI he ʻaho ko iá naʻe mole mei he kiʻi tamasiʻi ko iá ʻa e paʻanga naʻá ne maʻú ʻi ha foʻi ava ʻi hono kató.
Naʻe pehē ʻe ʻEletā Gay, “Kapau ʻe foki ki ʻapi taʻe ʻi ai ha paʻanga, ʻe ui ia ko ha taha loi, ngalingali ʻe taaʻi, pea tuli ki hala. Ne mau fakafiemālieʻi ia, fetongi ʻene meʻa ne molé pea fakafoki ia ki ʻapi ki hono tauhí.”
Hangé ko e fakamatala ʻa ʻEletā Gay ʻi he konifelenisi lahi ʻo ʻOkatopa 2012, naʻá ne ako mei he aʻusia ko iá ha foʻi moʻoni maʻongoʻonga ʻe ua, “ʻUluakí, naʻá ku ʻilo ʻo laka ange ʻi ha toe taimi kimuʻa ʻoku ʻafioʻi kitautolu ʻe he ʻOtuá pea he ʻikai ke ne teitei liʻaki kitautolu; pea ko e uá; naʻá ku ʻiloʻi kuo pau ke tau fakafanongo maʻu pē ki he Laumālie ʻoku tau maʻú pea ʻalu ‘leva’ ki ha feituʻu te ne ʻave kitautolu ki aí, neongo ʻetau manavasiʻí pe ha faʻahinga faingataʻa.
Naʻe hikinimaʻi ʻa ʻEletā Gay ko ha Fitungofulu Taki Māʻolunga ʻi he ʻaho 31 ʻo Māʻasi, 2012. ʻI he taimi naʻe ui ai ia ki he Kau Palesitenisī ʻo e Kau Fitungofulú, naʻá ne lolotonga hoko ko e Palesiteni ʻo e ʻĒlia ʻĒsia Tokelaú. Naʻá ne ngāue kimuʻa ʻi he ʻuluʻi ʻōfisi ʻo e Siasí ko e sea ʻo e Potungāue Moʻui Fakafalala Pē Kiate Kitá/ Kōmiti Paʻanga Tokoni Fakaako Tuʻumaʻú, mo ha ngaahi fatongia ki he ngaahi ngāue fakamāmani lahi ʻo e moʻui fakafalala pē kiate kitá.
Kimuʻa pea ui ia ki he Kau Fitungofulú, naʻá ne hoko ko e ʻōfisa pule ʻo ha kautaha fakahū paʻanga naʻá ne kau hono fokotuʻú. Naʻá ne kau foki hono fokotuʻu mo hoko ko ha talēkita ʻi ha ngaahi kautaha tokoni fakaetangata fakamāmani lahi pea ngāue ʻi ha pangikē fakahū paʻanga ʻi Wall Street, ʻo hoko ko ha fai faleʻi ʻi he founga pule fakapisinisí, pea hoko ko ha faiako ʻekonōmika ʻi he ʻUnivēsiti Hāvatí.
Naʻe maʻu ʻe ʻEletā Gay ha mataʻitohi B.A. ʻi he ʻekonōmiká mo ha fakamamafa ʻi he sitētisitiká mei he ʻUnivēsiti ʻo ʻIutaá mo ha PhD ʻi he pisinisi ʻekonomiká mei he ʻUnivēsiti Hāvatí.
Kuo ngāue fakafaifekau taimi kakato ʻa ʻEletā Gay ʻi Sipeini, hoko ko ha kulupulita ʻi he taulaʻeiki lahí, palesiteni Talavou fakauooti, aleaʻanga māʻolunga, tokoni ʻi ha kau pīsopeliki, mo ha Fitungofulu Fakaʻēlia.
Naʻe fāʻeleʻi ia ʻi Losi ʻEniselesi, Kalefōnia, USA ʻi he ʻaho 1 ʻo Sepitema 1951. Naʻá ne mali mo Lynette Nielsen ʻi ʻEpeleli 1974. ʻOku ʻi ai ʻena fānau ʻe toko fitu.