ʻEletā David P. Homer
Fitungofulu Taki Māʻolungá
Naʻe pehē ʻe ʻEletā Homer, ko e taha ʻo ʻene ngaahi manatu melie fekauʻaki mo e ongoongoleleí ko hano vahe ia ʻi heʻene taʻu 14 ko ha hoa faiako fakaʻapi ki ha mēmipa ʻi hono uōtí naʻe “kehe ʻene fakahoko ʻa e faiako fakaʻapí.” “Naʻe ʻikai fakatefito ia he ʻaʻahi ki he ʻapí mo vakaiʻi e kakaí; naʻe fekauʻaki ia mo e fatongia fakaetauhi ke feau ʻenau ngaahi fie maʻú.”
ʻI he vā fakahoá, te na lotua mo talanoaʻi e ngaahi fāmili ʻoku vahe angé, ʻo ʻikai ko ha tokotaha matuʻotuʻa ki ha kiʻi talavou ka ko ha kaungāngāue ʻi he ngaahi ngāue lakanga fakataulaʻeikí. Naʻe pehē ʻe ʻEletā Homer, “Naʻá ku ʻilo ʻoku maʻu ai ʻa e Laumālié pea ʻoku tokoni ia ʻi he ngāué.”
Kuo nofoʻia e lēsoni ko iá ʻiate ia ʻi he kotoa ʻene moʻuí mo e ngaahi tokoni ʻi he Siasí, neongo pe ko ʻene ngāué ko ha Fitungofulu Fakaʻēlia, taki ʻi he nesilií, pe ko ha mataotao ʻi he palakipoe puletiní—ʻa ia ko hono fatongia ia lolotonga ʻene nofo mo hono uaifí ʻi Melipoane, ʻAositelēliá.
Naʻe fāʻeleʻi ʻa David Paul Homer ʻi he ʻaho 25 ʻo ʻEpeleli, 1961, ʻi Sōleki Siti, ʻIutā, USA, kia Frederick mo Phyllis LeNila Homer. Hili ʻene ngāue fakafaifekau ʻi Hong Kong mei he 1980 ki he 1982, naʻá ne fetaulaki mo Nancy Dransfield, naʻe fakaʻosi ako mei he ʻUnivēsiti Pilikihami ʻIongí, ʻi ha faeasaiti ʻinisititiuti ʻi Sōleki Siti, ʻa ia naʻá ne ngāue ai mo ako ʻi he ʻUnivēsiti ʻo ʻIutaá. Naʻá na mali ʻi he Temipale Salt Lake ʻi he ʻaho 31 ʻo Siulai, 1984. Kuó na ohi hake ha ngaahi ʻofefine ʻe toko nima mo ha foha ʻe taha.
Naʻe maʻu ʻe ʻEletā Homer ha mataʻitohi B.A. ʻi he ʻekonōmiká mei he ʻUnivēsiti ʻo ʻIutaá mo ha mataʻitohi M.A ʻi he pule fakapisinisí mei he ʻApiako Uātoní ʻi he ʻUnivēsiti ʻo Penisilivēniá.
Lolotonga ʻene ngāue taʻu ʻe 30 ko ha pule ʻi he General Mills, kuó ne nofo mo hono uaifí ʻi Maiemi, Folōlita, USA; Miniāpolisi, Minesota, USA; Pēlingitoni, ʻOnitāliō, Kānata; mo Seini-Sulupisi, Vooti, Suisalani.
Kuo hoko ʻa ʻEletā Homer ko ha palesiteni fakasiteiki, pīsope, palesiteni ʻi he kōlomu ʻo e kaumātuʻá, mo ha sekelitali pule fakauooti. ʻI heʻene hoko ko ha Fitungofulu Fakaʻēliá, naʻá ne kamata ngāue ʻi Kānata pea hoko atu ai ki ʻIulope, ʻa ia naʻá ne ngāue ai ʻi he taʻu ʻe fā kuo hilí kimuʻa pea hikinimaʻi ia ko ha Fitungofulu Taki Māʻolunga ʻi he ʻaho 31 ʻo Māʻasi, 2018.