ʻEletā Carl B. Cook
Kau Palesitenisī ʻo e Kau Fitungofulú
ʻOku tui ʻa ʻEletā Calr B. Cook ko e faingamālie ke ngāué ko e taha ia ʻo e ngaahi tāpuaki maʻongoʻonga ʻo e mēmipasipi ʻi he Siasi ʻo Sīsū Kalaisi ʻo e Kau Máʻoniʻoni ʻi he Ngaahi ʻAho Kimuí Ní. Ka, naʻá ne pehē, ʻoku fie maʻu ʻa e tuí ki hono tali mo fua ʻo e ngaahi fatongiá.
Naʻe hikinimaʻi ʻa ʻEletā Kuki, ko ha mēmipa ʻo e Kau Palesitenisī ʻo e Kau Fitungofulú ʻi he ʻaho 31 ʻo Māʻasi, 2018, ʻo fakatatau e kau mēmipa ʻo e Siasí—ʻoku nau ngāue fakataha ʻi he ngaahi koló mo e uōtí, ngaahi kōlomú, mo e ngaahi houalotú—ki ha “kia pelepela” ʻi ha meʻalele, ʻa ia ʻokú ne ʻomi ha mālohi ʻoku lahi angé.
Naʻá ne pehē ʻi he konifelenisi lahi ʻo ʻOkatopa 2016, ʻOku ʻai ʻe he kia pelepelá, fakataha mo e four-wheel drive, “ke ke lava ʻo holoki, maʻu ha mālohi lahi ange, pea ngaʻunu kimuʻa. ʻOku tau maʻu ha mālohi lahi ange ʻi heʻetau ngāue fakatahá, ʻo hangē ko e ngāue fakataha ʻa e ngaahi kiá ke maʻu ha mālohi lahi ange ʻi he kia pelepelá. Ko e taimi ʻoku tau umataha ai ke fetokoniʻakí, ʻoku tau lavaʻi fakataha ha meʻa lahi ange ʻi he meʻa ne tau mei lava fakatāutahá. ʻOku fakafiefia ke kau atu pea faaitaha ʻi heʻetau ngāue mo tokoni ʻi he ngāue ʻa e ʻEikí.”
Naʻe hikinimaʻi ʻa ʻEletā Cook ko ha Fitungofulu Taki Māʻolunga ʻi he ʻaho 2 ʻo ʻEpeleli, 2011. Kimuʻa hono uiuiʻi foʻoú, naʻe ngāue ʻa ʻEletā Cook ʻi he ʻuluʻi ʻōfisi ʻo e Siasí, ʻa ia naʻá ne tokoni ai ki hono tokangaʻi ʻo e ʻĒlia ʻAmelika Noate Hihifó, mo ha ngaahi fatongia kehe. Kimuʻá, naʻá ne hoko ko e Palesiteni ʻo e ʻĒlia ʻAfilika Tongahahaké.
Kuo poupouʻi ʻe ʻEletā Cook e Kāingalotu ʻo e Ngaahi ʻAho Kimui Ní ke nau manatuʻi ʻoku mei he ʻOtuá ʻa e ngaahi uiuiʻi ʻi he Siasí ʻo fakafou mai ʻi Heʻene kau tamaioʻeiki kuo filí.
“ʻOku maʻu e ngaahi tāpuakí ʻi heʻetau vilitaki ʻi hotau ngaahi uiuiʻí mo e ngaahi fatongiá pea mo kei pīkitai ʻaki e tui kotoa ʻoku tau maʻú.”
Naʻe maʻu ʻe ʻEletā Cook ha mataʻitohi B.A. mei he Kolisi Uepa Siteiti ʻi ʻIutaá mo ha mataʻitohi M.A. ʻi he fakalele pisinisí mei he ʻUnivēsiti ʻo e Siteiti ʻIutaá. Kimuʻa pea ui ki he Kau Fitungofulú, naʻá ne ngāue ʻi he tafaʻaki tuʻuaki kelekelé.
ʻOku kau ʻi he ngaahi uiuiʻi ʻo ʻEletā Cook ʻene ngāue fakafaifekau taimi kakato ʻi Hemipeki Siamané, pīsope, palesiteni fakasiteiki, Fitungofulu Fakaʻēlia, mo e palesiteni ʻo e Misiona Auckland New Zealand.
Naʻe fāʻeleʻi ia ʻi ʻOkiteni, ʻIutā, USA, ʻi he ʻaho 15 ʻo ʻOkatopa, 1957. Naʻá ne mali mo Lynette Hansen ʻi Tīsema ʻo e 1979 Ko e mātuʻa kinaua ki ha fānau ʻe toko nima.